Ezai 8 - WE NU GALE 1995

Li be 'da Ezai kɛ ma be mɔ hã owinɔ

¹ NWA ba nu a hã mi na, mi bá ta, nɛ mi kɔmɔ mbɛti ngɔ nɛ do gã gbãlã nɛ hã owinɔ. Mi dɛa olo nu a, nɛ mi kɔmɔ li wi gɛ ngɔ nɛ na: “Kala kɔ̃ wa dɔ̃, zũ kɔ̃ wa si nɛ.”

² Nɛ mi bia ta ni hã otemɔɛ bɔa, kɛ wa a saka wele. Wi a nganga Uria, wa do Zakaria, be 'da Yɛberekia.

³ 'Do nɛ, nɛ mi mba ngɔ te do kɛnɛ mi, kɛ a a wi gba olo nu Gale, nɛ a ba zã, nɛ a ko bulu be. Nɛ nwa ba nu ɛ hã mi, nɛ mi e li be ni na: “Kala kɔ̃ wa dɔ̃, zũ kɔ̃ wa si nɛ.”

⁴ Mba gɔ, dati kɛ be ni a ndo sɛ sa li baa a do naa a ni, wa kala sɛ kpamɛnɔ kɔ le Damasi do Samaria vɛ̃, nɛ wa 'dɔlɔ sɛ ma hã nwa ngɔ nù Asiri.

Nwa ngɔ nù Asiri a bi sɛ Oyudanɔ

⁵ NWA Gale tɔ̃a hã mi na:

⁶ “Owinɔ gɛ wa bɛ̃a lì Siloe, kɛ ma fo gɛɔ ni, nɛ wa dɛ yangga onwa Rɛsinɛ do Peka.

⁷ Ma kɛ mi dɛ sɛ na, nwa ngɔ nù Asiri kulu ngɔ do onga wi bolonɔ 'da a, we bi nù Yuda. Wa le sɛ ngɔ nù Yuda do gbɛngɛ tɛ, ɔ nɛ ngele lì Efratɛ, kɛ ma hɛ̃, nɛ ma fo nganda wena, nɛ ma nɛ ngɔ kungba nɛ ni.

⁸ Ma dunu sɛ kɔla, nɛ ma hɔ sɛ ngɔ nù Yuda, nɛ ma ba sɛ winɔ ti gɛlɛ wa, nɛ ma kpa sɛ ngɔ nùi 'da mɔ Emanuɛlɛ vɛ̃.”

Gale do lɛ boe

⁹ Aa nɛ, ogele winɔ nɛ mba ngba nɛ gɛ, nɛ bá zã zu we kpa, nɛ nde nɛ tana sɛ kili. Aa nɛ, ogele winɔ kɛ nùi 'da nɛ ma nyɛlɛ nɛ gɛ nde ni, li nɛ sɔ̃̀, nɛ ngɛ́mɛ́ wi bolonɔ 'da nɛ kpa, nɛ nde nɛ tana sɛ kili.

¹⁰ Gɛnɛ kɔ nɛ 'dafa mɔ, nɛ ma 'danga sɛ iko. Gɛnɛ kɔ nɛ wele we gbaa, nɛ nde mɔ kpo dɛ́ sɛ tɛ̃ ɛ gɔ, we duzu kɛ Gale do lɛ boe.

Nɛ dɛ tati a kili NWA Gale

¹¹ Ngawi 'da NWA lia kɔ mi, nɛ a tɔ̃ hã mi na, mi tɛ nɛ 'do dɛa mɔ tɛ winɔ gɛ gɔ. A na:

¹² “Fala kɛ wa ba zã zu we, nɛ mɔ tɛ lè kɔ nɛ gɔ. Mɔ tɛ dɛ̃ kili mɛnɔ kɛ wa dɛ kili nɛ ni gɔ.

¹³ Ta zu mɔ tɛ èlè na, wi kɛ nɛ wia we dɛ kili a, wi a mi NWA ngɔ mɔ nyanga nza vɛ̃, we kɛ mi zu mi kpo a santo ni gɔ.

¹⁴ Mi sɛ a ta usu tɛ wi kɔ nɛ, nɛ nde mi sɛ 'bɔ a ta kɛ winɔ wa kɔ do nyanga wa ni. Mi ba sɛ owi ngɔ nu Yuda do Israɛlɛ, do owi kɔ le Yeruzalɛmɛ ɔ nɛ kɛ bili ba sa'de ni.

¹⁵ Owele wena wa kɔ sɛ nyanga wa, nɛ wa te li bili, nɛ ma ba wa, nɛ tɛ wa gbini, nɛ nde wa hɔ́ sɛ li bili ni gɔ.”

Wi gba olo nu Gale gbini zã a do NWA

¹⁶ Toe kɛ NWA tumba ni, mi usu ma kɔ koe tulu. Mi kasa mbɛti mbula 'da a, nɛ mi nãlã nu nɛ. Mi e sɛ ma dɛ kɔ Owi yambala mɛnɔ 'da mi na, wa zu wa kpo, wa zɔ mɔ tɛ nɛ.

¹⁷ Ngangga ni, NWA usu tɛ̃ ɛ hã obe zã Yakɔbɔ. Nɛ nde mi mbɔ́kɔ́ sɛ tɛ 'bɔ 'da a gɔ, mi 'bana tɛ gbini zã mi do a.

¹⁸ Nɛ zɔ́ mi, do obenɔ kɛ NWA Gale hã wa hã mi gɛ, lɛ kɛ. NWA ngɔ mɔ nyanga nza vɛ̃, kɛ a ɔ tɛ ngɔ kala Sioni i ni, a ia lɛ ɔ nɛ bia mɔ we mbese obe Israɛlɛ na, wa kpa hã.

¹⁹ Ombe winɔ wa tɔ̃ na: “Ma dia fɛ̃ na, lɛ nɛ́, hã lɛ aka owinɔ wa wele we do obɔzɔnɔ, nɛ wa dama fãlĩ, nɛ wa lungu we ni, takɔ wa be mɛnɔ kɛ ma dɛ sɛ tɛ̃ ɛ ni hã lɛ. Ma wia na, owinɔ wa tɔ̃ lɛnggɛ do ogalenɔ 'da wa, nɛ wa wele 'bɔ we do ofionɔ we owinɔ kɛ wa tɛ fè gɔ ni.” Kɔ fala kɛ wa tɔ̃ hã mɔ na mɛ ni,

²⁰ nɛ mɔ gese na: “Nɛ zélé tati a toe 'da NWA, do mbulanɔ 'da a. Wi kɛ a zèlè mbula gɛ gɔ, nɛ nde fala sá sɛ 'da a gɔ.”

Gba tũ ma tũ sɛ ngɔ nù nga

²¹ Owinɔ wa mbɔka vɛ̃, wa yɛnggɛ ngɔ nù 'da wa tu tu, fo nyɔngɔmɔ kɔ zã wa bina. Wɔ tũ li wa, nɛ wa ma ngɔ 'danga nu wa hã nwa ngɔ wa, nɛ wa 'danga 'bɔ nu wa hã Gale 'da wa. Wa ka mɔ ngɔ,

²² nɛ wa ka mɔ nù, nɛ nde wa zɔ́ mɔ kɛ ma wia we gbaka wa ni gɔ. Tati a gba tũ hã ma tũ ngɔ wa mbĩi iko, nɛ fo mbe nyɛa we be sĩ bina.

Wa kua nwa wi hã dungu fio

²³ Owinɔ kɛ wa zɔ ngamɛ ngangga ni, wa 'báná sɛ kɔ gba tũ gɔ. Zi dati, NWA Gale hã zi sape hã owinɔ ngɔ nù Zabuloni, do Nɛftali. Nɛ nde do 'do, nɛ a hã sɛ dɔlɔ li hã owinɔ kɔ lenɔ vɛ̃, yolo tɛ nu gba li Meditɛrane gbaa we hɔ kulu lì Yɔrdanɛ, do wanɔ ngɔ nù Galile, kɛ ogele winɔ wa ɔ ngɔ nɛ ni.