Ezai 7 - WE NU GALE 1995

NWA tumba to hã Ahazɛ

¹ Do 'da fala kɛ Ahazɛ, be 'da Yotamɛ, be yaa Oziasi zi a nwa ngɔ nù Yuda ni, nɛ Rɛsinɛ, nwa ngɔ nu Siri, wa mba ngba wa do nwa ngɔ nù Israɛlɛ kɛ li a a Peka, be 'da Rɛmalia, nɛ wa nɛ we bi le Yeruzalɛmɛ. Nɛ nde wa wè zi we ba le ni gɔ.

² Wa mbisa Ahazɛ, wi nu fɛlɛ Davidi, do owinɔ 'da a na, Osiri wa 'dafa fala ɔi 'da wa tɛ ngɔ nù Israɛlɛ. Nwa Ahazɛ do owinɔ 'da a wa nɛa we zele ni, nɛ kili ba wa, nɛ wa tana ɔ nɛ nwá te tana tɛ bũ ni.

³ Nɛ NWA Gale tɔ̃a hã Ezai na: “Mɔ kúlú ngɔ do bulu be 'da mɔ Searɛ-Yasubɛ, hã nɛ nɛ we zɔ Ahazɛ. Mɔ ba sɛ do li wala nùi 'da Owi fɔlɔ tulu, nɛ mɔ kpa sɛ a tɛ ndɔti nu zã lì kɛ ma yolo si ngɔ.

⁴ Nɛ mɔ tɔ̃ sɛ hã a na: ‘Mɔ kúnú sila mɔ, mɔ tɛ dɛ̀ kili gɔ! Da dɛ kɔ dã 'da Rɛsinɛ wi Siri, do Peka, ma á kili tɛ mɔ gɔ. Wa ɔ nɛ zɛ̃ we nu gbã gua ni iko.

⁵ Mɔ ĩ na, Osiri wa mba ngba wa do Peka, do osoda Israɛlɛ we bi mɔ. Nɛ wa fa na,

⁶ lo ba nù Yuda, nɛ lo a kili tɛ owinɔ na, wa mba ngba wa do lo, sɛ a lo ia be 'da Tabeɛlɛ do nwa ngɔ nù Yuda de.’

⁷ “Nɛ nde mɔ zélé we kɛ NWA Gale tɔ̃a gɛ: ‘Mɛ kɛ wa 'dafa ni, ma dɛ́ sɛ tɛ̃ ɛ fala kpo gɔ.

^8-9 Mba gɔ, Osiri wa ngàndà gɔ. Gã le ngɔ nù Siri, mɛ a Damasi iko, nɛ nwa ngɔ Damasi, wi a Rɛsinɛ iko. Nɛ nde we duzu Israɛlɛ, nɛ ĩ́ na, gã le ngɔ nùi ni, mɛ a Samaria iko, nɛ nwa ngɔ Samaria, wi a Peka iko. Kɔ 'do 'bu sabɛlɛ gazɛlɛ ngɔ nɛ mɔlɔ, nɛ fo sɛ 'bɔ mbé wele ngɔ nùi ni bina.’ Tati a winɔ kɛ wa gbini zã wa do NWA Gale ni, wa fé sɛ gɔ.”

Emanuɛlɛ

¹⁰ NWA Gale tumba 'bɔ toe gɛ hã Ahazɛ na:

¹¹ “Mɔ áká NWA Gale 'da mɔ, hã a dɛ mbe mɔ kpo hã mɔ, takɔ mɔ ĩ na, a do mɔ boe ni. Gɛnɛ kɔ mɛ mɔ nɛ aka nɛ ni ma ɔ tɛ ndɔti le 'da ofionɔ, tabi tɛ li nza i, nɛ a dɛ sɛ ma hã mɔ.”

¹² Nɛ nde Ahazɛ gisa na: “Gɔ, mi áká sɛ mɔ kpo gɔ. Mi kɔ̃̀ we yamba NWA 'da mi gɔ.”

¹³ Nɛ Ezai tɔ̃ hã a na: “Mɔ do nu fɛlɛ mɔ, obe zã Davidi, nɛ zélé mi sɛ. Nɛ ngba owinɔ do'do, nɛ ki ni ma wè li nɛ gɔ, hã nɛ kɔ̃a 'bɔ we ngba Gale nde?

¹⁴ Nɛ ĩ́ na, NWA do tɛ̃ a ngboo, a dɛ sɛ mɔ hã nɛ. Be zɔnga a ba sɛ zã, nɛ a ko bulu be, nɛ a e li a na Emanuɛlɛ, gulu nɛ na: ‘Gale do lɛ boe.’

¹⁵ Wa dala sɛ be ni do lì bele, do nɔ gɔlɔ iko, gbaa na li a sɔ̃, hã a ĩ ti gɔnɔ sanga dia mɔ do 'dã mɔ.

¹⁶ Dati kɛ na li be ni sɔ̃, nɛ nde fo sɛ 'bɔ wele ngɔ nùi 'da Onwanɔ bɔa, kɛ kili wa ba mɔ nɛ ge nde ni bina.

¹⁷ Nɛ NWA Gale a dɛ sɛ na, mɔ do owinɔ 'da mɔ, do obe zã mɔ, nɛ kpa ngamɔ. Ngamɛ nɛ kpa sɛ ni, ma nganda sɛ nɛ ngɔ kɛnɔ vɛ̃ nɛ kpa zi ma, yolo ngba soe kɛ wa gɔnɔ sanga nù Israɛlɛ do nù Yuda ni. Mba gɔ, nwa ngɔ nù Asiri a bi sɛ nɛ.”

Ngamɔ ma te sɛ ngɔ nù Yuda

¹⁸ Do ngba soe ni, nɛ nwa a dama sɛ zaka, nɛ Oezipeto wa yolo sɛ ndũu kɛ zã nu lì Nilɛ i, nɛ wa tɛ ɔ nɛ ozĩ ni. Nɛ Oasiri wa yolo tɛ mɛ 'bɔ ngɔ nùi 'da wa, nɛ wa tɛ ɔ nɛ ogɔlɔ ni.

¹⁹ Wa 'bo sɛ ngba wa kɔ tanɔ, do kɔ kɔ̃nɔ, nɛ wa kpa sɛ do 'dɔ 'denɔ vɛ̃.

²⁰ Do ngba soe ni, nɛ nwa a gba sɛ buluti tɛ kulu lì Efratɛ i, nɛ a kɛlɛ sɛ zu nɛ, do nzɛlɛ nɛ, do sala tɛ̃ nɛ vɛ̃. A lá sɛ sala kpo tɛ nɛ gɔ. Buluti ni, wi a nwa ngɔ nù Asiri.

²¹ Do 'da fala ni, nɛ wele kpo kpo a dala sɛ tati a naa ngɔmbɔ kpo do naa dua bɔa iko.

²² Nɛ lì bele sa'denɔ ni ma tɛ sɛ wena, nɛ wa dɛ sɛ do ma'bɛlɛ, nɛ wele wa nɔ. Nɛ ma'bɛlɛ do nɔ gɔlɔ ma kpa sɛ nu otala winɔ vɛ̃ wa 'bana ngɔ nùi ni.

²³ Do 'da fala ni, gɛnɛ kɔ gã fɔ vinɔnɔ kɛ gole nɛ gã nɛ ge nde ni, nɛ wɔkɔsɔ do te tɛ̃ ma hɛ̃ sɛ kɔ nɛ vɛ̃.

²⁴ Wa yɛnggɛ sɛ kɔ nɛ do nzabele do kpili we fa sa'de. We kɛ nùi vɛ̃ ma kulu sɛ, nɛ wɔkɔsɔ do te tɛ̃ ma kpa sɛ ngɔ nɛ vɛ̃.

²⁵ Nɛ oganggala kalanɔ kɛ wa wa zi fɔnɔ tɛ nɛ ni, wele hɔ́ sɛ 'bɔ i mɔ gɔ, we kɛ ma kulu sɛ, nɛ wɔkɔsɔ do te tɛ̃ ma kpa sɛ ngɔ nɛ vɛ̃. Ma hɔ sɛ fala dala do ongɔmbɔ, do fala yɛnggɛ yali mɔ obata.