Ezai 66 - WE NU GALE 1995

NWA a gɔnɔ sɛ ngbangga 'da owinɔ

¹ NWA Gale tɔ́a na: “Kpongbo nwa 'da mi, mɛ a li nza, nɛ nùi mɛ a mɔ e nyanga mi ngɔ nɛ. Tɔa kɛ nɛ wia sɛ we dɛ ma hã mi ni, ma ɔ sɛ nɛ nde? Nɛ nɛ e sɛ fala ɔmɔ tɛ mi do do nde?

² Mɛnɔ nyanga nza gɛ vɛ̃, mi dɛa ma do kɔ̃ mi wele nɛ, nɛ mɛ a mɔ́ mi. Nɛ nde wi kɛ a hã yangga hã mi, wi a wi kɛ a ba tɛ̃ a dɛ nù, nɛ a kifi sila a, nɛ a yu kili mi ni.

³ “Nɛ kɛ 'da owinɔ wa dɛ mɛnɔ do kɔ sila wa wele nɛ iko ni, mi dɛ yangga wa gɔ. Wa gbɛ wili ngɔmbɔ, nɛ wa gbɛ 'bɔ wele, nɛ wa hã a do dɔnggamɔ. Wa 'bili gɛlɛ bata, nɛ wa gbini 'bɔ gɛlɛ tolo we hã do dɔnggamɔ. Wa hã dɔnggamɔ fũ, nɛ wa hã 'bɔ tɔkɔ tɛ ngulu do dɔnggamɔ. Wa dɔ yɔmbɔ hã mi, nɛ wa dɔnggɔ 'bɔ ogale bɛlɛnɔ. Nɛ dɔnggamɛnɔ kɛ ma dè gɔ ni, ma ɛ̃fɛ̃ tɛ wa wena.

⁴ Ma kɛ mi hã ngamɔ hã wa olo 'dã mɛnɔ 'da wa. Nɛ ngamɛnɔ ni, ma hã sɛ kili hã wa. Mba gɔ, mi sa mɔ hã wa, nɛ nde wele kpo kɔ̃ nu mi gɔ. Mi tɔ̃a mbula hã wa, nɛ wa zèlè gɔ. Wa bɛ̃a we nu mi, nɛ wa dɛa 'dã mɔ kɛ ma dè tɛ mi gɔ ni.”

Ndɔti mɛnɔ kɛ NWA a dɛ sɛ ma ni

⁵ Aa nɛ, owinɔ kɛ nɛ tana kili we lɛnggɛnɔ kɛ nwa tɔ̃ ni, nɛ zélé we kɛ a tɔ̃a gɛ. A na: “Onya nɛ wa bɛ̃a gɛnɛ nɛ, nɛ wa ndaka nɛ sanga wa, we kɛ nɛ kɔ̃a zu li mi ni. Wa mɔmɔ nɛ, nɛ wa tɔ̃ na: ‘E kɔ nwa be dɔ̃lɔ̃ li 'da a hã nɛ, nɛ a kpasa nɛ, takɔ lɛ zɔ yangga 'da nɛ.’ Nɛ nde wa do tɛ wa, wa kpa sɛ sape.

⁶ Nɛ zélé hiamɛ kɛ ma wele kɔ le i ni, nɛ nɛ zélé 'bɔ hiamɛ kɛ ma wele kɔ Tɛmpɛlo i ni. Wi a mi NWA, mi tɛ hã etumbu hã Owi sɛnɛ mi.

⁷ “Le santo 'da mi, ma ɔ nɛ wuko kɛ a ko do'do, sɛ nɛ a ndo kpa zɛlɛ kula de ni.

⁸ Wi kɛ a zila mbe kuti lɛnggɛ ɔ nɛ kɛ gɛ, wi a wio nde? Nɛ wi kɛ a zɔa mbe kuti mɔ ɔ ni, wi a wio nde? Wa dɛa mbe le 'do tũ kpo, nɛ ma e nde? Wa kua mbe onu kɔnggɔ wele 'do tũ kpo, nɛ wa dɛlɛ nde? Nɛ nde ma dɛ sɛ tɛ̃ ɛ na mɛ ni tɛ kɔ le Sioni. Owi Sioni wa hɔ sɛ nza kɔ ngamɛ 'da wa nɛ́, nɛ wa ko ogba dɔa wele fala kpo.

⁹ Linggamɔ zu nɛ tɛ ɔ̃lɔ̃ nɛ na, mi NWA, mi wia we 'dafa na, owinɔ 'da mi wa ko hã wa dɛlɛ, nɛ mi dɛ 'bɔ na, wa tɛ kò do dia nɛ gɔ ni gɔ.” NWA Gale tɔ̃a ni.

¹⁰ Aa nɛ, owinɔ kɛ nɛ kɔ̃a gɛnɛ le Yeruzalɛmɛ ni, nɛ mbá fala nɛ kpo do Owi Yeruzalɛmɛ hã nɛ dɛ́ yangga. Nɛ, owinɔ kɛ nɛ dungu zi gɛla we duzu le Yeruzalɛmɛ ni, nɛ mbá do owinɔ kɔ nɛ ni, hã nɛ dɛ́ yangga.

¹¹ Le Yeruzalɛmɛ ma hã sɛ dia mɔ hã nɛ, nɛ nɛ kpa sɛ ma, nɛ nɛ dɛ yangga, ɔ nɛ kɛ be dɛ yangga nu bele naa a ni.

¹² NWA Gale tɔ̃a na: “Mi hã sɛ dia mɔ wena hã nɛ owi Yeruzalɛmɛ. Kpamɛ 'da onu kɔnggɔnɔ ma fo sɛ dɛ 'da nɛ yɛgbɛgbɛ ɔ nɛ gã lì, kɛ ma dunu kɔ kungba nɛ ni. Mi zɔ sɛ mɔ tɛ nɛ, ɔ nɛ kɛ naa be zɔ do mɔ tɛ be nu bele a ni. A ba a dɛ ngɔ ku a, nɛ a du'bulu a dɛ tɛ̃ a.

¹³ Mi ɔlɔ sɛ nɛ, owi Yeruzalɛmɛ, ɔ nɛ kɛ naa be ɔlɔ a ni.

¹⁴ Nɛ zɔ sɛ ngba soe ni, nɛ sila nɛ sɛ do yangga, nɛ gbãlã te nɛ ma nganda sɛ, ɔ nɛ wɔkɔsɔ kpa ngawi do zɔlɔ lì kolo ni. Nɛ nɛ ĩ sɛ na, mi NWA, mi gbaka owinɔ kɛ wa zele nu mi ni, nɛ mi be dã 'da mi hã owi sɛnɛ mi.”

¹⁵ NWA Gale a tɛ sɛ kɔ nyɛa we, nɛ ongilingilinɔ 'da a ma o sɛ dã ɔ nɛ kolo ni. Nɛ a hã sɛ etumbu hã owinɔ kɛ zã a nɔ̃lɔ̃ dɛ tɛ wa ni.

¹⁶ NWA a 'bili sɛ ngbangga 'da owinɔ vɛ̃ do we, do du kɔya, nɛ fio sɛ wena.

¹⁷ NWA tɔ̃a na: “Owinɔ kɛ wa fɔlɔ tɛ wa na, lo hɔ sa wi, nɛ wa kpe dɛ 'do ngba wa, nɛ wa nɛ kɔ fɔnɔ we dɔnggɔ ogale bɛlɛnɔ, do owanɔ kɛ wa nyɔngɔ ngulu, do zula, do mɔ ndinɔ ni, wa kumu sɛ vɛ̃ fala nɛ kpo.

¹⁸ Mi ĩ ti linggamɔ zu wa, do dɛa to tɛ wa ĩ.” Nɛ NWA tɔ̃a 'bɔ na: “Mi tɛ sɛ, nɛ mi mba sɛ li nu kɔnggɔ owinɔ, do ngɔ gili lɛnggɛnɔ ngɔ nù gɛ vɛ̃, takɔ wa ĩ ti dɔ̃lɔ̃ li 'da mi.

NWA a mba sɛ li owinɔ 'da a

¹⁹ Nɛ mi be sɛ dɛa to nwa 'da mi hã wa. Nɛ owanɔ kɛ wa kpasa sɛ li ngbangga 'da mi ni, mi tombo sɛ wa ndũu dɛ ngɔ nùnɔ 'da Otarsisi, Opulɛ, do Oludɛ kɛ wa ĩ ti da kpili wena ni. Nɛ mi tombo sɛ 'bɔ wa ndũu tɛ kɔ ngolo lì, tɛ 'da Otubalɛ do Ogrɛkɛ, do tɛ falanɔ vɛ̃ kɛ wa zèlè mbe lɛnggɛ 'da mi fala kpo gɔ ni. Nɛ wa be sɛ dɔ̃lɔ̃ li 'da mi hã owinɔ i mɔ ni.

²⁰ 'Do nɛ, nɛ owinɔ ni wa kala sɛ onya nɛ kɛ wa kɔ lenɔ 'da wa ni dɛ ngɔ ombalata, opunda, osamo, tabi dɛ kɔ ongilingili, nɛ wa tɛ sɛ do wa gbaa tɛ ngɔ kala santo tɛ Yeruzalɛmɛ. Wa 'dɔlɔ sɛ wa hã mi ɔ nɛ dɔnggamɛ kɛ nɛ, obe Israɛlɛ, nɛ a dɛ kɔ osaninɔ kɛ ma ɔ sa dati mi, nɛ nɛ hã ma hã mi tɛ kɔ Tɛmpɛloe 'da mi ni.

²¹ Nɛ mi saka sɛ Owele kɔ ogele winɔ ni, nɛ mi a wa do nganga do olevitɛ.”

²² Nɛ NWA tɔ̃a 'bɔ na: “Mi dɛ sɛ na, li nɛ ma 'bana nza fai, nɛ obe zã nɛ, wa ɔ sɛ nɛ mbé nùi do mbé li nza kɛ mi dɛ sɛ ma ni, nɛ wa 'bana sɛ dati mi fai.

²³ Na mɛ ni, do ngba soe ɛngga mbé zɛkɛnɔ vɛ̃, tabi do kɔ̃ tũ ɔmɔ tɛ winɔ vɛ̃, nɛ owinɔ vɛ̃ wa tɛ sɛ we gu nù dati mi, hã wa dɔnggɔ mi.

²⁴ Nɛ wa nɛ sɛ we hɔ nza, nɛ wa zɔ wɔlɔ winɔ kɛ wa dɛa zi nga zu, nɛ wa bɛ̃a we nu mi ni. Odɔkɔnɔ kɛ wa nyɔngɔ sɛ wɔlɔnɔ ni, wa fé sɛ gɔ, nɛ we ma bele sɛ wɔlɔnɔ ni, ma bí sɛ gɔ. Nɛ mɛnɔ ni ma hã sɛ nɛa sila hã owinɔ vɛ̃.”