Ezai 65 - WE NU GALE 1995

NWA a 'bili sɛ ngbangga 'da owinɔ

¹ NWA Gale tɔ̃a na: “Mi 'bɔ zi na, mi gese nu sambala 'da nɛ owinɔ 'da mi, nɛ nde nɛ sàmbàlà mi gɔ. Mi 'bɔ zi na, nɛ sa mɔ hã mi na mi gbaka nɛ, nɛ nde nɛ sà mɔ hã mi gɔ. Mi tɔ̃a zi hã nɛ na: ‘Mi kɛ, mi kɔ̃a we gbaka nɛ,’ nɛ nde nɛ sàmbàlà mi gɔ, nɛ nɛ àkà mɔ kɔ̃ mi gɔ.

² 'Da fala fai, mi kɔ̃a zi we kpɔ kɔ̃ mi 'do nɛ, owinɔ 'da mi, nɛ nde nɛ bɛ̃a we nu mi, nɛ linggamɔ zu nɛ ɔkɔlɔ nɛ, nɛ nɛ ba 'dã wala.

³ Nɛ a Owi kɛ nɛ tulu mi dɛ gbali mi 'da fala fai. Nɛ nɛ kɔ fɔnɔ, nɛ nɛ hã dɔnggamɔ, nɛ nɛ dɔ yɔmbɔ ngɔ gbagala hã ogale bɛlɛnɔ.

⁴ Nɛ do tũi, nɛ nɛ nɛ, nɛ nɛ ɔ kɔ zununɔ tabi kɔ tanɔ, we wele we do obɔzɔnɔ. Nɛ nyɔngɔ ngulu do omɔ ndi.

⁵ Nɛ nɛ tɔ̃ hã owinɔ kɛ nɛ kpa wa ni na, wa 'báná dɛ i mɔ, wa tɛ kɔ̀lɔ̀ do lo gɔ, we kɛ lo santo nɛa ngɔ wa. Mi zɔ na mɛ ni, nɛ ma zɛlɛ mi wena, nɛ ngba soe ni vɛ̃ dã kutu kɔ zɔ̃ mi ɔ nɛ zɛ̃ we ni.

⁶ “Nɛ mi kɔma dɛa to tɛ nɛ do mbɛti, nɛ mi ia dɛ dati mi. Na mɛ ni, mi wé sɛ we dungu iko gɔ gbaa na,

⁷ mi bili nu gbã 'dã mɛnɔ 'da nɛ do oyaa nɛ do'do sɛ nɛ de. Oyaa nɛ wa kũ zi ngɔ okalanɔ i, nɛ wa dɔ yɔmbɔ hã ogale bɛlɛnɔ. Wa wele zi 'dã we hã mi, nɛ wa tulu mi. Na mɛ ni, mi hã sɛ etumbu hã nɛ we kɔ̃ do 'dã mɛnɔ kɛ nɛ do oyaa nɛ, nɛ dɛa zi ni.”

⁸ Nɛ nwa tɔ̃a 'bɔ na: “Wele wè we 'danga dia wala vinɔ mba do 'dã kɛnɔ gɔ. A zɔ, nɛ a tɔ̃ na, lɛ lá ma ni, mba gɔ, lɛ dɛ sɛ ma do dia dɔ̃. Mi dɛ sɛ tɛ mɛ 'bɔ na mɛ ni do owinɔ kɛ wa dɛ olo nu mi ni. Mi la sɛ wa do lɔa tɛ wa.

⁹ Mi wele sɛ nu mi tɛ obe zã Yakɔbɔ, kɛ wa a nu kpala Yuda ni, nɛ obe zã wa sɛ a Owele nù ngɔ kalanɔ 'da mi. Nɛ owinɔ 'da mi, kɛ mi saka wa, nɛ wa dɛ to hã mi ni, wa ɔ sɛ dɛ di ni.

¹⁰ Nɛ wa dɔnggɔ sɛ mi, nɛ wa dala sɛ osa'denɔ 'da wa tɛ li zɔ̃ Saroni, tɛ si 'biti gɛ̃a wese, do kɔ gbangɔlɔ̃ Akɔrɛ, tɛ si 'biti gba wese.

¹¹ “Nɛ nde kɛ 'da nɛ, kɛ nɛ la mi do'do ni, mi dɛ sɛ do nɛ nɛ nde? Ta zu nɛ ila ngɔ li wala Sioni, kala santo 'da mi. Nɛ nɛ dɔnggɔ Gadɛ, kɛ a a gale dia 'dɔkɔlɔ, do Meni, gale ngɔ mɛnɔ kɛ ma dɛ sɛ tɛ̃ ɛ ni. Mi siki sɛ tɛ 'bɔ 'do mi hã nɛ.

¹² Ma hã mi ia nɛ na, nɛ fe fio bolo. Nɛ vɛ̃, nɛ gu sɛ gba zugolo, nɛ wa 'bili sɛ gɛlɛ nɛ. Mba gɔ, mi sa mɔ hã nɛ, nɛ nɛ kɔ̃̀ nu mi gɔ. Mi tɔ̃a mbula hã nɛ, nɛ nɛ zèlè gɔ. Nɛ dɛa 'dã mɔ dati mi, nɛ nɛ kɔ̃a gɛnɛ omɛnɔ kɛ mi sɛnɛ ma ni.

¹³ “Ma hã mi NWA Gale, mi tɔ̃a hã nɛ na: Gba wɔ ma te sɛ kɔ le 'da nɛ, nɛ nde owi dɛa tonɔ 'da mi, wa sɛ do nyɔngɔmɔ wena. Nɛ fe sɛ wɔ lì, nɛ nde owi dɛa tonɔ 'da mi, wa sɛ do lì nɔ nɔa wena. Nɛ kpa sɛ sape, nɛ nde owi dɛa tonɔ 'da mi, wa sɛ do yangga.

¹⁴ Wa sɛ do gɛ̃a sila, nɛ wa zɛ sɛ nu wa do yangga. Nɛ nɛ, nɛ mbɔkɔ sɛ, nɛ nɛ he sɛ hiamɔ zɛlɛ tɛ do ala nu.

¹⁵ Nɛ owinɔ kɛ mi saka wa ni, wa fɔmbɔ sɛ ogele winɔ do li nɛ na: ‘NWA Gale gbɛ́ nɛ ɔ nɛ kɛ a gbɛa zi do mbe gele winɔ dati ni.’ Nɛ mi sa sɛ gele li kpi zu owi dɛa tonɔ 'da mi.

¹⁶ Wi kɛ a kɔ̃ sɛ na, wa wele nu wa tɛ̃ a ni, nɛ wa wele sɛ nu wa tɛ̃ a do zu li mi ngbongbo Gale zu mi kpo. Wi kɛ a kɔ̃ we zonggo tɛ̃ a, nɛ a zonggo sɛ tɛ̃ a do zu li mi ngbongbo Gale zu mi kpo.” NWA Gale tɔ̃a na: “Ngamɛnɔ zi ni ma Sɔkpɔ sɛ, nɛ ta zu mi ma ele sɛ ngɔ nɛ.

Mbe mɛnɔ kɛ NWA a dɛ sɛ ma ni

¹⁷ Mba gɔ, mi dɛ sɛ mbé li nza do mbé nù. Nɛ ta zu winɔ ma ele sɛ ngɔ kɛnɔ zi dati ni vɛ̃, nɛ wa lénggé sɛ 'bɔ do ma gɔ.

¹⁸ Nɛ dúngú do yangga 'da fala fai we duzu mɛnɔ kɛ mi dɛ sɛ ma ni. Mbé le Yeruzalɛmɛ kɛ mi dɛ sɛ ma ni, mɛ sɛ a le yangga, nɛ owi kɔ nɛ wa sɛ do yangga wena.

¹⁹ Nɛ mi sɛ tɛ mɛ 'bɔ do yangga wena we duzu le Yeruzalɛmɛ do Owi kɔ nɛ. Wa zélé sɛ 'bɔ hia kɔ̃a do wila we ala nu kɔ le ni gɔ.

²⁰ Nzɔ be fé sɛ 'bɔ fio kɔ le ni gɔ, nɛ Owi kɔ nɛ vɛ̃, wa dɛ sɛ kpasa wi, nɛ wa ɔ sɛ kɔ dungu nza 'da wa wena. Mba gɔ, wi kɛ a ɔ sabɛlɛ kama kpo, nɛ a 'bana sɛ ngɔ nga tɛ̃ a. Kɔ wele fe dati hã sabɛlɛ kama kpo, nɛ nde a kpa fɔmba.

^21-22 “Owinɔ 'da mi wa dɛ tɔa, nɛ wa do tɛ wa ngboo wa ɔ sɛ kɔ nɛ, nɛ nde wi ɔ̃ sɛ kɔ tɔa ni a ogele wele gɔ. Owinɔ 'da mi wa mi vinɔ, nɛ wa nɔ sɛ dɔ̃ nɛ, nɛ nde gele wele a nɔ́ sɛ dɔ́ nɛ gɔ. Owinɔ 'da mi wa ɔ sɛ ngɔ nù gɛ, nɛ tũ kɔ wa ma dɔ sɛ ɔ nɛ kɛ tenɔ ma ɔ ni. Nɛ wa kpa sɛ mɔ olo dɛa tonɔ 'da wa, nɛ wa dɛ sɛ yangga we ma.

²³ “Wa zɔ́ sɛ ngamɔ tɛ li dɛa to yala iko gɔ, nɛ wa ko sɛ obe zã wa, nɛ wa nɛ ngɔ. Nɛ mi wele sɛ nu mi tɛ wa do obe zã wa 'da fala fai.

²⁴ Mi gese sɛ nu sa mɛ 'da wa dati kɛ na wa sa mɔ hã mi ni, nɛ mi zele sɛ gulu we 'da wa dati, nɛ nde wa tɔ̃́ sɛ ma gbaa we hɔ ndɔti nɛ sɛ nɛ de gɔ.

²⁵ Ogbokologboe do obe bata wa nyɔngɔ sɛ wɔkɔsɔ fala nɛ kpo, nɛ gbɔgbɔ a nyɔngɔ sɛ wɔkɔsɔ ɔ nɛ ngɔmbɔ ni, nɛ gɔ̃̀ a nyɔngɔ sɛ nù iko, a gbɛ́ sɛ 'bɔ wele gɔ. Tɛ ngɔ kala santo 'da mi vɛ̃, wa dɛ́ sɛ 'bɔ 'dã mɔ gɔ, nɛ wa 'dángá sɛ 'bɔ mɔ i mɔ gɔ.”