Ezai 64 - WE NU GALE 1995

¹ Aa NWA, mɔ zĩlĩ ɔ nɛ nyɛa we kɛ ma bɛlɛ wɔkɔsɔ, tabi kɛ wa e lì li nɛ, nɛ ma anga ni. Nɛ ogele winɔ wa zɔ sɛ ma, nɛ wa tana sɛ kili dati mɔ. Na mɛ ni, nɛ mɔ be sɛ hã owi sɛnɛ mɔ na, mɔ a ngbongbo Gale ngboo.

² Mɔ zĩlĩ, hã mɔ dɛ mɔ kili, nɛ mɔ gbanga do lɛ, nɛ kalanɔ ma tana sɛ kili dati mɔ.

³ Wele zèlè mbe kuti lɛnggɛ mɔ gale ɔ nɛ mɔ gɛ gɔ. Nɛ gele gale dɛ̀ mbe mɛnɔ kɛ mɔ dɛa gɛ hã wele zɔ ma gɔ. Fala kɛ wele gbini zã a do mɔ, nɛ mɔ dɛ mɔ we a.

⁴ Wi kɛ a dɛ mɔ kɛ zã mɔ kɔ̃a ni, kɔ a dɛ ma do yangga, nɛ mɔ kɔ̃ gɛnɛ a. Nɛ wi kɛ ta zu a gba ngɔ mɔ, kɔ a yɛnggɛ do li wala 'da mɔ, nɛ mɔ kpɔ kɔ̃ mɔ ti a. Nɛ nde zã mɔ nɔ̃lã dɛ tɛ lɛ, we kɛ lɛ yɔa wala 'da mɔ. Lɛ bá sɔ do li wala 'da mɔ ɔ nɛ kɛ zi dati ni, nɛ mɔ kpasa sɔ lɛ.

⁵ Lɛ vɛ̃ a Owi dɛ 'dã mɔ dati mɔ, lɛ ɔ li mɔ nɛ mɔ ndi ni. Mɛnɔ vɛ̃ kɛ lɛ dɛ ma ni, ma 'danga ɔ nɛ tulu kɛ ma tia 'dɔ tɔkɔ ni. O'dã mɛnɔ 'da lɛ ma kala lɛ, nɛ ma pɛsɛ lɛ, ɔ nɛ kɛ bũ pɛsɛ do kula nwá ni.

⁶ Wele wè tɛ kunu sila a gɔ, wele wè tɛ yolo nù dati mɔ we tɔ̃ we hã mɔ gɔ. Mba gɔ, mɔ kɔ̃̀ we zɔ lɛ gɔ, nɛ mɔ 'dɔlɔ lɛ we 'dã mɛnɔ 'da lɛ.

⁷ Nɛ nde mɔ NWA, mɔ a baa lɛ. Lɛ ɔ nɛ gili, nɛ mɔ ɔ nɛ wi 'bo kpana ni. Wi a mɔ hã mɔ 'bua lɛ vɛ̃.

⁸ Aa NWA, mɔ tɛ lènggè do 'dã mɛnɔ 'da lɛ fai gɔ, dɔ sila mɔ nɔ̃lɔ̃ dɛ tɛ lɛ la li gɔ. Ta zu mɔ tɛ èlè na, lɛ vɛ̃ a winɔ 'da mɔ ni gɔ.

⁹ Ole santonɔ 'da mɔ ma kifi olo tɔa, Yeruzalɛmɛ, gã le santo 'da mɔ kulu vɛ̃. Owele wa 'danga ma, nɛ fo 'bɔ wi ɔ kɔ nɛ bina.

¹⁰ Nɛ dia tɔa Tɛmpɛloe 'da mɔ kɛ ma santo, kɛ oyaa lɛ wa dɔnggɔ zi mɔ kɔ nɛ ni, wa dɔa ma do'do. Nɛ falanɔ kɛ lɛ kɔ̃a zi gɛnɛ ma wena ni, ma 'danga vɛ̃.

¹¹ Aa NWA, mɛnɔ vɛ̃ kɛ ma 'danga ni, ma wè tɛ tɔ̃ we hã mɔ gɔ nde? Mɔ dɛ́ sɛ mɔ gɔ gbaa na, lɛ kpa sape la li ngele nde?