Ezai 63 - WE NU GALE 1995

NWA si ku'da ngamɛ 'da owinɔ 'da a

¹ Wi kɛ a yula ngɔ nù Edɔmɛ, tɛ kɔ gã le Bɔsra, hã a tɛ tɛ ma ni a wio nde? Wi ni a hi'da du tulu, ma a fila. A ba zu a ngɔ, kɔ a la do ngawi vɛ̃. A a wio nde? Nɛ NWA Gale na: “Wi a mi NWA. Mi tɛa do ngawi 'da mi we 'bili ngbangga do bɔlɔ nɛ. Mi tɛa we bi bolo ngɔ owinɔ 'da mi na, mi kpasa wa.”

² Nɛ wa aka a na: “Kɔ gulu kɛ tulu 'da mɔ fila ɔ nɛ tulu tɛ wi ma wala te vinɔ, we dɛ do dɔ́ ni we ge nde?”

³ Nɛ NWA gese na: “Mi ma ogele nu kɔnggɔnɔ ɔ nɛ kɛ wa ma do wala te vinɔ ni, nɛ wele kpo tɛ̀ we gbaka mi gɔ. Mi ma wa do dã, nɛ tɔkɔ tɛ wa 'danga tulu 'da mi vɛ̃.

⁴ Mi 'bili zi na, sɔɛ gɛ mɛ a kɔ tũ kpasa owinɔ 'da mi, do hã etumbu hã Owi sɛnɛ wa.

⁵ Mi fa wi gbaka mi do li mi zãa, nɛ mi zɔ́ wele kpo gɔ. Nɛ mi zu mi kpo mi bi do owi sɛnɛ mi, nɛ mi nɛ ngɔ wa.

⁶ Zã mi ma nɔ̃lã, nɛ mi 'bili sanga ogele nu kɔnggɔnɔ, nɛ tɔkɔ tɛ wa ma si nù. Mi ia bila dã 'da mi nu wa, nɛ ma zĩ zu wa.”

Dia zã 'da NWA we obe Israɛlɛ

⁷ Mi nɛ tɔ̃ lɛnggɛ dia zã 'da NWA. Mi dɔnggɔ NWA we duzu dia mɛnɔ vɛ̃ kɛ a dɛa ma we lɛ ni. A bia dia zã 'da a hã lɛ, obe Israɛlɛ, a wila nu a tɛ lɛ, nɛ a do kɔ̃a zã we lɛ.

⁸ NWA tɔ̃a na: “Obe Israɛlɛ wa a owinɔ 'da mi. Wa a obenɔ 'da mi, wa ɔ́lɔ́ sɛ mi gɔ.” Nɛ nwa kpasa zi wa tɛ kɔ ngamɔ.

⁹ Wi kpàsà zi wa, wi a anzɛ gɔ, nɛ nde wi kpasa zi wa, wi a NWA do tɛ̃ a ngboo. A ĩ 'bako hã wa, nɛ a yula 'do wa do dia zã 'da a, nɛ a tɛ zɔ mɔ tɛ wa 'da fala fai.

¹⁰ Nɛ nde wa bɛ̃a gɛnɛ NWA, nɛ wa 'danga sila Hi Wi 'da a kɛ ma santo. We duzu ma, a hɔa wi sɛnɛ wa, nɛ a bi wa.

¹¹ Nɛ ta zu obe Israɛlɛ gba ngɔ mɛnɔ kɛ ma dɛa zi tɛ̃ ɛ, do 'da fala 'da Mɔizɛ, wi dɛa toe 'da nwa ni. Nɛ wa aka na: “NWA Gale kɛ a hã zi hi wi 'da a hã Mɔizɛ ni, a a do nde? NWA kɛ a dɛa zi na, owinɔ 'da a do wi zɔ mɔ tɛ wa, wa la do 'dɔ gba lì ni, a a do nde?

¹² A yula zi 'do Mɔizɛ, nɛ a bia kɔ̃ a kɛ ma do ngawi wena dɛ ngɔ gba lì, nɛ ma kɛ̃a sanga tɛ ngbɛ ɛ bɔa dati owinɔ 'da a. Ma kɛ a kpa dɔ̃lɔ̃ li kɛ ma é gɔ ni.

¹³ A kpia dati owinɔ 'da a, nɛ a la do wa do 'dɔ gba lì ɔ nɛ kɛ mbalata la do ngɔ nù ni, nɛ wa tè gɔ.

¹⁴ NWA kã owinɔ 'da a na, wa kpa dia dungu ɔ nɛ kɛ wi dala ngɔmbɔ kã wa dɛ tɛ fala dia wɔkɔsɔ ni.” NWA kã zi owinɔ 'da a na mɛ ni, nɛ ma hã dɔ̃lɔ̃ li hã a.

Obe Israɛlɛ wa ala nu wa hã Gale

¹⁵ Aa NWA, mɔ yóló li nza i hã mɔ ka mɔ sɛ. Mɔ dúngú kɔ tɔa dɔ̃lɔ̃ li 'da mɔ, kɛ ma santo ni hã mɔ zɔ mɛnɔ kɛ ma dɛ lɛ gɛ. Ngawi 'da mɔ ma nɛa do nde? Nɛ gã kɔ̃a zã 'da mɔ we lɛ, ma a do nde? NWA, mɔ ĩ́ 'bako hã lɛ, kɔ mɔ tɛ èlè lɛ gɔ,

¹⁶ we kɛ mɔ a baa lɛ. Oyaa lɛ, Abrahama do Yakɔbɔ wa ĩ̀ ti lɛ gɔ, nɛ ta zu wa 'bɔ ngɔ lɛ bina. Nɛ nde mɔ NWA, mɔ a baa lɛ, mɔ a wi kpasa lɛ 'da fala fai.

¹⁷ Aa NWA, gulu kɛ mɔ la lɛ, nɛ lɛ bɛ̃ we nu mɔ, nɛ lɛ yɔ wala 'da mɔ fai we ge nde? Mɔ kpóló tɛ mɔ 'da lɛ, owi dɛa tonɔ 'da mɔ, we kɛ lɛ a owinɔ 'da mɔ 'da fala fai.

¹⁸ Lɛ, owinɔ 'da mɔ kɛ lɛ santo, owi sɛnɛ lɛ wa nɛa ngɔ lɛ, nɛ wa ndaka lɛ kɔ le 'da lɛ, nɛ wa 'danga fala santo 'da mɔ.

¹⁹ 'Do nɛ nyɛlɛ wena, mɔ dɛ mɔ do lɛ ɔ nɛ kɛ mɔ a nwa ngɔ lɛ gɔ ni, nɛ lɛ ɔ́ nɛ kɛ lɛ a owinɔ 'da mɔ gɔ ni. Aa NWA, e kɔ mɔ gba sanga li nza hã mɔ zĩlĩ, nɛ okalanɔ ma tana sɛ kili dati mɔ.