Ezai 62 - WE NU GALE 1995

Yeruzalɛmɛ ma hɔ sɛ mbé le

¹ Mi zɛ sɛ nu mi nganda wena we hã ngawi hã nɛ, owi Yeruzalɛmɛ. Mi kpé sɛ nu mi gɔ gbaa na, Gale kpasa nɛ sɛ nɛ de. Nɛ kpasi 'da nɛ ma to sɛ ɔ nɛ nu sala soe ni.

² Ogele winɔ wa zɔ sɛ tɛlɛ tɛ kɛ NWA kpasa do nɛ ni, nɛ onwanɔ 'da wa, wa zɔ sɛ dɔ̃lɔ̃ li 'da nɛ. Wa sa sɛ mbé li zu nɛ, mbé li ni, wi kɛ a e sɛ ma zu nɛ, wi a NWA Gale do tɛ̃ a ngboo.

³ Le Yeruzalɛmɛ ma ɔ sɛ nɛ dia ndasa nwa, kɛ Gale dɛa ma ni.

⁴ Wa sá sɛ 'bɔ li le ni na “Olo tɔa” gɔ, nɛ wa sá sɛ li nùi 'da nɛ na “Nùi kɛ wa 'danga ma” gɔ. Nɛ nde wa e sɛ mbé li zu ma na, “Le kɛ ma hã yangga hã nwa”, nɛ wa sa li nùi 'da nɛ na, “Wuko ba wili.” Mba gɔ, NWA sɛ do yangga we duzu nɛ, owinɔ 'da a, nɛ nùi 'da nɛ ɔ́ sɛ 'bɔ nɛ wi fio wili gɔ, nɛ nde NWA a ɔ sɛ nɛ wili nɛ ngboo ni.

⁵ NWA, kɛ a dɛa nɛ ni, a ba sɛ nɛ do kɛnɛ a ɔ nɛ kɛ be zagbãlã ba do be zɔnga ni. Nɛ nɛ hã sɛ yangga hã a wena ɔ nɛ kɛ wuko kɔ wili a hã yangga hã wili a ni.

⁶ Mi a sɛ owele tɛ ngɔ ngbo nu le Yeruzalɛmɛ na, wa zɔ mɔ tɛ nɛ. Nɛ ma wè na, owinɔ ni wa kpe nu wa gɔ. Tũ tabi gba wese, wa gba sɛ ta zu nwa ngɔ mbuli kɛ a kpua zi ni na, da dɛ kɔ ta zu a élé ngɔ ma gɔ.

⁷ Owinɔ ni wa lá sɛ NWA iko gɔ gbaa na, a 'dafa le Yeruzalɛmɛ dɛ olo nɛ, kɔ owinɔ ngɔ nù gɛ vɛ̃, wa dɔnggɔ ma sɛ nɛ de.

⁸ NWA kpua mbulu hã owinɔ 'da a, nɛ do ngawi 'da a, a dɛ sɛ mbuli kɛ a kpua ma ni. A na: “Aa nɛ, owinɔ 'da mi, mi lá sɛ 'bɔ owi sɛnɛ nɛ na, wa nyɔngɔ Okpalɛnɔ kɛ nɛ mi ma ni gɔ. Nɛ ogele wi wa nɔ́ sɛ 'bɔ dɔnɔ kɛ nɛ dɛ ma ni gɔ.

⁹ Nɛ nde tati a nɛ, kɛ nɛ mi kpalɛnɔ ni, nɛ nyɔngɔ sɛ ma, nɛ nɛ dɔnggɔ sɛ mi NWA. Tati a nɛ, nɛ kala sɛ vinɔnɔ 'da nɛ, nɛ nɛ dɛ sɛ dɔ́ nɛ, nɛ nɛ nɔ sɛ ma tɛ li fanda tɔa Tɛmpɛloe 'da mi NWA.”

¹⁰ Aa nɛ, owi Yeruzalɛmɛ, nɛ hɔ́ nza, kɔ nɛ 'dáfá li wala na, owinɔ 'da nɛ wa si do ma. Nɛ kpé kɔ̃nɔ, nɛ nɛ a ta li walanɔ. Nɛ nɛ zĩ bɛndɛlɛ na, ogele winɔ wa zɔ ma.

¹¹ NWA a e sɛ mbula 'da a, nɛ ma kpa sɛ ngɔ nù gɛ vɛ̃. Nɛ tɔ̃ hã Owi Yeruzalɛmɛ na: “Wi kpasa nɛ, a tɛ tɛ nɛ, a si sɛ do owinɔ kɛ a kpasa wa ni.”

¹² Owinɔ ni, wa mba sɛ do nɛ, nɛ wa sa sɛ li nɛ do wa na, “Owinɔ 'da Gale, kɛ wa santo,” “Wanɔ kɛ Gale kpasa wa ni.” Wa sá sɛ 'bɔ li Yeruzalɛmɛ na, “Olo tɔa” gɔ, nɛ nde wa sa sɛ li nɛ na, “Le kɛ Gale kɔ̃a gɛnɛ nɛ.”