Ezai 61 - WE NU GALE 1995

Dɛa to 'da wi nɛ toe 'da NWA

¹ Hi Wi 'da NWA Gale ngɔ mi boe. NWA saka mi, nɛ a tombo mi na, mi nɛ, hã mi be dia sakoe hã owi sãnɔ, nɛ mi nganda sila owinɔ kɛ wa mbɔka ni, nɛ mi tɔ̃ hã owi kɔlɔ 'dulinɔ na, wa hɔa nza kɔ ngbá ia, nɛ mi fo owi bɔlɔkɔnɔ dɛ nza.

² Nɛ a tombo 'bɔ mi we be hã owinɔ 'da a na, ngba soe kpasa wa ma wia, nɛ a bili sɛ nu gbã hã owi sɛnɛ wa. Nɛ a na, mi hã ngawi hã owinɔ kɛ wa kpa 'bakoe ni,

³ nɛ mi hã yangga hã owi Sioni kɛ wa tɛ dungu gɛla ni. Mi kifi 'bakoe 'da wa do yangga, nɛ mi kifi 'bɔ zuma ala nui 'da wa do zuma dɔnggɔ NWA. Mi kpolo sɛ tulu gɛla 'da wa do tulu ɛngga. Wa ɔ sɛ nɛ odia te kɛ NWA do tɛ̃ a ngboo a mi ma ni. Wa dɛ sɛ mɔ vɛ̃ do bɔlɔ nɛ, nɛ wa hã sɛ dɔ̃lɔ̃ li hã NWA.

⁴ Wa 'dafa sɛ le 'da wa kɛ ma 'danga zi belee ni, nɛ wa dɛ sɛ tɔa 'da wa kɛ ma gbɛsa zi ni dɛ olo nɛ.

⁵ Aa nɛ, owinɔ 'da mi, ogele winɔ wa dɛ sɛ to hã nɛ. Wa zɔ sɛ mɔ tɛ osa'denɔ 'da nɛ, wa wa sɛ ofɔ, nɛ wa mi vinɔ hã nɛ.

⁶ Nɛ owinɔ wa sa sɛ li nɛ na: “Nganganɔ 'da NWA, owi dɛa tonɔ 'da Gale 'da lɛ.” Nɛ nɛ dɛ sɛ yangga kpamɛnɔ 'da ogele winɔ, nɛ nɛ dɔnggɔ sɛ tɛ nɛ we ma.

⁷ Zi dati, wa dã zi nɛ do dɛla, nɛ nɛ kpa zi sape wena, nɛ nde sape ni ma sɔkpa ia. Nɛ si sɛ dɛ ngɔ nùi 'da nɛ ngboo, nɛ kpamɛnɔ 'da nɛ ma gã sɛ dɛ dati fala bɔa. Nɛ nɛ sɛ do yangga 'da fala fai.

⁸ NWA Gale tɔ̃a na: “Mi kɔ̃a gɛnɛ bɔlɔ zu dɛa mɔ, nɛ mi bɛ̃a gɛnɛ ngatɛ do dɛ 'dã mɔ. Aa nɛ, owinɔ 'da mi, mi hã sɛ dia mɔ hã nɛ, nɛ mi gba sɛ tɔkɔ do nɛ, nɛ ma 'bana sɛ fai.

⁹ Ogele winɔ vɛ̃ wa ĩ sɛ ti obe zã nɛ. Winɔ vɛ̃ kɛ wa zɔ sɛ wa ni, wa ĩ sɛ na obe zã nɛ, wa a Owi kɛ mi NWA, mi wila nu mi tɛ wa.”

Owi Yeruzalɛmɛ wa hã iɔ̃nae hã NWA

¹⁰ Owi Yeruzalɛmɛ wa tɔ̃a na: Lɛ dɛ yangga we mɛnɔ kɛ NWA dɛa ma gɛ. A tɛa we gbaka lɛ, nɛ a kpasa lɛ kɔ ngamɔ. Nɛ yangga 'da lɛ gã wena ɔ nɛ kɛ 'da winɔ kɛ wa hi'da dia tulu do 'da fala mɔ dɔ ba ngba wi ni.

¹¹ Ɔ nɛ kɛ wa mi wala te, nɛ ma hɔ, nɛ ma gã ni, NWA Gale a dɛ sɛ tɛ mɛ 'bɔ na dia dungu 'da lɛ ma gã. Nɛ lɛ dɔnggɔ a dɛ gbali ogele winɔ vɛ̃.