Ezai 6 - WE NU GALE 1995

Gale ia Ezai do wi gba olo nu a

¹ Nwa Oziasi fia, nɛ do kpo kɔ̃ sabɛlɛ ni, nɛ mi zɔa NWA Gale, nɛ nde a dungu ngɔ kpongbo nwa. Ma ngala dɛ ngɔ wena, nɛ nyanga du tuli tɛ̃ a ni kpa do kɔ Tɛmpɛloe vɛ̃.

² Nɛ oanzɛ wa nyɛ nɛ we ni, wa yolo dɛ 'do a. Anzɛ kpo kpo do 'baka a gazɛlɛ: mbe 'baka a bɔa, a kele ma do li a, nɛ mbee nɛ bɔa, a kele do tɛ̃ a, nɛ tala kɛnɔ bɔa ni, a bũlũ do ma.

³ Nɛ oanzɛnɔ ni wa he mɔ hã ngba wa na: “Santo, santo, santo! NWA ngɔ mɔ nyanga nza vɛ̃ a santo! Dɔ̃lɔ̃ li 'da a ma kpa ngɔ nù gɛ vɛ̃.”

⁴ Nɛ giti gɛlɛ wa ma yaka zi gbangga nu tɔanɔ, nɛ zɛ̃ we dunu kɔ Tɛmpɛloe.

⁵ Mi nɛa we zɔ ni, nɛ mi tɔ̃ na: “'Bako do mi! Mi kpásá sɛ gɔ, we kɛ lɛnggɛ kɔ nu mi ba ndi wena, nɛ mi ɔ kɔ owinɔ kɛ lɛnggɛ nu wa ba 'bɔ ndi wena. Nɛ nde gbali mi zɔa NWA Gale ngɔ mɔ nyanga nza vɛ̃.”

⁶ Nɛ mbe kpo kɔ oanzɛnɔ bũlũ dɛ 'da mi nga, nɛ a ba be sa'ba dɛ kɔ a, nɛ nde a 'bɔmɔ do mbe kalĩ wenɔ ngɔ gbagala i ni.

⁷ Nɛ a dĩ ma tɛ nu mi, nɛ a na: “NWA fua 'dã mɛ 'da mɔ, nɛ fo 'bɔ ku'da 'dã mɔ zu mɔ bina, we kɛ mɛ gɛ dĩ tɛ nu mɔ ni.”

⁸ 'Do nɛ, nɛ mi zila gɛlɛ NWA tɛ aka na: “Wi kɛ mi nɛ tombo a a wio nde? Wi nɛ nɛ we tɔ̃ toe 'da mi a wio nde?” Nɛ mi gisa na: “Wi a mi. Mɔ tómbó mi!”

⁹ Nɛ a tɔ̃ hã mi na, mi nɛ́ hã mi tɔ̃ toe gɛ hã owinɔ na: “Gɛnɛ kɔ nɛ gɛ zala nɛ gbaa, nɛ nde nɛ zélé sɛ mɔ kpo gɔ. Gɛnɛ kɔ nɛ 'du li nɛ gbaa, nɛ nde nɛ zɔ́ sɛ mɔ gɔ.”

¹⁰ Nɛ a tɔ̃ 'bɔ hã mi na: “Mɔ bí gbãlã zã wa, da dɛ kɔ wa ĩ́ ti gulu nɛ gɔ. Nɛ mɔ dɛ na zala wa la, da dɛ kɔ wa zélé we gɔ. Nɛ li wa 'danga, da dɛ kɔ wa zɔ́ mɔ gɔ. Ní gɔ, nɛ wa kifi sɛ sila wa, nɛ wa kpasa sɛ.”

¹¹ Nɛ mi aka na: “NWA, mi tɔ̃ sɛ toe ni gbaa soe ki nge nde?” Nɛ a na: “Mɔ tɔ̃ sɛ ni gbaa, we hɔ ngba soe kɛ lenɔ ma 'danga sɛ, nɛ owinɔ wa yu sɛ kɔ tɔanɔ 'da wa do'do, nɛ zamɛnɔ ma hɔ sɛ li go ni.”

¹² Mɛ a gbãlã we, NWA a 'dɔlɔ sɛ winɔ nyɛlɛ do le 'da wa, nɛ nùi olo wa ni ma kulu sɛ.

¹³ Gɛnɛ kɔ wele kpo sanga Owele 'bu 'bana dɛ di ni, nɛ a fe sɛ. Owinɔ ngɔ nùi ni wa ɔ sɛ nɛ te sɛnɛ kɛ wa gɔmɔ, nɛ wa la tati a zugbulu nɛ iko ni. Nɛ nde mbé bɔlɔ te kɛ ma santo, ma kunu sɛ tɛ zugbulu te ni.