Ezai 59 - WE NU GALE 1995

'Dã mɛ 'da owinɔ ma kɛ̃a sanga wa do Gale

¹ Aa nɛ, obe Israɛlɛ, nɛ tɛ lènggè na, NWA do ngawi we gala nɛ bina gɔ. Nɛ tɛ lènggè 'bɔ na, zala a la la, kɔ a zélé sa mɛ 'da nɛ gɔ ni gɔ.

² Mba gɔ, mɛ a 'dã mɛnɔ 'da nɛ hã ma kɛ̃a sanga nɛ do Gale 'da nɛ, nɛ ma dɛa na, a tɛ zèlè sa mɛ 'da nɛ gɔ.

³ Nɛ a owi gbɛ wi, owi 'bili bɛlɛ, Owi tɔ̃ ngalangba.

⁴ Nɛ kulu ngɔ, nɛ nɛ nɛ 'da owi 'bili wenɔ, nɛ nɛ kũ we dɛ tɛ ongba nɛ, nɛ nɛ da wa do bɛlɛ. Nɛ handa ongba nɛ, we dɛ wa do 'dã mɔ, nɛ nɛ dɛ mɛ nɛ handa ni do wa.

^5-6 Owenɔ kɛ nɛ 'dafa dɛ kɔ zã nɛ we dɛ ma ni, ma 'danga ɔ nɛ kuli dã gɔ̃ ni. Fala kɛ kuli ni o, nɛ dã gɔ̃ hɔ kɔ nɛ, nɛ a gbɛ wele. Mɛnɔ kɛ nɛ 'dafa we dɛ ma ni, ma dɛ́ de mɔ hã nɛ gɔ. Ma ɔ nɛ tulu kɛ wa dɛa ma do yaka to ni, wa wè tɛ he'de ma gɔ.

⁷ Nɛ fa fai we dɛ 'dã mɔ. Nɛ nɛ tɔ̃ tɛ wi kɛ a do 'dã mɔ bina ni, nɛ nɛ fa we gbɛ a. Nɛ lengge fai we zɛlɛ tɛ ongba nɛ. Kɔ yali 'da nɛ, nɛ dɛ mɔ do mbana, nɛ nɛ 'danga mɛnɔ vɛ̃.

⁸ Nɛ hɔ ia, nɛ nde fo 'bɔ gɛ̃a dungu bina. Nɛ dɛ́ mɔ do bɔlɔ nɛ gɔ, nɛ ba fai do sa'ba wala. Wele wè tɛ ba wala 'da nɛ, nɛ a kpa dungu fio gɔ.

Owinɔ 'da Gale wa gbala 'dã mɛ 'da wa

⁹ Owinɔ 'da Gale wa tɔ̃a na: “Da dɔ̃ gɛ, lɛ ĩ gulu kɛ Gale kpásá lɛ li ngamɔ ti kɔ̃ Owi zɛlɛ tɛ lɛ gɔɛ ni ia. Lɛ gbini zi zã lɛ na, lɛ yɛnggɛ sɛ tɛ sa fala, nɛ nde tati a gba tũ hã ma kpia lɛ iko.

¹⁰ Lɛ tamba mɔ tu tu ɔ nɛ wi lɔa li ni. Gɛnɛ kɔ do gbo gba wese, nɛ lɛ zɔlɔ, nɛ lɛ te ɔ nɛ wi kɛ a yɛnggɛ kɔ gba tũ ni. Gɛnɛ kɔ lɛ do zɛlɛ bina, nɛ nde lɛ ɔ nɛ fio iko ni.

¹¹ Lɛ gbini zã lɛ do Gale na, a kpasa sɛ lɛ kɔ ngamɛnɔ kɛ lɛ kpa ma ni, nɛ nde a kpàsà lɛ gɔ. Nɛ sila lɛ fé gɔ, nɛ lɛ ala nu lɛ.

¹² “Aa NWA Gale, lɛ dɛa 'dã mɔ wena dati mɔ. Nɛ o'dã mɛnɔ ni vɛ̃, ma nãlã dɛ tɛ lɛ, nɛ ma da lɛ hã mɔ, nɛ lɛ ĩ we nɛ vɛ̃ de wena.

¹³ Lɛ kɔ̃̀ zi we zele nu mɔ gɔ, lɛ bɛ̃a gɛnɛ mɔ, nɛ lɛ siki 'do lɛ hã mɔ. Lɛ tɔ̃ tati a bɛlɛ, nɛ lɛ lengge tati a we dɛ 'dã mɔ, do zɛlɛ tɛ ngba lɛ iko.

¹⁴ Lɛ bɛ̃a gɛnɛ dɛ bɔlɔ zu dɛa mɔ, nɛ lɛ kɔ̃̀ we zele bɔlɔ lɛnggɛ gɔ. Lɛ do dia kɔ sila bina, nɛ lɛ dɛ́ mɔ do wala olo nɛ gɔ.

¹⁵ Fo wi dɛ dia mɔ 'bɔ bina. Wi kɛ a bɛ̃ gɛnɛ dɛ 'dã mɔ ni, nɛ wa fa we fi a kɔ ngamɔ.” NWA zɔa mɛnɔ vɛ̃ kɛ ma dɛ tɛ̃ ɛ ni, nɛ nde ma dè tɛ̃ a gɔ. Mba gɔ, fo wi dɛ bɔlɔ zu dɛa mɔ bina.

NWA 'dafa na a kpasa owinɔ 'da a

¹⁶ Nɛ a ɔngbɔ do zɔ na, wa hã zɛlɛ tɛ hã wele, nɛ nde fo wi gala a bina ni. Na mɛ ni, a 'bili na, a do tɛ̃ a, a hã ngawi hã owinɔ kɛ wa kpa zɛlɛ tɛ ni, nɛ a kpasa wa do bɔlɔ zui 'da a.

¹⁷ Omɔ bi bolonɔ 'da a, mɛ a bɔlɔ zu dɛa mɛ, do kpasi a hã ma ni. Nɛ tulu tɛ̃ a, mɛ a kɔ̃a zã 'da a kɛ a kɔ̃a we bili do nu gbã hã owanɔ kɛ wa dɛa 'dã mɔ do owinɔ 'da a ni.

¹⁸ Wele kpo kpo a kpa sɛ etumbu we kɔ̃ do 'dã mɛnɔ kɛ a dɛa ni. Gɛnɛ kɔ owinɔ kɛ nùi 'da wa nyɛlɛ wena ni, nɛ wa kpa sɛ 'bɔ etumbu we kɔ̃ do 'dã mɛ 'da wa.

¹⁹ NWA a tɛ sɛ ɔ nɛ gba fua lì tabi gba bũ ni, we hã etumbu hã wa. Na mɛ ni, owinɔ yolo si 'biti gba wese gbaa we hɔ si 'biti gɛ̃a wese, wa dɔnggɔ sɛ NWA, nɛ wa yu sɛ kili ngawi 'da a.

²⁰ NWA tɔ̃a hã owinɔ 'da a na: “Mi nɛ sɛ tɛ Yeruzalɛmɛ we bi bolo zu nɛ, nɛ mi kpasa sɛ nɛ, obe Israɛlɛ kɛ nɛ bɛ̃a gɛnɛ dɛ 'dã mɛnɔ ni.

²¹ Mi gba sɛ tɔkɔ do nɛ, nɛ mi tombo sɛ Hi Wi 'da mi dɛ ngɔ nɛ. Mi be sɛ mbulanɔ 'da mi hã nɛ, nɛ ma 'bana sɛ do mɔ́ nɛ fai. Nɛ dɔnggɔ sɛ ma, nɛ nɛ be sɛ 'bɔ ma hã obenɔ 'da nɛ, do obe zã wa kɔ sabɛlɛ do sabɛlɛ. Mi bá sɛ ma kɔ̃ nɛ gɔ. Mi NWA, mi tɔ̃a ni.”