Ezai 57 - WE NU GALE 1995

¹ Owi dɛ de mɔ wa fe, nɛ nde fo wi dɛ 'bako we fio wa bina. Nɛ wele kpo fá we ĩ gulu ngamɛ kɛ wa kpa ma, hã ma gbɛa wa ni gɔ.

² Gɛnɛ kɔ na mɛ ni, nɛ nde owinɔ kɛ wa dɛ to tɛ wa do bɔlɔ nɛ ni, fala kɛ wa fe, nɛ wa kpa dia dungu, nɛ wa kpe tɛ wa do dia nɛ.

NWA dãlã do owi dɔnggɔ kpikimanɔ

³ “Nɛ tɛ́, kɔ mi 'bili ngbangga 'da nɛ. Nɛ nɛ̀ ngɔ Owi tunu mɛnɔ, do Owi yɛnggɛ vĩ zu yalinɔ do Owi dɛ ndumbanɔ gɔ.

⁴ Wi kɛ nɛ 'bã nu nɛ gã wena, nɛ nɛ mɔmɔ a, nɛ nɛ yɛfɛ lɛfɛ nɛ hã a ni, wi a wio nde? Nɛ a Owi dɛ nga zu, Owi tɔ̃ bɛlɛ.

⁵ Nɛ nɛ ti otenɔ, nɛ nɛ ɔ do ongba nɛ, we dɔnggɔ do ogale e kuli be. Nɛ gbɛ obenɔ 'da nɛ, nɛ nɛ hã wa do dɔnggamɔ kɔ tanɔ tɛ nu fua lìnɔ i.

⁶ Nɛ nɛ kala olɔa tɛ tanɔ kɛ nɛ kpa ma i mɔ ni, nɛ nɛ dɔnggɔ ma ɔ nɛ ogale ni. Nɛ a dɔ́ nù, nɛ nɛ hã 'bɔ dɔnggamɔ hã otanɔ ni. Ni a nɛ lengge na, mɛnɔ ni ma wia we de tɛ mi NWA nde?

⁷ Nɛ kù dɛ zu ngala kalanɔ i we ɔ do ngba nɛ, do we hã dɔnggamɔ hã ogalenɔ 'da nɛ.

⁸ Nɛ e ina 'do gbangga nu tɔa 'da nɛ. Nɛ usu tɛ nɛ do mi, nɛ nɛ hɔlɔ tulu go'do nɛ, nɛ nɛ kũ dɛ ngɔ gã mɔ ɔi 'da nɛ, do owinɔ kɛ nɛ hã mbili hã wa, nɛ nɛ kɔ̃a we ɔ do ngba nɛ do wa ni, nɛ nɛ zɔ kũlĩ tɛ ngba nɛ.

⁹ Nɛ fɛlɛ nɔ do yɔmbɔ, nɛ nɛ nɛ we dɔnggɔ gale kɛ li a a Melɛkɛ. Nɛ tombo Owele ndũu, nɛ nɛ nɛ gbaa kɔ le 'da ofionɔ i we fa ogale na nɛ dɔnggɔ wa.

¹⁰ Nɛ nɛ fa wa ni gbaa, nɛ nɛ mbɔkɔ, nɛ nde nɛ lá fala fa wa gɔ. Nɛ lengge na, osɛa tenɔ 'da nɛ wa hã sɛ ngawi hã nɛ, nɛ nɛ mbɔkɔ sɛ gɔ.”

¹¹ NWA Gale tɔ̃a na: “Ogalenɔ kɛ wa a kili tɛ nɛ, takɔ nɛ 'bili bɛlɛ hã mi, nɛ ta zu nɛ ele ngɔ mi vɛ̃ gɛ a wio nde? Ã kɛ zi belee ni, mi tɔ̃ zi we hã nɛ gɔ. Gulu nɛ hã nɛ dɔ́nggɔ́ 'bɔ mi gɔɛ ni.

¹² Nɛ lengge na, mɛnɔ kɛ nɛ dɛ ma ni, mɛ a dia mɔ. Nɛ nde mi be sɛ 'dã mɛ 'da nɛ dɛ nza, nɛ osɛa tenɔ 'da nɛ wa wé sɛ we gbaka nɛ gɔ.

¹³ 'Da fala kɛ nɛ zɛ sɛ nu nɛ na, wa gbaka nɛ ni, nɛ e kɔ osɛa tenɔ 'da nɛ ni wa gala nɛ! Gba bũ ma kala sɛ sɛa tenɔ, nɛ ma pɛsɛ wa vɛ̃. Nɛ nde owinɔ kɛ wa gbini zã wa do mi NWA ni, wa sɛ a Owele nùi gɛ, nɛ wa dɔnggɔ sɛ mi kɔ Tɛmpɛloe 'da mi.”

Gale a kpasa sɛ owinɔ 'da a

¹⁴ NWA Gale tɔ́a na: “Nɛ 'dáfá li wala hã owinɔ 'da mi! Nɛ fó mɛnɔ kɛ ma kele wala ti wa ni do'do, takɔ wa kpolo tɛ wa dɛ 'da mi.

¹⁵ Mi a Gale santo, mi nɛa ngɔ mɛnɔ vɛ̃, nɛ mi 'bana sɛ fai. Mi ɔ ndũu li ngɔ i, tɛ fala kɛ ma santo. Nɛ mi 'bɔ fala nɛ kpo do owinɔ kɛ wa kifi sila wa, nɛ wa ba tɛ wa dɛ nù ni na, mi nganda sila wa kɔ mɛnɔ kɛ wa dɛ ma ni.

¹⁶ Mba gɔ, zã mi nɔ̃́lɔ̃́ sɛ dɛ tɛ owinɔ 'da mi kɛ mi dɛa wa ni fai gɔ. Mi la sɛ fala kpa we do wa do'do, da dɛ kɔ wa kúmú gɔ.

¹⁷ Obe Israɛlɛ wa dɛa zi 'dã mɔ, nɛ zã mi nɔ̃lɔ̃ zi dɛ tɛ wa, nɛ mi hã etumbu hã wa, nɛ mi bɛ̃a gɛnɛ wa. Nɛ nde wa dɛa nga zu, nɛ wa 'bana tɛ dɛ mɛnɔ kɛ zã wa kɔ̃a ni.

¹⁸ “Mi ĩ ti dɛa mɔ tɛ wa de wena. Nɛ nde mi kpasa sɛ wa, nɛ mi kpe sɛ dati wa, nɛ mi hã ngawi hã wa. Nɛ mi nganda sɛ 'bɔ sila wanɔ kɛ wa do 'bako ni.

¹⁹ Mi hã sɛ yangga do dungu fio hã owinɔ vɛ̃, wanɔ kɛ wa nyɛlɛ wena, do wanɔ kɛ wa nyɛ̀lɛ̀ gɔ ni. Mɛ a gbãlã we, mi kpasa sɛ owinɔ 'da mi.

²⁰ Nɛ nde Owi dɛ 'dã mɛnɔ wa sɛ do dungu fio bina. Wa ɔ sɛ nɛ gba lì kɛ ma dɛ ngele, nɛ nde ma do ngawi we yolo nù bina, nɛ lì ni ma kala ndinɔ, nɛ ma da ma dɛ nu kolo i ni.

²¹ Owi dɛ 'dã mɛnɔ wa kpá sɛ dungu fio gɔ.” NWA Gale tɔ́a ni.