Ezai 56 - WE NU GALE 1995

NWA bɛ̃̀ gɛnɛ wele kpo gɔ

¹ NWA Gale tɔ̃a hã owinɔ 'da a na: “Nɛ dɛ́ de mɔ do bɔlɔ zu dɛa mɔ. Mba gɔ, mi kɔlɔ we kpasa nɛ ngangga gɛ ia.

² Mi wele sɛ nu mi tɛ owinɔ kɛ wa dɛ olo nu mi, nɛ wa kpe tɛ wa do kɔ̃ tũ ɔmɔ tɛ wi, nɛ wa dɔnggɔ ma, nɛ wa dɛ́ 'dã mɔ kpo gɔ ni.”

³ Ma wè na, gele wi kɛ a lia sanga owinɔ 'da NWA ni, a tɔ̃ na: “NWA a ndaka sɛ mi sanga owinɔ 'da a” gɔ. Nɛ hɔla wi wili tɛ lènggè na, ɛ lé sɛ kɔ winɔ 'da Gale gɔ, we kɛ ɛ do gulu we kpo bina ni gɔ.

⁴ Mba gɔ, NWA tɔ̃a na: “Fala kɛ hɔla wi wili dɛ mɔ kɛ ma hã yangga hã mi, kɔ a kpe tɛ̃ a do kɔ̃ tũ ɔmɔ tɛ wi, kɔ a dɔnggɔ 'bɔ gba tɔkɛ 'da mi do owinɔ 'da mi,

⁵ nɛ ta zu mi ma gba sɛ ngɔ a kɔ Tɛmpɛloe 'da mi. Nɛ li a ma 'bana sɛ sanga owinɔ 'da mi. Ki ni ma dia nɛa ngɔ ko obe! Nɛ ta zu mi élé sɛ ngɔ a gɔ fai.”

⁶ Nɛ fala kɛ NWA zɔ ogele winɔ kɛ wa lia sanga owinɔ 'da a, nɛ wa kɔ̃a gɛnɛ a, nɛ wa dɛ to hã a, nɛ wa kpe tɛ wa kɔ̃ tũ ɔmɔ tɛ wi, nɛ wa dɔnggɔ gba tɔkɛ 'da a ni, nɛ a tɔ̃ sɛ hã wa na:

⁷ “Mi kala sɛ nɛ dɛ tɛ Sioni, kɛ mɛ a kala santo 'da mi, nɛ mi hã sɛ yangga hã nɛ tɛ kɔ tɔa sambala 'da mi. Nɛ mi kɔ̃ sɛ gɛnɛ dɔnggamɛnɔ kɛ nɛ hã sɛ ma hã mi tɛ ngɔ gbagala 'da mi ni. Mba gɔ, wa sa sɛ li Tɛmpɛloe 'da mi na: ‘Tɔa dɔnggɔ do mi we onu kɔnggɔnɔ vɛ̃.’ ”

⁸ NWA Gale, kɛ a mba li obe Israɛlɛ, kɛ wa pɛsa zi tɛ kɔlɔ 'duli, nɛ a gisa wa dɛ ngɔ nùi 'da wa ni, a kpua mbulu na: “Mi mba sɛ 'bɔ li ogele wele dɛ kɛ zã winɔ 'da mi, kɛ mi gisa wa ni.”

NWA Gale dãlã do onwa ngɔ obe Israɛlɛ

⁹ NWA Gale tɔ̃a hã ogele winɔ na, wa kúlú ngɔ hã wa tɛ ɔ nɛ osa'de zamɔ ni, kɔ wa nyɔngɔ owinɔ 'da ɛ.

¹⁰ A na: “Onwanɔ vɛ̃ kɛ wa zɔ mɔ tɛ owinɔ 'da mi ni, wa a Owi lɔa li. Wa ĩ̀ ti mɔ kpo gɔ. Wa ɔ nɛ yɔnda tolo, kɛ a ĩ̀ ti ngbu dã gɔ ni. Wa kɔ̃a ɔ yala wena, wa bɔlɔ tɛ wa, nɛ wa zulu yala iko.

¹¹ Nɛ wa ɔ 'bɔ nɛ otolo kɛ wa nyɔngɔ mɔ fai, nɛ nde zã wa hɛ̃́ gɔ ni. Onwanɔ ni, wa kpe dati owinɔ, nɛ nde wa ĩ̀ ti gɔnɔ sanga dia mɔ do 'dã mɔ gɔ. Wele kpo kpo ba li wala 'da ɛ, nɛ a dɛ nɛ́ kɛ ma ɛ̃fɛ̃ tɛ̃ a ni.

¹² Wa tɔ̃ na: ‘Lɛ fá dɔ̃, kɔ lɛ nɔ! Lɛ nɔ̀ nga dɔɛ gɛ vɛ̃! Dɔɛ ma 'bana wena, ní a bindɛ lɛ nɔ sɛ 'bɔ wena, nɛ ma nɛ sɛ ngɔ kɛ sɔɛ gɛ ni!’ ”