Ezai 55 - WE NU GALE 1995

NWA Gale bia dia zã hã owinɔ 'da a

¹ NWA tɔ̃a na: “A nɛ, owinɔ vɛ̃ kɛ nɛ do wɔ lì ni, nɛ tɛ́ we nɔ lì. Aa nɛ, owinɔ kɛ fo mbili kɔ̃ nɛ bina ni, nɛ tɛ́, nɛ nɛ fa nyɔngɔmɔ hã nɛ nyɔngɔ. Nɛ fá dɔ̃ do ma'bɛlɛ hã nɛ nɔ, nɛ ósó sɛ ma usa gɔ.

² Gulu kɛ nɛ 'danga mbili 'da nɛ we oso do nyɔngɔmɔ kɛ ma hɛ̃ zã nɛ gɔ ni we ge nde? Gulu kɛ nɛ dɛ to yala iko, nɛ nde nɛ kpá mɔ olo nɛ gɔ we ge nde? Nɛ zélé mbulanɔ 'da mi, nɛ nɛ nyɔngɔ sɛ dia nyɔngɔmɔ, nɛ nɛ dɛ sɛ yangga we duzu ma.

³ “Aa nɛ, owinɔ 'da mi, nɛ gɛ́ zala nɛ hã nɛ zele mi sɛ! Nɛ tɛ́ dɛ 'da mi, nɛ nɛ kpasa sɛ. Nɛ mi gba sɛ tɔkɔ do nɛ, nɛ ma 'bana sɛ fai. Nɛ mi dɛ sɛ dia mɔ hã nɛ, ɔ nɛ kɛ mi kpua zi mbulu nɛ hã Davidi ni.

⁴ Mi ia zi a do nwa ngɔ onu kɔnggɔ winɔ, nɛ a zi a wi kpe dati wa. Nɛ mi bia zi ngawi 'da mi hã owinɔ do wala 'da Davidi ni.

⁵ Ngangga gɛ, nɛ, obe Israɛlɛ, nɛ sa sɛ mɔ hã ogele winɔ kɛ nɛ ĩ zi mbe ti ngba nɛ do wa gɔ ni, nɛ wa tɛ sɛ we mba ngba wa do nɛ. Mi NWA Gale 'da nɛ, mi, Gale santo 'da nɛ, obe Israɛlɛ, mi dɛ sɛ na mɛ ni, nɛ ma hã sɛ dɔ̃lɔ̃ li hã nɛ.”

⁶ Ngangga gɛ, NWA kɔ̃a na nɛ kpa ɛ, kɔ nɛ síkí li nɛ dɛ 'da a, nɛ nɛ sa mɔ hã a, a nyɛ̀lɛ̀ do nɛ gɔ.

⁷ E kɔ o'dã winɔ wa kpolo linggamɔ zu wa, nɛ wa la fala 'dã mɛnɔ 'da wa, nɛ wa kifi tɛ wa dɛ 'da NWA Gale, nɛ a ĩ sɛ 'bako hã wa, nɛ a mbɔkɔ sɛ wa.

⁸ NWA tɔ̃a na: “Linggamɔ zu mi do dɛa to tɛ mi, ma wè kɔ̃ do kɛ 'da nɛ gɔ.

⁹ Nɛ li wala kɛ mi ba ma ni, mba do dɛa to tɛ mi do linggamɔ zu mi ma kɔ̀lɔ̀ do kɛ 'da nɛ gɔ. Ma nyɛla do kɛ 'da nɛ wena, ɔ nɛ ngbala li nza do nù ni.

¹⁰ “Wila we nu mi ma ɔ nɛ tɛa kolo tabi kuti kɛ ma yolo li nza i, nɛ ma ala, nɛ ma 'bɔ nùi, nɛ ma dɛ na, kpalɛnɔ ma gã, nɛ ma ko mbé kpalɛ na owinɔ wa mi ma, nɛ ma hã 'bɔ nyɔngɔmɔ hã wa ni.

¹¹ Na mɛ ni, wila we nu mi ma lá iko gɔ, ma dɛ mɛnɔ vɛ̃ kɛ mi kɔ̃a ni sɛ nɛ de.

¹² “Nɛ hɔ sɛ nza kɔ le Babilɔnɛ do yangga, nɛ nɛ si sɛ kɔ le 'da nɛ do gɛ̃a sila. Okalanɔ do otɔ̃nɔ wa dɛ sɛ yangga, nɛ wa zɛ sɛ kaliã dati nɛ. Nɛ otenɔ zamɔ gɛ, wa zɛ sɛ kɔ̃ wa hã nɛ.

¹³ Dia te ma hɔ sɛ dɛ olo otɛ̃ gbakɔndanɔ, nɛ owala te ma hɔ sɛ olo ote tɛ̃nɔ. Mɛnɔ kɛ NWA a dɛ sɛ ma hã nɛ ni, ma hã sɛ dɔ̃lɔ̃ li hã a, nɛ ma gba sɛ ta zu nɛ ngɔ a fai.”