Ezai 54 - WE NU GALE 1995

NWA bɛ̃̀ gɛnɛ le Yeruzalɛmɛ gɔ

¹ Aa nɛ, owi Yeruzalɛmɛ, nɛ dɛ́ yangga, nɛ nɛ zɛ́ nu nɛ. Le 'da nɛ ɔ zi nɛ wuko ndɔlɔ, kɛ wili a bɛ̃a a do'do ni. Nɛ nde ngangga ni, owi kɔ le 'da nɛ wa dɔa nɛa ngɔ obe zã wuko, kɛ wili a kɔ̃a gɛnɛ a kɔ̃a ni.

² Nɛ gbálá nu tɔanɔ 'da nɛ, nɛ ngbu zã nɛ dɛ 'do, nɛ nɛ tɛ zĩ̀ tɛ nɛ zĩ gɔ.

³ Mba gɔ, le Yeruzalɛmɛ ma gã sɛ dɛ 'do, nɛ nu le ni vɛ̃ ma ngbɔ sɛ dɛ dati. Obe zã nɛ wa kpolo sɛ tɛ wa dɛ ngɔ nùi kɛ ogele winɔ wa ba zi ma ni, nɛ wa dɛlɛ sɛ kɔ lenɔ 'da nɛ kɛ owinɔ wa yu kɔ nɛ ni.

⁴ Nɛ tɛ dɛ̀ kili gɔ, nɛ kpá sɛ 'bɔ sape ɔ nɛ vĩ zu wuko gɔ. Ta zu nɛ ma ele sɛ ngɔ sape kɛ nɛ kpa zi ma ngɔ nga tɛ nɛ ɔ nɛ wi fio wili ni, nɛ nɛ lénggé sɛ 'bɔ do ma gɔ.

⁵ Mba gɔ, Gale kɛ a dɛa nɛ ni, a ɔ sɛ nɛ wili nɛ. A a Gale santo 'da nɛ, obe Israɛlɛ, nɛ li a a Nwa ngɔ mɔ nyanga nza vɛ̃. A kpasa sɛ nɛ kɔ ngamɔ. A a gã wi ngɔ nùi gɛ vɛ̃.

⁶ Aa nɛ, owi Yeruzalɛmɛ, nɛ ɔ nɛ wuko kɛ wili a yu a do'do, kɔ gɛ̃ɛ olo wili a tɛ ba a ni. Nɛ nde NWA tɔ̃a hã nɛ na: “Wa wè tɛ bɛ̃ wuko zagbãlã gɔ.

⁷ Mi bɛ̃a zi gɛnɛ nɛ, nɛ 'do nɛ ma nyɛlɛ gɔ, nɛ mi kpolo tɛ mi 'da nɛ we be dia zã 'da mi hã nɛ.

⁸ Zã mi nɔ̃lɔ̃ zi dɛ tɛ nɛ, nɛ mi siki 'do mi hã nɛ, nɛ nde 'do nɔ̃lɔ̃ zã ni ma nyɛ̀lɛ̀ gɔ. Ngangga ni, mi kɔ̃a we be dia zã 'da mi, kɛ ma é gɔɛ ni hã nɛ.” NWA kɛ a kpasa nɛ ni, a tɔ̃a ni.

⁹ NWA tɔ̃a 'bɔ na: “Zi dati, nɛ mi kpua zi mbulu hã Nowe na, mi bíndí sɛ 'bɔ nùi ti lì gɔ. Nɛ sɔɛ gɛ, mi kpo mbulu hã nɛ na, zã mi nɔ̃́lɔ̃́ sɛ 'bɔ dɛ tɛ nɛ gɔ, nɛ mi ha sɛ 'bɔ ngamɔ tabi etumbu hã nɛ gɔ.

¹⁰ Gɛnɛ kɔ okalanɔ do otɔ̃nɔ kɛ ma ɔ wena ni, ma sɛnggɛlɛ, kɔ ma e, nɛ nde kɔ̃a zã 'da mi we duzu nɛ, ma é sɛ fala kpo gɔ. Mi 'bili na, mi hã sɛ gɛ̃a dungu hã nɛ, nɛ mi kpóló sɛ ma gɔ, ma 'bana sɛ ni.” NWA kɛ a kɔ̃a gɛnɛ nɛ ni, a tɔ̃a ni.

Le Yeruzalɛmɛ kɛ ma sɛ do 'do nza ni

¹¹ NWA tɔ̃a na: “Aa nɛ, owi Yeruzalɛmɛ, nɛ kpa zɛlɛ tɛ, nɛ wele kpo gbàkà nɛ na, a hã ngawi hã nɛ gɔ. Nɛ nde mi NWA, mi 'dafa sɛ nyanga tɔanɔ kɔ le 'da nɛ dɛ olo nɛ do odia ta olo gà gole.

¹² Nɛ mi dɛ sɛ odɛlɛ tɔanɔ 'da nɛ do fila ta kɛ wa sa li ma na mbi. Mi dɛ sɛ ngbonɔ 'da nɛ do ota kɛ ma nyɛ ɔ nɛ we ni. Nɛ mi dɛ sɛ ngbo nu le 'da nɛ vɛ̃ do odia ta olo gã gole.

¹³ “Mi be sɛ mɔ hã obe zã nɛ, nɛ wa kpa sɛ dia mɔ wena, nɛ wa sɛ do dungu fio.

¹⁴ Nɛ kpa sɛ ngawi do dungu fio, we duzu bɔlɔ zu dɛa mɛ 'da nɛ. Nɛ fo sɛ 'bɔ wele we a kili tɛ nɛ do hã zɛlɛ tɛ hã nɛ bina.

¹⁵ Fala kɛ wele kɔ̃ we bi nɛ, nɛ nde mi a mi tòmbò a gɔ. Owinɔ vɛ̃ kɛ wa bi sɛ nɛ ni, wa te sɛ li bolo dati nɛ.

¹⁶ “Mi a mi dɛa wi dɛ dula kɛ a dã we, nɛ a dolo omɔ bi do bolonɔ ni. Nɛ mi 'bɔ a mi dɛa sodanɔ kɛ wa kala bolonɔ dɛ kɔ̃ wa, nɛ wa gbɛ do owinɔ ni.

¹⁷ Kɔ nɛ ĩ́ na, obolonɔ kɛ wa dolo ma ni, ma sɛ do ngawi we gbɛ nɛ bina. Nɛ fala kɛ wele da nɛ, nɛ nɛ tɔ̃ ngbangga do a, nɛ a te sɛ do we. Mi bi sɛ bolo ngɔ nɛ, owi dɛa tonɔ 'da mi, nɛ nɛ nɛ sɛ ngɔ Owi sɛnɛ nɛ. Mi NWA, mi tɔ̃a ni.”