Ezai 53 - WE NU GALE 1995

¹ Owinɔ wa gisa na: “Wi kɛ sanga lɛ gɛ, kɛ a kɔ̃a gɛnɛ wenɔ lɛ ila gɛ, wi a wio nde? Nɛ wi kɛ a ĩ na, wi dɛa mɛnɔ ni, wi a nwa ni a wio nde? Wele kpo bina.

² Nwa kɔ̃a zi na, wi dɛa to 'da a ɔ nɛ bɔlɔ te, kɛ ma hɔa ngɔ nga nù, nɛ ma ga do dia nɛ gɔ ni. Fo dia mɔ tɛ̃ a do kɛ na, wele zɔ a, nɛ wɔ tɛ̃ a ba a ni bina.

³ Ta zu wele zi ngɔ a bina, wa sɛnɛ zi a, wa hã ngamɔ hã a, nɛ wa zɛlɛ tɛ̃ a. Wele kpo ká zi mɔ tɛ̃ a gɔ. Wa zɔ zi a li wa yala iko.

⁴ “Ĩ na, a ba zi zɛlɛnɔ zu lɛ, nɛ a kpa ngamɛnɔ kɛ na, lɛ wia zi we kpa ma ni. Nɛ lɛ lengge zi na, ngamɛ do sape kɛ a kpa ma ni, mɛ a etumbu kɛ Gale hã ma hã a olo 'dã mɛnɔ 'da a.

⁵ Nɛ nde ma a ni gɔ. Wa zɛlɛ zi tɛ̃ a, nɛ a kpa dani we duzu 'dã mɛnɔ 'da lɛ. Wa hã etumbu hã a, nɛ lɛ kpa dia dungu. Wa zɛa a olo lɛ, nɛ lɛ kpasa.

⁶ Lɛ vɛ̃ lɛ yɛnggɛ zi mba mba ɔ nɛ odua kɔ ba'de kɛ wa kpè nu wa gɔ ni. Nɛ lɛ dɛ zi tati a mɛnɔ kɛ zã lɛ kɔ̃a gɛnɛ nɛ ni. Nɛ nde NWA kala 'dã mɛnɔ 'da lɛ, nɛ a a zu wi toe 'da a na, a si olo ku'da nɛ.

⁷ “Wa zɛlɛ tɛ̃ a wena, nɛ nde a lùngù mɔ gɔ, nɛ a wèlè 'bɔ we kpo gɔ. A dɛa ɔ nɛ be bata kɛ wa ba a we 'bili gɛlɛ a, tabi we kɛlɛ sala tɛ̃ a, nɛ nde a bì gɔ ni.

⁸ Wa ba a, nɛ wa 'bili we 'da a, nɛ wa gbɛ a. Nɛ nde wele kpo lènggè do a gɔ. Ĩ na, wa fua a ngɔ nù gɛ, nɛ a fia we 'dã mɛ 'da owinɔ 'da lɛ.

⁹ Wa mi a do owi dɛ 'dã mɔ, nɛ wa ia a kɔ zuni do Owi kpamɛnɔ. Ĩ na, a dɛ̀ zi ngatɛ gɔ, nɛ a tɔ̃̀ bɛlɛ hã wele gɔ.”

¹⁰ Nɛ nwa tɔ̃a na: “Mi a mi kɔ̃a zi na, wi dɛa toe 'da mi kpa ngamɔ, nɛ a fe olo 'dã mɛnɔ 'da ogele winɔ we si olo ku'da nɛ zu wa. Nɛ we duzu kɛ a dɛa na mɛ ni, a ɔ sɛ ngɔ nù gɛ wena, nɛ a sɛ do obe zã a boe. Mɛnɔ kɛ mi 'dafa we dɛ ma ni, a dɛ sɛ ma gbaa we hɔ ndɔti nɛ.

¹¹ Wi dɛa toe 'da mi a kpa sɛ yangga olo ngamɛ kɛ a kpa zi ma ni. A ĩ sɛ na, a kpà zi zɛlɛ tɛ yala iko gɔ. Wi dɛa toe 'da mi ĩ ti mi, a a wi bɔlɔ zu, nɛ a kifi gba dɔa winɔ na, wa hɔ wi bɔlɔ zu, we kɛ a ba ku'da 'dã mɛ 'da wa dɛ zu a.

¹² Nɛ mi e sɛ a fala dɔ̃lɔ̃ li, a sɛ a sanga onga winɔ. Mba gɔ, a hã tɛ̃ a hã fio, nɛ wa fi a sanga Owi dɛ 'dã mɛnɔ. A kpa ngamɔ olo 'dã mɛ 'da owinɔ, nɛ a 'dafa we ngɔ owi dɛ 'dã mɛnɔ.”