Ezai 52 - WE NU GALE 1995

NWA a kpasa sɛ Owi Yeruzalɛmɛ

¹ Aa nɛ, owi Yeruzalɛmɛ, nɛ ngó tɛ nɛ, nɛ nɛ yóló nganda. Nɛ 'dáfá le 'da nɛ Yeruzalɛmɛ, hã ma kpa dɔ̃lɔ̃ li, ɔ nɛ wi kɛ a hi'da dia tulu ni. Le ni a le santo 'da Gale. Mba gɔ, opaganɔ kɛ wa a owi ndi ni, wa lé sɛ 'bɔ le 'da nɛ gɔ.

² Aa nɛ, Owi Yeruzalɛmɛ, nɛ kúlú ngɔ, nɛ fɛ́lɛ́ kɛnzɛ tɛ nɛ do'do. Nɛ yálá fɛlɛ gɛlɛ nɛ, nɛ nɛ hɔ kɔ bɔlɔkɛ.

³ NWA ngɔ mɔ nyanga nza vɛ̃ tɔ̃a hã owinɔ 'da a na: “Wa kala zi nɛ do ngbá, nɛ nde wa òsò nɛ usa gɔ. Na mɛ ni, nɛ hɔ sɛ nza kɔ ngbá, nɛ nde wa gɔ́nɔ́ sɛ zu nɛ gɔna gɔ.

⁴ Zi dati, nɛ kulu zi ngɔ do kɔ̃a zã 'da nɛ, nɛ nɛ la dɛ ngɔ nù Ezipeto, nɛ nɛ zi a ogɛnɛ tɛ i mɔ. 'Do ki ni, nɛ Oasiri wa kala nɛ, nɛ wa hã ngamɔ hã nɛ, nɛ nde wa òsò nɛ usa gɔ.

⁵ Nɛ ngangga gɛ, Obabilɔnɛ wa tɛ hã 'bɔ ngamɔ hã nɛ. Wa kala nɛ, nɛ wa 'dɔlɔ nɛ, nɛ nde wa hã mbili we oso do nɛ gɔ. Owinɔ ni wa nɛ ngɔ nɛ, nɛ wa hã zɛlɛ tɛ hã nɛ, nɛ wa 'danga zu li mi 'da fala fai.

⁶ Mi wia kɔ tũ, nɛ ma kɔla ia, mi be sɛ hã nɛ owinɔ 'da mi na, mi a Gale. Nɛ nɛ ĩ sɛ na, wi a mi a mi tɛ ni.”

NWA si dɛ tɛ Yeruzalɛmɛ

⁷ Yangga wena we zɔ wi toe kɛ a yolo ngɔ kalanɔ i, hã a tɛ tɛ do dia sakoe ni. A tɛ do dia sako na, owinɔ wa kpa sɛ gɛ̃a dungu, nɛ wa kpasa sɛ, nɛ wa dungu sɛ do yangga. A tɔ̃ hã Owi Yeruzalɛmɛ na: “Gale 'da nɛ a a Nwa.”

⁸ Nɛ zélé gɛlɛ Owi zɔ mɔ nu ngbo lenɔ, wa tɛ he mɔ do yangga. Mba gɔ, wa zɔa NWA do gbali wa ngboo, tɛ si dɛ kɔ le Yeruzalɛmɛ.

⁹ Nɛ dɛ́ yangga, nɛ nɛ zɛ́ nu nɛ. Mba gɔ, le Yeruzalɛmɛ ma 'danga zi, nɛ nde NWA a gɔnɔ zu nɛ, nɛ a hã ngawi hã owinɔ 'da a.

¹⁰ NWA a bia ngawi santo 'da a, nɛ a kpasa lɛ, owinɔ 'da a. Nɛ onu kɔnggɔ winɔ ngɔ nù gɛ vɛ̃, wa zɔa mɛ kɛ a dɛa ni.

Owi Yeruzalɛmɛ wa kulu sɛ ngɔ Babilɔnɛ, nɛ wa si

¹¹ Aa nɛ, owinɔ kɛ nɛ ba tole mɛnɔ kɛ wa dɛ do to hã NWA kɔ Tɛmpɛlo 'da a ni, nɛ kúlú ngɔ kɔ le Babilɔnɛ hã nɛ si. Hã fala kɛ nɛ kulu ngɔ we si ma nde, nɛ nɛ tɛ 'bè tɛ mɔ kpo, kɛ mɛ a mɔ ndi li NWA Gale ni gɔ. Nɛ fá na, nɛ 'báná sa li a.

¹² Ngangga ni, ma wè do kɛ na, nɛ la le Babilɔnɛ do gɔa nɔ tabi do kili gɔ. Mba gɔ, NWA Gale a kpe sɛ dati nɛ, nɛ a zɔ sɛ mɔ tɛ nɛ falanɔ vɛ̃.

Wi dɛa toe 'da NWA a kpa sɛ dɔ̃lɔ̃ li

¹³ NWA tɔ̃a na: “Wi dɛa toe 'da mi a kpa sɛ de mɔ wena olo toe 'da a, nɛ a sɛ do gã dɔ̃lɔ̃ li.

¹⁴ Ogba dɔa winɔ wa zɔ zi a, nɛ ma 'danga tɛ wa wena, tua kɛ bula li a hɛ̃a zi vɛ̃, ma hɔ zi 'bɔ bula li wele gɔ.

¹⁵ Nɛ nde ngangga ni, ogele nu kɔnggɔnɔ wa tɛ ɔngbɔ we 'da a, nɛ we 'da a ma ba we nu 'Onwanɔ vɛ̃. Mba gɔ, wa zèlè mbe kuti wenɔ kɛ wa tɔ̃ ma hã wa gɛ gɔ, nɛ wa zɔ̀ mbe kuti mɔ ɔ ni gɔ.”