Ezai 51 - WE NU GALE 1995

Owi Yeruzalɛmɛ wa kpasa sɛ fai

¹ NWA Gale tɔ̃a na: “Aa nɛ, owinɔ kɛ nɛ fa kpasi, nɛ nɛ tɛ 'da mi na, mi gala nɛ ni, nɛ zélé mi sɛ! Nɛ lénggé oyaa nɛ, wa kua nɛ ni. Wa ɔ nɛ kpangba ta, kɛ nɛ yula tɛ nɛ ni.

² Nɛ lénggé yaa nɛ Abrahama do kɛnɛ a Sara, wi ko nɛ. 'Da fala kɛ mi sa zi mɔ hã Abrahama ni, nɛ nde a zi do be bina. Nɛ mi wila nu mi tɛ̃ a, nɛ a hɔa yaa ogba dɔa wele.

³ “Mi dɛ sɛ 'bako hã nɛ, owi Yeruzalɛmɛ, do owanɔ wa ɔ kɔ le kɛ ma 'danga ni. Le 'da nɛ ma hɔa li go, nɛ nde mi dɛ sɛ na, ma kifi fɔ ɔ nɛ fɔɛ 'da mi Edɛnɛ ni. Owele wa dɛ sɛ yangga kɔ le 'da nɛ, nɛ wa ga sɛ zuma we dɔnggɔ do mi, do hã iɔ̃nae hã mi.

⁴ “Aa nɛ, owinɔ 'da mi, nɛ gɛ́ zala nɛ hã nɛ zélé mi sɛ! Mi be sɛ mbula hã ogele winɔ, nɛ mbula ni, ma ɔ sɛ nɛ nyɛa we ni we be wala hã wa.

⁵ Mi kɔla fala tɛ nɛ ia. Mi e sɛ bɔlɔ zu dɛa mɔ sanga wa. Mi fo sɛ wa kɔ ngamɛnɔ 'da wa. Nɛ mi do tɛ mi ngboo, mi dungu sɛ nwa ngɔ wa. Gɛnɛ kɔ owinɔ kɛ nùi 'da wa, ma nyɛlɛ nɛ ge nde ni, nɛ nde wa gbini zã wa do mi. Wa 'bɔ 'da mi na, mi tɛ we kpasa wa.

⁶ Nɛ bá li nɛ ngɔ, hã nɛ ká mɔ li nza i, nɛ nɛ ká 'bɔ mɔ ngɔ nù nga. Li nza ma pɛsɛ sɛ ɔ nɛ zɛ̃ we ni, nɛ nùi ma zu'du sɛ ɔ nɛ kɛ ã tulu ɛ̃ nɛ ni. Nɛ owi ngɔ nɛ wa fe sɛ ɔ nɛ olaka ni. Nɛ nde kpasi kɛ mi hã sɛ ma ni, ma 'bana sɛ fai, nɛ bɔlɔ zui 'da mi sɛ do ndɔti nɛ bina.

⁷ “Aa nɛ, owinɔ kɛ nɛ ĩ ti mɔ kɛ ma a bɔlɔ, nɛ nɛ úsú mbula 'da mi dɛ kɔ sila nɛ ni, nɛ zélé mi sɛ! Nɛ tɛ dɛ̀ kili owinɔ kɛ wa dã nɛ ni gɔ.

⁸ Mba gɔ, owinɔ kɛ wa dã nɛ ni, wa fe sɛ, nɛ wa kumu, ɔ nɛ kɛ lo li tulu, nɛ ma e ni. Nɛ nde kpasi kɛ mi hã sɛ ma ni ma 'bana sɛ fai, nɛ bɔlɔ zui 'da nɛ sɛ do ndɔti nɛ bina kɔ sabɛlɛ do sabɛlɛ.”

Nɛ sa mɔ hã Gale we gbaka nɛ

⁹ Aa NWA, mɔ kúlú ngɔ dɔ̃, hã mɔ gbaka lɛ. Mɔ bé ngawi 'da mɔ, nɛ mɔ kpasa lɛ, ɔ nɛ kɛ mɔ kpasa zi 'bɔ lɛ dati ni. Mɔ zi a mɔ 'bili sanga Rahabɛ, gba sɔ̃ sa'de kɛ a ɔ 'dɔ lì ni.

¹⁰ Mɔ zi 'bɔ a mɔ dɛa na, gba lì ɔ̃sɔ̃ na nù, nɛ li wala ma la do gbogbo nɛ, takɔ owinɔ kɛ mɔ kpasa wa ni, wa ba do ma.

¹¹ NWA a kpasa sɛ owinɔ 'da a, nɛ wa si sɛ do zuma. Wa zɛ sɛ kaliã, nɛ wa le sɛ dɛ Yeruzalɛmɛ do yangga. Wa dɛ́ sɛ 'bɔ 'bako gɔ, nɛ wa ámá sɛ gba ama gɔ.

¹² NWA tɔ̃a na: “Aa nɛ, owinɔ 'da mi, mi a mi hã ngawi hã nɛ. Kɔ gulu kɛ nɛ dɛ kili wele, kɛ a fe sɛ, nɛ a mbulu ɔ nɛ wɔkɔsɔ iko ni we ge nde?

¹³ Ta zu nɛ ila ngɔ mi NWA kɛ mi dɛa zi nɛ ni nde? Mi a mi dɛa li nza, nɛ mi 'bɔ a mi dɛa nyanga nùi. Gulu kɛ nɛ tana kili fai dati Owi sɛnɛ nɛ, kɛ wa dɛ nɔ̃lɔ̃ zã dɛ tɛ nɛ, nɛ wa fa we kumu nɛ kumu ni we ge nde? Nɛ ĩ́ na, dã 'da owinɔ ni, ma dɛ́ sɛ mɔ kpo do nɛ gɔ.

¹⁴ Owi bɔlɔkɔnɔ wa ɔ kɔ tũ tɔa ni, wa fé sɛ dɛ di ni gɔ. Wa hɔ sɛ nza, nɛ wa si sɛ, nɛ wa zɔ́lɔ́ sɛ 'bɔ nyɔngɔmɔ go.

¹⁵ “Mi a NWA Gale 'da nɛ. Mi bá nu mi hã gba lì, nɛ ma go'do dɛ ngɔ, nɛ ma dɛ ngele. Li mi a NWA ngɔ mɔ nyanga nza vɛ̃.

¹⁶ Mi a mi dɛa li nza, nɛ mi 'bɔ a mi zĩ nyanga nùi. Aa nɛ, owi Yeruzalɛmɛ, nɛ a owi dɛa tonɔ 'da mi. Mi gu kɔ̃ mi zu nɛ, nɛ mi fɔmɔ nɛ.”

Ngamɛ 'da Owi Yeruzalɛmɛ ma Sɔkpɔ sɛ

¹⁷ Aa nɛ, owi Yeruzalɛmɛ, nɛ ngó tɛ nɛ, hã nɛ kúlú ngɔ. Zã nwa nɔ̃lã zi dɛ tɛ nɛ, nɛ a isi bila dɔ́ kɛ ma dunu do nɔ̃lɔ̃ zã 'da a ni dɛ nu nɛ, nɛ nɛ nɔa ma fɛrr, nɛ zu nɛ zĩ.

¹⁸ Nɛ wele kpo sanga obe zã nɛ vɛ̃, a bà nɛ dɛ ngɔ gɔ, nɛ wele kpo kpè dati nɛ gɔ.

¹⁹ Nɛ ngamɔ bɔa kpa zi nɛ: Le 'da nɛ 'danga li bolo, nɛ gba wɔ tia, nɛ ma gbɛa nɛ. Nɛ nde fo zi wi ĩ 'bako hã nɛ bina.

²⁰ Obenɔ 'da nɛ wa ala nù, nɛ wa kpa do nu mba walanɔ vɛ̃. Wa 'bɔ do ngawi bina, nɔ̃lɔ̃ zã 'da NWA Gale 'da nɛ ɛnzɛ wa ɔ nɛ kɛ bili ɛnzɛ do zambɛlɛ ni.

²¹ Aa nɛ, owi Yeruzalɛmɛ kɛ nɛ kpa 'bakoe, nɛ zu nɛ zĩ ɔ nɛ kɛ dɔ́ ba nɛ ba ni, nɛ zélé we gɛ sɛ!

²² NWA Gale 'da nɛ, kɛ a bi bole zu nɛ ni, a tɔ̃a na: “Mi fo sɛ bila dɔ̃ nɔ̃lɔ̃ zã 'da mi kɛ mi isi dɛ nu nɛ na, nɛ nɔ́ ma, hã ma zĩ zu nɛ ni do'do. Nɛ nɛ nɔ́ sɛ 'bɔ ma gɔ.

²³ Mi e sɛ bila dɔɛ ni nu owi sɛnɛ nɛ kɛ wa hã zɛlɛ tɛ hã nɛ ni. Wa gu zi zã nɛ nù, nɛ wa ma li 'do nɛ, ɔ nɛ kɛ wele ma li wala ni.”