Ezai 50 - WE NU GALE 1995

Oisraɛlɛ wa kpa ngamɔ we 'dã mɛnɔ 'da wa

¹ “Aa nɛ, owinɔ 'da mi, nɛ lengge na, mi bɛ̃a gɛnɛ nɛ, ɔ nɛ kɛ wi wili bɛ̃ do kɛnɛ ɛ ni nde? Nɛ mbɛti bɛ̃ ngba wi, kɛ mi dɛa hã nɛ ni, ma a ni do nde? Nɛ lengge wá na, mi bia gole nɛ na, nɛ hɔ ngbá, ɔ nɛ kɛ wele be do gole benɔ 'da a we gese do ku'da zu a ni nde? Ma ni gɔ! Wa kala nɛ, nɛ wa 'dɔlɔ nɛ, we duzu 'dã mɛnɔ 'da nɛ.

² “Aa nɛ, owinɔ 'da mi, ma dɛa nɛ nde? Mi nɛa we kpasa nɛ, nɛ mi kpà wele kpo gɔ. Mi sa mɔ hã nɛ, nɛ nɛ kɔ̃ nu mi gɔ we ge nde? Nɛ lengge wá na, mi do ngawi we kpasa nɛ bina nde? Mi wia we ba nu mi hã gba lì, nɛ ma ɔ̃sɔ̃, nɛ ma na nù. Mi wia 'bɔ we ba nu mi hã gã fua lì, nɛ ma kolo vɛ̃, nɛ olo nɛ kifi li go. Nɛ kɔyɔnɔ zi kɔ nɛ ni, wa fe wɔ lì, nɛ wa mbulu.

³ Mi wia 'bɔ we dɛ na, li nza tũ kpirr, ɔ nɛ kɛ ma hi'da tulu gɛla ni.”

Wi dɛa toe 'da NWA a kpa sɛ zɛlɛ tɛ

⁴ NWA Gale hã hã zã tɔ̃ lɛnggɛ hã mi na, mi nganda sila wi kɛ a mbɔka ni. Titole kpo kpo, nɛ a tunu mi, nɛ a be tɛlɛ tɛ kɛ ma wia na mi zele a, ɔ nɛ kɛ wi yambala mɔ a zele do nu wi be mɔ hã a ni.

⁵ NWA bia hã mi na mi zele ɛ, nɛ mi làkàlà nu a gɔ, mi bɛ we nu a gɔ.

⁶ Mi ia 'do mi hã owinɔ kɛ wa zɛ mi ni. Mi gɛa sanga li mi hã wanɔ kɛ wa zu'du nzɛlɛ mi ni. Mi ùsù li mi dati owinɔ kɛ wa dã mi, do wanɔ kɛ wa tufu sa nu wa li mi ni gɔ.

⁷ Nɛ nde NWA Gale a gbaka mi, nɛ dɛlanɔ ni ma dɛ̀ mɔ tɛ mi gɔ. Mi kunu sila mi nganda wena, nɛ mi ĩ na, mi kpá sɛ sape gɔ.

⁸ Mba gɔ, nwa do mi boe, nɛ a be sɛ dia gulu we 'da mi dɛ nza. Wi kɛ a kɔ̃a we tɔ̃ ngbangga do mi ni, wi a wio nde? A tɛ́, kɔ a da mi, hã lɛ tɔ̃ ngbangga do a!

⁹ NWA Gale a wi tɔ̃ ngbangga ngɔ mi, wele wè tɛ 'bili 'dã we hã mi gɔ. Owi sɛnɛ mi kɛ wa da mi ni, wa fe sɛ, nɛ wa kumu vɛ̃, ɔ nɛ ɛ̃a tulu kɛ olonɔ wa li ma ni.

Nɛ zélé we kɛ wi dɛa toe 'da NWA be ma gɛ

¹⁰ Sanga nɛ gɛ vɛ̃, wi kɛ a dɔnggɔ NWA dɔnggɔ ni, nɛ ma wia na, a zele we nu wi dɛa toe 'da NWA. Fala kɛ wele kpa ngamɔ, kɔ a yɛnggɛ kɔ gba tũ, nɛ ma wia na, a gbini zã a do NWA Gale, nɛ a hã tɛ̃ a hã a.

¹¹ Aa nɛ, kɛ nɛ 'dafa ngamɛnɔ we kumu do ongba nɛ ni, nɛ vɛ̃ nɛ kumu sɛ do linggamɛnɔ kɛ nɛ 'dafa ma ni. NWA do tɛ̃ a ngboo, a 'dafa sɛ na, nɛ fe kɔ ngamɔ.