Ezai 5 - WE NU GALE 1995

Zuma we fɔ vinɔ 'da NWA

¹ Nɛ é mi, hã mi ga mbe zuma do li 'bia mi. Mɛ a zuma 'da 'bia mi do fɔ vinɔ 'da a. 'Bia mi wa zi fɔ vinɔ tɛ kɔ ganggala kala kɛ nù tɛ nɛ dɛ nɔ wena ni.

² A gɔma nùi vɛ̃, nɛ a kala tanɔ kɔ nɛ do'do, a saka dia kpalɛ vinɔ, nɛ a mi ma tɛ nɛ. A dɛa gba'da nu fɔɛ ni we zɔ do mɔ tɛ nɛ, nɛ a zã kɔ̃, nɛ a 'dafa ma we kpĩlĩ lì wala te vinɔɛ dɛ kɔ nɛ. A lingga na, fɔ vinɔ 'da ɛ, ma ko sɛ dia ɛ̃fɛ̃ wala te hã ɛ. Nɛ nde ma kò dia wala te kpo hã a gɔ.

³ Nɛ 'bia mi tɔ̃a na: “Aa nɛ, owi kɔ le Yeruzalɛmɛ, aa nɛ, owi ngɔ nù Yuda, nɛ gɔ́nɔ́ sanga we 'da mi do fɔ vinɔ 'da mi.

⁴ Mɛ kɛ mi dɛ̀ we fɔ vinɔɛ gɛ gɔ ni a ge nde? Mbé mɛ kɛ mi wia we dɛ we fɔ vinɔɛ gɛ a ge nde? Mi 'bɔa 'da dia ɛ̃fɛ̃ wala te, nɛ gulu kɛ ma kua tati a 'dã wala te ni we ge nde?

⁵ Kɔ ngangga ni, nɛ zélé mɛ kɛ mi dɛ sɛ do fɔ vinɔ 'da mi ni. Mi gbini sɛ ngboe 'do nɛ do'do, nɛ osa'de wa nyɔngɔ sɛ vinɔɛ. Ngboe nu fɔɛ kɛ wa dɛa do ta ni, mi ili sɛ ma, nɛ ma te nù, nɛ owinɔ wa ma sɛ ma.

⁶ Mi dɛ sɛ na, fɔɛ ni dɛ bili. Wa lɛ́ sɛ 'bɔ tɛ te vinɔnɔ gɔ, nɛ wa wá sɛ 'bɔ ti nɛ gɔ. Te tɛ̀ do wɔkɔsɔ ma hɔ sɛ ngɔ fɔɛ, nɛ mi tɔ̃ sɛ na, kolo tɛ tɛ̀ 'bɔ di ni gɔ.”

⁷ Aa nɛ, nɛ zélé gulu we gɛ! Fɔ vinɔ 'da nwa ngɔ mɔ nyanga nza vɛ̃, mɛ a nu kpala Oisraɛlɛ. Kpalɛnɔ kɛ ma hã zi yangga hã a wena ni, mɛ a nu kpala Oyuda. NWA ia zi sila a ngɔ wa na, wa dɛ sɛ bɔlɔ zu dɛa mɔ, nɛ nde falanɔ vɛ̃, wa dɛ tati a 'dã mɔ iko. A lingga zi na, wa dɛ sɛ mɔ do wala olo nɛ, nɛ nde kɔ lenɔ vɛ̃, wa zɛlɛ tɛ ngba wa, nɛ mɛ wele tati a hia kɔ̃a 'bako iko.

Owinɔ kɛ wa tulu NWA ni

⁸ 'Bako we winɔ kɛ wa oso mbé tɔanɔ do mbé fɔnɔ dɛ ngɔ ã kɛnɔ 'da wa ni. Wa dɛ ni fai, nɛ wa ba nùi vɛ̃, nɛ wi 'bana do nùi tati a wa zu wa kpo iko.

⁹ Nɛ nde mi zila gɛlɛ NWA ngɔ mɔ nyanga nza vɛ̃ tɛ tɔ̃ na: “Mi ndaka sɛ wa vɛ̃ do'do, nɛ mbé wele 'báná sɛ 'bɔ kɔ gã tɔanɔ, kɛ ma dia nɛ ge nde ni gɔ, nɛ ma 'danga sɛ vɛ̃.

¹⁰ Gɛnɛ kɔ gã li fɔ vinɔ hɛktarɛ talɛ, nɛ nde ma ha sɛ dɔ̃ litrɛ 'bu nɛ mɔlɔ gɔ. Gɛnɛ kɔ wele mi gbãlã ble saki bɔa, nɛ ma ko sɛ hã a sanggi kpo iko.”

¹¹ 'Bako we owinɔ kɛ wa lengge tati a we nɔ nga dɔ̃nɔ ni. Wa ndo nɔ ma do titole, nɛ do tũi, nɛ nde wa sí tɔa belee gɔ, tati a we nɔ dɔ̃ɛ iko.

¹² Wa te bá dɔ̃ɛ, nɛ wa zɛ kundu, do be kundu, do biã, nɛ wa dama gaga. Nɛ nde wa lénggé do mɛ kɛ NWA dɛ ma ni gɔ, nɛ wa ĩ́ gulu nɛ gɔ.

¹³ Ma kɛ NWA tɔ̃a na: “Ogele wele wa kala sɛ winɔ 'da mi, nɛ wa la sɛ do wa kɔlɔ 'duli. Fo sɛ nyɔngɔmɔ we ogã winɔ bina, wa fe sɛ wɔ, nɛ wɔ lì ma gbɛ sɛ obe winɔ.”

¹⁴ Nu ngbo le 'da ofionɔ ma fĩ gã wena, ma yɔ'dɔ sɛ ogã winɔ do obe winɔ, kɛ wa dɛ ɛngga tɛ Yeruzalɛmɛ gɛ ni.

¹⁵ We duzu ma, owinɔ vɛ̃ wa kpa sɛ sape, nɛ wa usu sɛ li wa. Wi kɛ a ka mɔ do wali, a bili sɛ zu a nù.

¹⁶ NWA ngɔ mɔ nyanga nza vɛ̃, a 'dafa sɛ mɛnɔ do bɔlɔ nɛ, nɛ ma be sɛ na, a a gã wi. Gale a gɔnɔ sɛ wenɔ do wala olo nɛ, nɛ ma be sɛ na, a a santo.

¹⁷ Obe batanɔ wa nyɔngɔ sɛ mɔ kɔ bili tɔa Yeruzalɛmɛ, ɔ nɛ kɛ wa nyɔngɔ mɔ kɔ ngbo 'da wa ni. Nɛ obe duanɔ wa nɛ sɛ i mɔ, nɛ wa nyɔngɔ mɔ, nɛ wa gã, nɛ wa dɛ nɔ.

¹⁸ 'Bako we owinɔ kɛ 'dã mɛnɔ 'da wa, ma kpua fɛlɛ tɛ wa, nɛ wa mana ma tɛ yɛnggɛ do nɛ ɔ nɛ dĩ tole ni.

¹⁹ Wa tɔ̃ na: “NWA wɛ́lɛ́ tɛ̃ a wɛla, hã a dɛ mɛnɔ kɛ a kɔ̃a we dɛ ma ni, hã lɛ zɔ. Lɛ kɔ̃a na, mɛ kɛ Gale santo 'da obe Israɛlɛ 'dafa ni, ma dɛ tɛ̃ ɛ, hã lɛ ĩ ti nɛ.”

²⁰ 'Bako we owinɔ wa zɔ 'dã mɔ li wa nɛ́ dia mɔ, nɛ dia mɔ kifi 'dã mɔ li wa ni. Tũ li wa mɛ a sa fala, nɛ sa fala kifi tũ. Mɔ kɛ ma a ɛ̃fɛ̃ ni, ma ɔ kɔ nu wa a fã, nɛ fã mɔ ɔ kɔ nu wa a ɛ̃fɛ̃.

²¹ 'Bako we owinɔ, wa zɔ tɛ wa, nɛ wa lengge na, gbãlã zã lo siki wena, nɛ lo do hã zã boe ni.

²² 'Bako we owinɔ kɛ fo wi la wa do nɔa dɔ̃ bina, nɛ wa ĩ ti dɛ nga dɔ̃nɔ wena ni.

²³ Wi 'dã gulu we hã dia mɔ hã wa, nɛ wa si 'do a, nɛ wa kɔ̃̀ we zele lɛnggɛ 'da wi dia gulu we gɔ.

²⁴ We duzu ma, nyɛa we ma te sɛ tɛ wa, nɛ ma bɛlɛ wa ɔ nɛ zɔ̃ ni, nɛ wa ngutu sɛ vɛ̃. Wa ɔ sɛ nɛ te, kɛ liã nɛ mbulu, nɛ do nɛ ala, nɛ ma dɛa bũ ni. We kɛ wa dɛ̃ mbula 'da NWA ngɔ mɔ nyanga nza vɛ̃ gɔ, wa bɛ̃a we nu Gale santo 'da Oisraɛlɛ.

Zã Gale nɔ̃lã dɛ tɛ owinɔ 'da a

²⁵ Ma kɛ zã NWA nɔ̃lã dɛ tɛ owinɔ 'da a, nɛ a bia kɔ̃ a li wa, nɛ a zɛ wa. Okalanɔ ma tana dati a, nɛ wɔlɔ owinɔ wa fia ni, ma 'bana dɛ li walanɔ, nɛ ma mbulu ɔ nɛ wɔkɔsɔ ngɔ zubu ni. Nɛ nde mɛnɔ kɛ NWA dɛa vɛ̃ ni, ma tɛ gɛ sila a gɔ, a 'bana tɛ be kɔ̃ a li wa.

²⁶ NWA ba bɛndɛlɛ dɛ ngɔ na, ogele winɔ wa nyɛlɛ do Israɛlɛ wena ni, wa zɔ ma. Nɛ a dama zaka we mbese wa na, wa kulu ngɔ ndũu 'da wa mɔ, hã wa tɛ we bi obe Israɛlɛ. Mɔ zɔ́, wa a i mɔ ni, wa tɛ tɛ nɛ, wa wɛlɛ tɛ wa wena.

²⁷ Wa vɛ̃ do ngawi, fo sulu wele, tabi wi ɔ yala dɛ ngɔ kɔ wa bina. Nyanga wa vɛ̃ a nga, nɛ wa ɛnzɛ fɛlɛ ngɔ mɔ nyanga wa vɛ̃ de wena. Wa kpua 'dɛ̃ 'dɛ tili wa, nɛ ma nɔa.

²⁸ Wa sɛa nu kpilinɔ 'da wa 'bɛ̃lɛ̃ wena, nɛ wa mana nzabele 'da wa we da ma. Tambala nyanga mbalatanɔ 'da wa nganda ɔ nɛ ta ni, nɛ kolo nyanga ngilingili 'da wa zĩ ɔ nɛ zikili ni.

²⁹ Mɔ zele gɛlɛ wa, nɛ mɔ lengge na, mɛ a gɛlɛ ogbɔgbɔ. Wa he mɔ ɔ nɛ naa gbɔgbɔ, kɛ a o dã, nɛ a ba sa'de, nɛ a la do a, nɛ nde fo wi ba a nu a bina ni.

³⁰ 'Da fala ni, nɛ gɛlɛ Owi sɛnɛ wa ma wele sɛ ɔ nɛ giti ngele gba lì ni. Wa ka sɛ mɔ 'da le 'da wa, nɛ nde wa zɔ́ sɛ gele mɔ kpo gɔ, tati a gba tũ iko. Nɛ do gba wese, nɛ gba kutu ma kpe sɛ kpã kpã.