Ezai 49 - WE NU GALE 1995

Wi dɛa toe 'da NWA a wi be wala hã ogele winɔ

¹ Wi dɛa toe 'da nwa na: “Aa nɛ, ogele winɔ kɛ lenɔ 'da nɛ ma nyɛlɛ nɛ gɛ nde ni, nɛ gɛ́ zala nɛ hã nɛ zélé mi sɛ! NWA Gale sa zi mɔ hã mi dati kula 'da mi, nɛ a ia mi na, mi dɛ to hã ɛ.

² A dɛa na, wila we nu mi ma 'bili mɔ ɔ nɛ tɔ́a nu kɔya ni. A gu kɔ a zu mi, nɛ a fɔmɔ mi. Nɛ a dɛa 'bɔ na, wila we nu mi ba wele, ɔ nɛ kpili kɔ ndele ni.

³ A tɔ̃a hã mi na: ‘Aa mɔ, Israɛlɛ, mɔ a wi dɛa toe 'da mi, Mba gɔ, ogele winɔ wa zɔ sɛ mɛnɔ kɛ mɔ dɛ ma ni, nɛ wa dɔnggɔ dɔ̃lɔ̃ li 'da mi.’ ”

⁴ Mi lengge zi na, mi dɛa to, nɛ ngawi 'da mi ia yala iko, mi kpà mɔ kpo olo nɛ gɔ. Nɛ nde ma a ni gɔ, NWA Gale bia hã mi na, a yolo sɛ 'do mi, nɛ a hã sɛ dia mɔ olo dɛa toe 'da mi hã mi.

⁵ NWA saka zi mi dati kula 'da mi, nɛ a ia mi do wi dɛa to 'da a na, mi kala obe Israɛlɛ kɛ wa pɛsɛ ni, hã mi gese wa dɛ 'da a. NWA ia dĩ zu mi na, mi dɛ toe ni, nɛ ngawi 'da mi, ma yolo kɔ̃ a Gale.

⁶ A tɔ̃a hã mi na: “Mi kɔ̃̀ tati nɛ na, mɔ dɛ to hã mi we gese obe Israɛlɛ kɛ wa 'bana nza kɔla 'duli ni iko gɔ. Nɛ nde mi ia 'bɔ mɔ na, mɔ ɔ nɛ nyɛa we, we be li wala hã ogele winɔ, takɔ mi kpasa owinɔ, kɛ wa pɛsa do ngɔ nù gɛ vɛ̃ ni.”

Wa 'dafa sɛ Yeruzalɛmɛ dɛ olo nɛ

⁷ NWA Gale santo 'da obe Israɛlɛ, kɛ a kpasa wa kɔ ngamɛ ni, a tɔ̃a hã wi kɛ owinɔ wa sɛnɛ a, nɛ wa zɔ a li wa yala iko, nɛ wa ia a do ngbá 'da ogã winɔ ni na: “Onwanɔ wa zɔ sɛ mɔ, nɛ wa kulu sɛ ngɔ ngɔ kpongbo nwa 'da wa, we dɔnggɔ mɔ. Kɔ ogã winɔ wa zɔ na mɛ ni, nɛ wa bili sɛ zu wa nù dati mɔ.” Wa yu sɛ kili mɔ na mɛ ni, we duzu nwa, kɛ a saka mɔ, nɛ a ia mɔ do wi dɛa toe 'da a ni. NWA Gale santo 'da obe Israɛlɛ, a dɛ sɛ mbuli kɛ a kpua hã mɔ ni.

⁸ NWA tɔ̃a hã owinɔ 'da a na: “Do ngba soe kɛ mi kpasa sɛ nɛ ni, nɛ mi be sɛ dɔ̃lɔ̃ li 'da mi hã nɛ. Nɛ sa sɛ mɔ hã mi, nɛ mi kɔ̃ nu nɛ. Mi amba sɛ zu nɛ, nɛ mi kpasa sɛ nɛ. Mi gba sɛ tɔkɔ do owinɔ vɛ̃ do wala 'da nɛ. Nùi 'da nɛ kɛ owinɔ wa 'danga ma, nɛ ma tia nù sɔɛ gɛ ni, mi ba sɛ 'bɔ ma dɛ ngɔ, nɛ mi kɛ̃ sɛ ma hã nɛ.

⁹ Mi tɔ̃ sɛ hã Owi bɔlɔkɔnɔ na, wa hɔ́ nza hã wa sí do dia nɛ. Nɛ mi tɔ̃ sɛ 'bɔ hã Owi kɔ gba tũnɔ na, wa hɔ́ dɛ sa fala. Owinɔ ni wa ɔ sɛ nɛ obata kɛ wa nɛ, nɛ wa nyɔngɔ owɔkɔsɔnɔ tɛ ngɔ kalanɔ i ni.

¹⁰ Wɔ nyɔngɔmɔ tabi wɔ lì ma bá sɛ 'bɔ wa gɔ. Nɛ tua wese tabi bawe bũ li go ma dɔ́ sɛ wa gɔ. Mi lengge sɛ wa de wena, nɛ mi kpe sɛ dati wa, nɛ mi kã sɛ wa dɛ nu 'de na, wa nɔ ma.

¹¹ Mi fi sɛ li wala do ngɔ kalanɔ, nɛ mi 'dafa sɛ ma hã nɛ owinɔ 'da mi, nɛ nɛ la sɛ do di ni.

¹² Nɛ, owinɔ 'da mi, nɛ yolo sɛ ndũu, nɛ nɛ si sɛ dɛ ngɔ nùi 'da nɛ. Ombe nɛ wa yolo do si gbãlã ngɔ, nɛ ombe wa yolo do si 'biti gba wese, nɛ ombe wa yolo sɛ tɛ ngɔ nù Ezipeto do si ba gɔtɔ, nɛ wa si sɛ.”

¹³ Aa nɛ, li nza do nù, nɛ dɛ́ yangga! Aa nɛ, okalanɔ, nɛ gá zuma, nɛ nɛ zɛ́ kɔ̃ nɛ do yangga! Mba gɔ, NWA ĩ 'bako hã owinɔ 'da a kɛ wa zi kɔ ngamɔ, nɛ wa kpa zi sape ni, nɛ a nganda sila wa.

NWA èlè Owi Yeruzalɛmɛ gɔ

¹⁴ Owi Yeruzalɛmɛ wa tɔ̃a na: “NWA Gale bɛ̃a gɛnɛ lɛ, nɛ ta zu a ila ngɔ lɛ.”

¹⁵ Nɛ nde nwa gisa na: “Ta zu wuko wia we ele ngɔ be 'da a nde? Wuko wia we bɛ̃ gɛnɛ be kɛ a ama a ni nde? Gɛnɛ kɔ ta zu wuko ele ngɔ be 'da a ila, nɛ nde ta zu mi wè tɛ ele ngɔ nɛ, owi Yeruzalɛmɛ gɔ.

¹⁶ Mi kɔma li nɛ dɛ tambala kɔ̃ mi, nɛ 'da fala fai, mi tɛ lengge do nɛ.

¹⁷ “Owi 'dafa le Yeruzalɛmɛ wa kɔlɔ fala tɛ nɛ ia. Nɛ owinɔ kɛ wa 'danga le Yeruzalɛmɛ ni, wa fo sɛ tɛ wa, nɛ wa yu sɛ ndũu.

¹⁸ Aa nɛ, owi Yeruzalɛmɛ, nɛ ká mɔ kɛ zã nɛ vɛ̃, nɛ nɛ zɔ́ owinɔ 'da nɛ. Wa mba li ngba wa, kɔ wa tɛ si dɛ 'da nɛ nga. Owinɔ 'da nɛ wa si nɛ, nɛ wa 'dafa sɛ le Yeruzalɛmɛ ɔ nɛ kɛ sɛni 'dafa bula li be zɔnga, kɛ a nɛ si nu tɔa wili ni. Mi NWA, mi kana tɛ mi do zu li mi we dɛ ni.

¹⁹ “Le Yeruzalɛmɛ ma 'danga, nɛ fo 'bɔ wele kɔ nɛ bina. Nɛ nde ngangga gɛ, owi Yeruzalɛmɛ wa si sɛ, nɛ wa dɛlɛ sɛ 'bɔ kɔ nɛ wena, nɛ wa nɛ sɛ ngɔ ma ɔ nɛ kɛ mɛ a be le ni. Nɛ winɔ kɛ wa 'danga zi ma ni, wa yu sɛ ndũu.

²⁰ Mbe ngba soe kpo, nɛ owi Yeruzalɛmɛ, kɛ wa kua wa tɛ kɔlɔ 'duli ni, wa tɔ̃ sɛ na: ‘Nùi gɛ ma gà gɔ, ma wia na nɛ tili dɛ ngɔ ngba nɛ, kɔ lɛ kpa fala dɛ tɔa 'da lɛ!’

²¹ Nɛ owi Yeruzalɛmɛ wa aka sɛ tɛ wa na: ‘Wi kɛ a kua ogili benɔ gɛ hã lɛ wi a wio nde? Wa kala zi obenɔ 'da lɛ kɔ lɛ vɛ̃, nɛ wa 'dɔlɔ wa nyɛlɛ do lɛ ndũu. Lɛ wè zi 'bɔ tɛ gbini zã lɛ na, lɛ kpa sɛ ombé be gɔ. Fo zi 'bɔ wi kɔ lɛ bina, kɔ obenɔ gɛ wa yula do nde?’ ”

²² NWA Gale tɔ̃a hã owinɔ 'da a na: “Mi 'be sɛ bɛndɛlɛ 'da mi dɛ ngɔ hã ogele winɔ, nɛ wa 'bolo sɛ obulu benɔ 'da nɛ, nɛ wa kala oboko benɔ 'da nɛ dɛ zu 'baka wa, nɛ wa kã wa hã nɛ.

²³ Onwanɔ wa zɔ sɛ mɔ tɛ obenɔ 'da nɛ, ɔ nɛ kɛ baa be zɔ do mɔ tɛ be 'da a ni. Nɛ owuko nwanɔ wa dala sɛ wa ɔ nɛ kɛ naa be dala do be 'da a ni. Onwanɔ wa bili sɛ zu wa nu dati nɛ, wa dɛ sɛ kili nɛ, nɛ wa dɔnggɔ sɛ nɛ. Na mɛ ni, nɛ nɛ ĩ sɛ na mi a NWA. Nɛ nɛ ĩ sɛ 'bɔ na, wi kɛ a gbini zã a do mi, nɛ nde a kpá sape fala kpo gɔ.”

²⁴ Nga soda ba mɔ li bolo, nɛ wa wia we ba mɛ ni kɔ̃ a nde? 'Dã nwa fi wele bɔlɔkɔ, nɛ wa wia we fo wi ni dɛ nza nde? Gɔ, wa wè tɛ dɛ ni gɔ.

²⁵ Nɛ nde NWA Gale tɔ̃a na: “Mɛnɔ kɛ ma dɛ sɛ tɛ̃ ɛ gɛ a ni. Nga soda ba wele li bolo, kɔ a fi wi ni bɔlɔkɔ, nɛ mi ba sɛ a kɔ̃ a. 'Dã wele ba mɔ li bolo, nɛ mi ba sɛ mɛ ni kɔ̃ a. Aa nɛ, owi Yeruzalɛmɛ, mi do tɛ mi ngboo, mi bi sɛ do owi sɛnɛ nɛ, nɛ mi kala sɛ obenɔ 'da nɛ kɔ̃ wa.

²⁶ Mi dɛ sɛ na, owinɔ kɛ wa hã ngamɛ hã nɛ ni, wa gbɛ ngba wa dɛ sanga ngba wa. Wa zɔ sɛ tɔkɔ tɛ ngba wa, nɛ zu wa ma zĩ sɛ, ɔ nɛ kɛ wa nɔa mbé dɔ̃ ni. Na mɛ ni, nɛ owinɔ ngɔ nùi gɛ vɛ̃, wa ĩ sɛ na, mi NWA, mi a wi kpasa nɛ, nɛ mi a mi fo nɛ kɔ ngamɔ. Nɛ wa ĩ sɛ 'bɔ na, mi a Gale ngawi 'da nɛ, obe Israɛlɛ.”