Ezai 47 - WE NU GALE 1995

Le Babilɔnɛ ma 'danga sɛ

¹ NWA tɔ̃a na: “Aa nɛ, Obabilɔnɛ, nɛ kúlú ngɔ ngɔ kpongbo nwanɔ do'do, kɔ nɛ dúngú dɛ bulu nù. Mba gɔ, le 'da nɛ 'bɔ a le nwa gɔ. Le 'da nɛ ɔ nɛ wuko sã, kɛ fo de mɔ kɔ̃ a bina ni. Ma hɔa le ngbá, nɛ Owele wa ba nu wa hã ma na:

² ‘Mɔ bá kungba, hã mɔ to tula, mɔ fó kitambala zu mɔ do'do, mɔ kálá tulu tɛ nganggala mɔ dɛ ngɔ we kũ lì.

³ Owinɔ wa zɔ sɛ kũlĩ tɛ mɔ, nɛ sape ma ba sɛ li mɔ. Mi bili sɛ nu gbã hã mɔ, nɛ wele kpo ámbá sɛ mi gɔ.’ ”

⁴ Gale santo 'da obe Israɛlɛ, NWA ngɔ mɔ nyanga nza vɛ̃, kɛ a kpasa lɛ ni, a tɔ̃a ni.

⁵ NWA tɔ̃a hã Obabilɔnɛ na: “Nɛ dúngú nù, nɛ nɛ kpé nu nɛ. Nɛ úsú tɛ nɛ tɛ tũ fala. Mba gɔ, le 'da nɛ 'bɔ a gã le nwa gɔ, nɛ ma 'bɔ a nwa ngɔ ogele nùnɔ gɔ.

⁶ Zã mi nɔ̃lɔ̃ zi dɛ tɛ owinɔ 'da mi, nɛ mi hã sape hã wa, ɔ nɛ kɛ wa a ogele wi ni. Mi a zi wa ti mbula 'da nɛ, nɛ nɛ ĩ̀ 'bako hã wa bi sĩ gɔ. Nɛ kala ogbɛlɛnɔ 'da wa, nɛ nɛ e dĩ tole ngbangbo zu 'baka wa.

⁷ Nɛ nɛ lengge zi na, nɛ 'bana sɛ nwa fai. Nɛ nde nɛ fà zi gulu mɛnɔ kɛ ma dɛ tɛ̃ ɛ ni gɔ, nɛ nɛ lènggè do ndɔti mɛnɔ ni gɔ.

⁸ “Aa nɛ, owi fa ɛ̃fɛ̃ tɛ winɔ, nɛ zélé mi sɛ! Nɛ dungu zi dia dungu, nɛ nɛ lengge na, mɔ kpo dɛ́ sɛ lo gɔ. Nɛ zɔ zi tɛ nɛ ɔ nɛ onwa ni, nɛ nɛ tɔ̃ na, le kpo wè kɔ̃ do le 'da nɛ gɔ. Nɛ lengge zi 'bɔ na, le 'da nɛ kpá sɛ 'bako ɔ nɛ wi fio wili gɔ, nɛ obenɔ 'da nɛ wa fé sɛ gɔ.

⁹ Nɛ nde ngamɛnɔ bɔa ni ma gbanga sɛ nɛ, nɛ ma kpa sɛ nɛ 'do tũ kpo. Le 'da nɛ ma ɔ sɛ nɛ wi fio wili ni, nɛ benɔ 'da nɛ wa fe sɛ. Gɛnɛ kɔ owi dɛ sɔ̃nɔ do owi dɛ sɔ̃ mɛnɔ wa dɛ ina, nɛ nde ma ámbá sɛ zu nɛ gɔ.

¹⁰ “Nɛ gbini zi zã nɛ do o'dã inanɔ kɛ nɛ dɛ ma ni. Nɛ nɛ lengge zi na, wele kpo zɔ́ nɛ gɔ. Hã zã 'da nɛ do ĩ ti mɛ 'da nɛ, ma hã zi gã zu hã nɛ, nɛ nɛ tɔ̃ zi na: ‘Lɛ a onwa, fo mbé wi we kɔ̃ do lɛ bina.’

¹¹ Kɔ nɛ ĩ́ na, ngamɔ ma kpa sɛ nɛ, nɛ nɛ wé sɛ we amba ma gɔ. Ngamɛ ni ma gbanga sɛ nɛ, nɛ ma 'danga mɛnɔ 'da nɛ fala kpo, nɛ nde nɛ ĩ̀ zi na, ma dɛ sɛ ni gɔ.

¹² Nɛ á tɛ nɛ ngɔ osɔ̃ mɛnɔ 'da nɛ kpá. Nɛ ndua zi yambala ma do be tɛ nɛ, nɛ nɛ kpa zi ngamɔ we nɛ. Kɔ mbe gɔ, nɛ mɛnɔ ni ma gbaka sɛ nɛ, nɛ ma hã sɛ kili hã Owi sɛnɛ nɛ.

¹³ Nɛ nɛa 'da Owi yambala sɔlanɔ fai, nɛ nɛ mbɔkɔ. Kɔ nɛ sá mɔ hã wa na, wa tɛ, hã wa kpasa nɛ. Owinɔ ni wa gɔnɔ sanga li nza sikili sikili, nɛ wa soko osɔlanɔ, nɛ wa fa na, zɛkɛ kpo kpo, nɛ lo tɔ̃ gulu mɛnɔ kɛ ma dɛ sɛ tɛ̃ ɛ ni.

¹⁴ “We ma te sɛ tɛ wa, nɛ wa bɛlɛ sɛ ɔ nɛ zɔ̃ ni. Nɛ nde wa wé sɛ we kpasa tɛ wa tɛ li we ni gɔ. Ma sɛ a be sele we na, wele ɔ́ ma gɔ, nɛ nde ma sɛ a gba nyɛa we galagula.

¹⁵ Mɛ kɛ ma dɛ sɛ owi dɛ sɔ̃nɔ kɛ nɛ nɛ 'da wa fai gɛ a ni. Wa vɛ̃ wa yu sɛ nɛ gbɔrr, nɛ wele kpo kpo a ba sɛ li wala kɛ ma wia do a ni, nɛ a la, nɛ nde wa kpásá sɛ nɛ gɔ.”