Ezai 46 - WE NU GALE 1995

Wa dɔ́nggɔ́ sɛ 'bɔ ogale bɛlɛnɔ gɔ

¹ NWA Gale tɔ́a na: “Ogalenɔ kɛ wa sa li wa na, Bɛlɛ do Nebo ni, wa do ngawi 'bɔ bina. Obabilɔnɛ wa kala sɛ okpikima galenɔ ni, nɛ wa ɛnzɛ ma dɛ li 'do pundanɔ 'da wa, nɛ wa la do ma kɔlɔ 'duli. Nɛ opundanɔ ni, wa mbɔkɔ sɛ vɛ̃ ti dĩ tole kpikimanɔ ni.

² Ogalenɔ ni wa mbɔkɔ do'do, wa wè 'bɔ tɛ kpasa tɛ wa gɔ. Owinɔ wa la do wa tɛ kɔlɔ 'duli i, ɔ nɛ kɛ wa a wi bɔlɔkɔ ni.

³ “Aa nɛ, obe Israɛlɛ, kɛ nɛ 'bana nza ni, nɛ zélé mi sɛ! Mi ndua zi zɔ mɔ tɛ nɛ, do ngba soe kɛ wa kua nɛ ni.

⁴ Mi a Gale 'da nɛ, nɛ mi zɔ sɛ mɔ tɛ nɛ fai. Mi zɔ sɛ mɔ tɛ nɛ gbaa na, zu nɛ kutu mbu, nɛ nɛ dɛ gbɛlɛ. Mi a mi dɛa nɛ, nɛ mi a wi zɔ mɔ tɛ nɛ. Mi gbaka sɛ nɛ, nɛ mi kpasa sɛ nɛ kɔ ngamɔ.

⁵ “Wi kɛ a wia kɔ̃ do mi nwa, wi a wio nde? Wi kɛ nɛ wia we we a do mi, nɛ lɛ we kɔ do a ni, wi a wio nde?

⁶ Owinɔ wa fì nu koe 'da wa, nɛ wa kala mɔ mbali do fɛ̃a mɔ bolo, nɛ wa we dĩ nɛ ngɔ kilo. 'Do nɛ, nɛ wa hã ma hã wi dɛ dula, nɛ a dolo ma do kpikima. Nɛ wa gu nù ti kpikima ni, nɛ wa sambala ma.

⁷ Nɛ wa ba gale ni dɛ ngɔ 'baka wa, nɛ wa nɛ, nɛ wa zĩ a nù, nɛ a 'bana dɛ di ni, nɛ nde a yɛ́kɛ́ tɛ̃ a gɔ. Fala kɛ wele sa mɔ hã a, nɛ nde a gésé nu nɛ gɔ, nɛ a kpásá wele kɔ ngamɔ gɔ.

⁸ “Aa nɛ, owi dɛ 'dã mɛnɔ, ta zu nɛ tɛ èlè ngɔ mɛnɔ kɛ mi dɛa zi ma ni gɔ.

⁹ Nɛ fá ta zu nɛ ngɔ mɛnɔ kɛ mi dɛa zɛ́ ma dati belee hã nɛ ni, nɛ nɛ ĩ sɛ na, mi zu mi kpo a Gale, nɛ fo gele gale olo mi bina.

¹⁰ Ndo do nyanga mɛnɔ vɛ̃, nɛ mi tɔ̃a we mɛnɔ kɛ mi 'dafa ma ni, do kɛnɔ ma dɛ sɛ tɛ̃ ɛ ni. Mi tɔ̃a zi 'bɔ na, mɛnɔ kɛ mi 'dafa ma ni, ma dɛ sɛ tɛ̃ ɛ, nɛ mi dɛ sɛ linggamɔ zu mi.

¹¹ Mi sa mɔ hã wele kpo na, a yolo ndũu tɛ si 'biti gba wese, kɔ a tɛ. Nɛ wi ni a te sɛ ngɔ ogele winɔ ɔ nɛ ziki ni, nɛ a dɛ sɛ mɛnɔ kɛ mi 'dafa ma ni. Mi tɔ̃a ni ia, ma dɛ sɛ tɛ̃ ɛ.

¹² Aa nɛ, owi nga zunɔ, kɛ nɛ lengge na, kɔ tũ kpasi 'da nɛ 'bana nyɛlɛ wena ni, nɛ zélé mi sɛ!

¹³ Mi 'dafa na, mi kpasa nɛ ngangga gɛ, nɛ mi kɔla we dɛ ma ia. Mi kpasa sɛ nɛ owinɔ 'da mi, nɛ mi gese sɛ nɛ dɛ tɛ Yeruzalɛmɛ. Nɛ nɛ kpa sɛ dɔ̃lɔ̃ li tɛ ngɔ nùi 'da nɛ.”