Ezai 45 - WE NU GALE 1995

Gale saka Sirusi we dɛ to hã a

¹ NWA Gale saka Sirusi, nɛ e a we dɛ to hã a. A hã ngawi hã a na, a bi ogele winɔ, nɛ a nɛ ngɔ wa, nɛ a fo Onwanɔ 'da wa tɛ dɛa to nwa. Nɛ NWA Gale a dɛ sɛ 'bɔ na, nu ngbo lenɔ ma fĩ, nɛ Sirusi ba ma. NWA tɔ̃a hã Sirusi na:

² “Mi do tɛ mi, mi kpe sɛ dati mɔ, nɛ mi gbɛsɛ sɛ okalanɔ do otɔ̃nɔ dati mɔ. Mi gbini sɛ nga tũ mɔ bolonɔ do mɔ bolonɔ kɛ wa kpe do nu ngbo le, nɛ wa kã do ma ni do'do.

³ Nɛ mi dɛ sɛ 'bɔ na, mɔ kálá okpamɛnɔ kɛ wa usu ma tɛ tũ falanɔ ni. Mi dɛ do mɔ na mɛ ni, nɛ mɔ ĩ sɛ na, mi a NWA. Nɛ mɔ ĩ sɛ 'bɔ na, mi, Gale 'da obe Israɛlɛ, mi sa mɔ hã mɔ do li mɔ,

⁴ nɛ mi ia mɔ na, mɔ gbáká obe Israɛlɛ, wi dɛa tonɔ 'da mi, kɛ mi saka wa ni. Gɛnɛ kɔ mɔ ĩ̀ ti mi gɔ, nɛ nde mi hã dɔ̃lɔ̃ li hã mɔ.

⁵ “NWA Gale, wi a mi zu mi kpo, fo gele gale olo mi bina. Gɛnɛ kɔ mɔ ĩ̀ ti mi gɔ, nɛ nde mi hã ngawi dɛa to hã mɔ.

⁶ Mi dɛa na mɛ ni na, owinɔ vɛ̃, yolo tɛ ndɔti nùi we hɔ tɛ sɔkpɔ nɛ, wa ĩ na, mi a NWA Gale, nɛ fo gele gale olo mi bina.

⁷ Mi dɛa sa fala do tũ fala, nɛ mi a mi hã yangga tabi ngamɔ. Wi kɛ a dɛ mɛnɔ ni vɛ̃, wi a mi NWA.

⁸ Mi tombo sɛ ngawi 'da mi na, ma zĩlĩ dɛ ngɔ nɛ, nɛ ma kpasa nɛ. Ma tɛ sɛ dɛ ngɔ nɛ ɔ nɛ tɛa kolo ni. Zã nùi ma mbɔkɔ sɛ, nɛ ma ko sɛ dia dungu, do bɔlɔ zu dɛa mɔ. Mɛnɔ kɛ mi NWA, mi dɛ ma gɛ a ni.”

Gili do wi 'bɔ kpana

⁹ 'Bako do mɔ, wi kɛ mɔ yamba we kɔ'dɔ mi kɛ mi dɛa mɔ ni. Mɔ dɛ sanga ongba mɔ ni, mɔ ɔ nɛ kpana kɛ wa 'bua ma do gili ni. Gili aka mbe wi 'bo kpana na: “Kɛ mɔ dɛ ni a ge nde” ia nde? Nɛ kpana tɔ̃a mbe hã wi 'bo ma na: “Mɔ ĩ̀ ti 'bo kpana gɔ” ia nde?

¹⁰ 'Bako do wi kɛ a tɔ̃ hã baa a na: “Mɔ kò mi de gɔ.” Tabi a tɔ̃ hã naa a na: “Mɔ kua mi ɔ nɛ we ge nde” ni.

¹¹ NWA Gale santo 'da obe Israɛlɛ, wele kɛ a ĩ ti mɛnɔ kɛ ma dɛ sɛ tɛ̃ ɛ ni, a tɔ̃a na: “Wi kɛ nɛ aka a do we ngɔ obenɔ 'da a ni, wi a mi nde? Wi kɛ nɛ ba nu nɛ hã a na, a dɛ olo nu nɛ ni, wi a mi nde?

¹² Mi zu mi kpo a mi dɛa nùi, nɛ mi dɛa 'bɔ owinɔ ngɔ nù gɛ. Mi a mi dɛa li nza, nɛ wi zɔ mɔ tɛ osɔlanɔ, wi a mi.

¹³ Mi a mi tumba Sirusi na, a nɛ hã a dɛ olo nu mi. Mi gbaka sɛ a kɔ mɛnɔ vɛ̃ kɛ a dɛ sɛ ma ni. A dɛ sɛ le Yeruzalɛmɛ dɛ olo nɛ, nɛ a da sɛ kɔ̃ a tɛ owinɔ 'da mi kɛ wa zi kɔlɔ 'duli ni na, wa si. A dɛ sɛ na mɛ ni do kɔ sila a, nɛ nde wa ha sɛ mbili hã a sɛ nɛ de gɔ. Mi, NWA ngɔ mɔ nyanga nza vɛ̃, mi tɔ̃a ni.”

Gale tati a wele kɛ ngɔ nù Israɛlɛ

¹⁴ NWA Gale tɔ̃a hã obe Israɛlɛ na: “Mɔ olo dɛa tonɔ 'da Oezipeto, do Oetiopi, do Oseba, wele nɛ sɛ a mɔ́ nɛ. Oseba kɛ wa dulu nɛ ge nde ni, wa sɛ a ongbánɔ 'da nɛ. Nɛ fi sɛ fɛlɛ gɛlɛ wa, nɛ nɛ e sɛ mbula ngɔ wa. Wa gu sɛ nù dati nɛ, nɛ wa tɔ̃ na: ‘Ngbongbo Gale tati a wele kɛ 'da nɛ. Fo gele gale olo a bina.

¹⁵ Gale 'da nɛ obe Israɛlɛ, kɛ a kpasa nɛ owinɔ 'da a ni, a a Gale kɛ a usu tɛ̃ a usu.

¹⁶ Owinɔ kɛ wa dɛ kpikimanɔ ni, zu wa ma dĩlĩ sɛ, nɛ wa vɛ̃ wa kpa sɛ sape.

¹⁷ Nɛ nde NWA Gale, a kpasa nɛ obe Israɛlɛ, nɛ kpasi ni ma 'bana sɛ fai. Nɛ kpá sɛ sape fala kpo gɔ.’ ”

¹⁸ NWA dɛa li nza, nɛ a zu a kpo a Gale. A dɛa 'bɔ nùi, nɛ a 'dafa ma, nɛ ma nganda. Nɛ nde a dɛ̃ ma na, ngɔ nɛ ma ɔ iko gɔ. A 'dafa ma na, owele wa wia we ɔ ngɔ nɛ. Nɛ a tɔ̃a na: “Mi a NWA, fo gele gale olo mi bina.

¹⁹ Mi tɔ̃́ we do usu nɛ gɔ, nɛ mi ùsù linggamɔ zu mi gɔ. Mi bà nu mi hã nɛ obe Israɛlɛ na, nɛ fa mi tɛ fala kɛ ma ɔ iko, nɛ fo mi i mɔ bina ni gɔ. Mi a NWA, mi tɔ̃ gbãlã we, nɛ mi be gulu mɛnɔ dɛ nza do bɔlɔ nɛ.”

Ogele winɔ wa kifi sɛ sila wa

²⁰ NWA Gale tɔ̃a na: “Aa nɛ, ogele winɔ, kɛ nɛ 'bana nza ni, nɛ mbá li ngba nɛ, nɛ nɛ tɛ we tɔ̃ ngbangga 'da nɛ. Nɛ, owinɔ kɛ nɛ ba kpikima galenɔ, nɛ nɛ yɛnggɛ do ma, nɛ nɛ sambala galenɔ kɛ wa wè tɛ kpasa nɛ gɔɛ ni, fo mɔ kpo zã zu nɛ bina.

²¹ Nɛ tɛ́, hã nɛ tɔ̃ ngbangga 'da nɛ. Nɛ bá zã zu we, nɛ nɛ bé dia gulu we 'da nɛ dɛ nza. Wi kɛ a tɔ̃a zɛ́ gulu mɛnɔ kɛ ma dɛ tɛ̃ ɛ sɔɛ gɛ zɛ́ dati belee ia ni, wi a wio nde? Wi tati a mi NWA Gale, kɛ mi kpasa owinɔ 'da mi ni. Nɛ fo gele gale olo mi bina.

²² “Nɛ, owinɔ tɛ ndɔti nùi 'di ni, nɛ síkí li nɛ dɛ 'da mi, nɛ nɛ kpasa sɛ. Mba gɔ, Gale wi a mi zu mi kpo. Fo gele gale olo mi bina.

²³ Mi kpo mbulu, nɛ ma dɛ gbãlã we, nɛ nde mi kpóló nu mi gɔ. Mi tɔ̃a dɛ nza na: Owinɔ vɛ̃ wa tɛ sɛ, nɛ wa gu gba zugolo dati mi. Nɛ wa kana sɛ tɛ wa dati mi na, lo élé sɛ dɛ olo nu mi gɔ.

²⁴ “Owinɔ wa tɔ̃ sɛ na, ngawi do bɔlɔ zu dɛa mɔ, ma yolo kɔ̃ mi NWA. Nɛ owanɔ kɛ wa dɛa zi dã, nɛ zã wa nɔ̃lɔ̃ zi dɛ tɛ mi ni, wa kpa sɛ sape, nɛ wa kpolo sɛ tɛ wa dɛ 'da mi.

²⁵ Nɛ mi zɔ sɛ obe zã Yakɔbɔ vɛ̃ ɔ nɛ owi bɔlɔ zu. Hã wa zɔ ni, nɛ wa dɔnggɔ sɛ mi.”