Ezai 44 - WE NU GALE 1995

NWA zu a kpo a Gale

¹ NWA Gale tɔ̃a na: “Aa nɛ, obe Israɛlɛ, nɛ zélé mi sɛ! Nɛ a owinɔ kɛ mi saka nɛ, nɛ nɛ a owi dɛa tonɔ 'da mi.

² Mi NWA, mi a mi dɛa nɛ. Mi 'dafa nɛ kɔ zã naa nɛ, nɛ mi tɛ gbaka nɛ fai. Nɛ tɛ dɛ̀ kili gɔ. Mi saka nɛ, nɛ mi kɔ̃a gɛnɛ nɛ, nɛ nɛ a Owi dɛa tonɔ 'da mi.

³ “Mi dɛ sɛ na, kolo ma tɛ kɔ lenɔ, kɛ fo lì kɔ nɛ bina ni, nɛ ofua lì ma la do ngɔ nga kula nùnɔ. Mi tombo sɛ Hi Wi 'da mi dɛ ngɔ obe zã nɛ, nɛ mi wele sɛ nu mi tɛ nu fɛlɛ nɛ.

⁴ Wa gã sɛ ɔ nɛ sala tɔ̃ gã 'dɔ lì ni, nɛ wa ɔ sɛ nɛ te kɛ ma hɔa kɛ zã lì ni.

⁵ “Nɛ ogele winɔ wa tɛ sɛ, nɛ wa mba sɛ li ngba wa do nɛ, obe Israɛlɛ. Nɛ wele do wele sanga wa ni, a tɔ̃ sɛ na: ‘Mi a wi 'da NWA.’ Wele kpo kpo a ba sɛ mɔ kɔmɔ do mbɛti, nɛ a kɔma do li mi NWA dɛ ngɔ 'baka a. Nɛ a sɛ do yangga we tɔ̃ na, ɛ a wi 'da mi Gale.”

⁶ NWA ngɔ mɔ nyanga nza vɛ̃, kɛ a kpasa nɛ, obe Israɛlɛ, nɛ a kpe dati nɛ ni, a tɔ̃a na: “Gale wi a mi zu mi kpo. Mi a Gale kɛ mi ndua zi mɛnɔ vɛ̃, nɛ mi a mi Sɔkpɔ sɛ ma vɛ̃. Fo gele gale olo mi bina.

⁷ Wi kɛ a ĩ na ɛ wia kɔ̃ do mi ni, nɛ a kúlú ngɔ hã a wele we. Ndo nyanga nza, wi kɛ a wia zi we tɔ̃ we mɛnɔ kɛ ma dɛ sɛ tɛ̃ ɛ ni gbaa we hɔ Sɔkpɔ dungu nza, wi a wio nde?

⁸ Aa nɛ, owinɔ 'da mi, nɛ tɛ dɛ̀ kili gɔ. Mba gɔ, mi tɔ̃a we mɛnɔ kɛ ma dɛ sɛ tɛ̃ ɛ ni hã nɛ zɛ́ belee, nɛ nɛ a Otemɔɛnɔ 'da mi. Fo mbé gele gale olo mi bina. Nɛ gale kɛ a do ngawi ɔ nɛ mi gɛ kpo bina.”

Owi dɛ kpikimanɔ wa a oyia wi

⁹ Owinɔ vɛ̃ kɛ wa dɛ kpikimanɔ ni, wa a oyia wi 'diko. Nɛ okpikima galenɔ kɛ wa zɔ ma do dĩ ni, mɛ a omɔ yala iko. Owinɔ ni wa ĩ́ mɔ kpo gɔ, wa ɔ nɛ owi lɔa li ni. Wa kpa sɛ sape.

¹⁰ Wa dolo kpikima do mɔ bolo, nɛ wa sambala ma ɔ nɛ gale ni. Nɛ nde ki ni a mɔ yɔnda iko, fo gulu nɛ bina.

¹¹ Sape ma ba sɛ li owinɔ vɛ̃ kɛ wa dɔnggɔ kpikimanɔ ni. Owi dɛ kpikimanɔ wa a Owele iko. Nɛ tɔ̃ hã wa na, wa tɛ, hã lɛ tɔ̃ ngbangga do wa, nɛ wa vɛ̃ wa tana sɛ kili, nɛ wa kpa sɛ sape.

¹² Wi dɛ dula 'bili sanga mɔ bolo, nɛ a fi ma li we, nɛ a 'dɛnɛ ma do dɔnɔ. A 'dɛnɛ ni gbaa, nɛ ngawi 'da a ma e, nɛ a mbɔkɔ, nɛ wɔ ba a, nɛ kɔ gɛlɛ a kolo tɛ wɔ lì.

¹³ Wi sɛ mɔ ba te, nɛ a we ma do fɛlɛ, nɛ a yɔlɔ mbu tɛ nɛ, nɛ a sɛ ma do tɔ̃a nu kɔya, nɛ ma ɔ nɛ wele ni, 'Do nɛ, nɛ a ba dia bula li wi kɛ a sɛa ma ni, nɛ a e ma kɔ tɔa 'da a.

¹⁴ A gɔmɔ te sɛdrɛ we sɛ ma, tabi a nɛ zamɔ 'di, nɛ a saka te sɛnɛ, tabi te siprɛ, nɛ a gɔmɔ, nɛ a sɛ ma. Mbe gɔ, nɛ a mi te pinɛ, nɛ a 'bɔ 'da kolo na, ma tɛ dɛ zu nɛ, hã ma gã sɛ nɛ de.

¹⁵ Otenɔ ni, winɔ wa gɔmɔ ma, nɛ mbe nɛ wa dã do we, nɛ wa ɔ ma, tabi wa gi do nyɔngɔmɔ. Nɛ mbe nɛ wa sɛ 'bɔ do kpikima, nɛ wa gu nù ti ma, nɛ wa sambala ma.

¹⁶ Na mɛ ni, mbe ngindo tenɔ ni, wa dã ma do we, nɛ wa gi do sa'de, nɛ wa nyɔngɔ ma, nɛ zã wa hɛ̃. Tabi wa ɔ we ni, nɛ wa tɔ̃ na: “Lɛ nɛ́ ɔ mbe we gɛ, ma nyɛ de wena!”

¹⁷ Nɛ tala ngindo te ni, wa sɛ ma do kpikima gale, nɛ wa gu nù ti ma, nɛ wa sambala ma na: “Mɔ a gale 'da lɛ, mɔ kpásá lɛ!”

¹⁸ Fo mɔ kpo zã zu Owi sɛ kpikimanɔ bina, nɛ wa ĩ́ gulu mɛnɔ wa dɛ ma ni gɔ. Gbãlã zã wa bi bi, nɛ fo gbali wa na wa zɔ do 'dã mɔ, nɛ wa ĩ ti gulu nɛ bina.

¹⁹ Owinɔ ni wa lénggé mɔ gɔ, wa a oyia wi, nɛ wa do hã bina. Wa ĩ́ mɔ kpo na, mɛ lo gu nù ti nɛ gɛ, mɛ a te yala iko ni gɔ. Mba gɔ, mbe ngindo te ni, wa dã ma do we, nɛ wa dɔ do mapa, nɛ wa gi 'bɔ do Sanggo, nɛ wa nyɔngɔ ma. Nɛ tala ngindo te wa sɛ do okpikimanɔ kɛ wa gu nù ti nɛ ni. Nɛ nde wa, lénggé ki ni gɔ.

²⁰ Zu wa ma vĩ do'do, nɛ wa lénggé mɔ do dia nɛ gɔ. Mɛ kɛ wa gbini zã wa do ma, mɛ a mɔ yala ɔ nɛ bũ we ni. Okpikima galenɔ ni, ma wè tɛ kpasa wa gɔ. Nɛ nde wa kɔ̃̀ we tɔ̃ na, mɛ kɛ lo ba dɛ kɔ̃ lo gɛ, mɛ a gale bɛlɛ iko ni gɔ.

Obe Israɛlɛ wa a wi dɛa tonɔ 'da NWA

²¹ NWA Gale tɔ̃a na: “Aa nɛ, obe Israɛlɛ, ta zu nɛ tɛ èlè na, nɛ a Owi dɛa tonɔ 'da mi ni gɔ. Mi dɛa nɛ na, nɛ dɛ to hã mi, nɛ ta zu mi èlè ngɔ nɛ gɔ.

²² Mi gbɛa 'dã mɛ 'da nɛ, nɛ ma bisi vɛ̃ ɔ nɛ kɛ tũ kolo bisi nɛ ni. Nɛ nde mi aka nɛ na, nɛ kpolo tɛ nɛ dɛ 'da mi. Mba gɔ, wi kpasa nɛ, wi a mi zu mi kpo.”

²³ Aa mɔ, li nza ngɔ i, mɔ dɛ́ yangga! Aa nɛ, gba 'du kɔ̃nɔ ngɔ nù gɛ, nɛ zɛ́ kɔ̃ nɛ do yangga! Aa nɛ, okalanɔ do otenɔ zamɔ gɛ, nɛ dɛ́ yangga, nɛ nɛ zɛ́ kaliã! Mba gɔ, NWA Gale kpasa owinɔ 'da a, obe Israɛlɛ, nɛ ma bia dɔ̃lɔ̃ li 'da a.

NWA a wele mɛnɔ kɛ ma la ngɔ nù gɛ

²⁴ NWA Gale tɔ̃a hã obe Israɛlɛ na: “Mi a NWA, mi a wi kpasa nɛ. Mi zu mi kpo a mi dɛa nɛ. Mi a NWA, mɛnɔ nyanga nza gɛ vɛ̃, mi a mi dɛa ma. Mi zu mi kpo a mi dɛa li nza do nù, nɛ wele kpo gbàkà mi tɛ dɛ ma gɔ.

²⁵ Mi dɛa na, mɛnɔ kɛ owi dɛ sɔ̃nɔ wa tɔ̃ na, ma hɔ sɛ ni, ma tɛ dɛ̃ tɛ̃ ɛ gɔ. Nɛ mi vĩ zu Owi zɔ gulu mɛnɔ. Mi bɛ̃a gɛnɛ we 'da owi siki gbãlã zãnɔ, nɛ mi bia hã wa na, hã zã 'da wa ma yala iko.

²⁶ Nɛ nde fala kɛ wi dɛa toe 'da mi tɔ̃ we, nɛ mi dɛ ɔ nɛ kɛ a tɔ̃a ni. Mɛnɔ kɛ mi 'dafa ma, nɛ mi tombo wi tonɔ 'da mi na, wa be gulu nɛ ni, mi dɛ sɛ ma ɔ nɛ kɛ wa tɔ̃ ma ni. Mi tɔ̃a na, owele wa dɔ sɛ 'bɔ tɛ Yeruzalɛmɛ, nɛ wa 'dafa sɛ le ni dɛ olo nɛ. Nɛ olenɔ tɛ ngɔ nù Yuda ni, wa dɛ sɛ ma dɛ olo nɛ.

²⁷ Mi ba nu mi hã gba lì, nɛ ma ɔ̃sɔ̃, nɛ ma na nù.

²⁸ Mi tɔ̃a hã nwa Sirusi na: ‘Mi saka mɔ na, mɔ kpe dati owinɔ hã mi. Mɔ dɛ sɛ mɛnɔ kɛ zã mi kɔ̃a ni. Mɔ ba sɛ nu mɔ na, wa dɛ le Yeruzalɛmɛ dɛ olo nɛ, nɛ wa ndo nyanga dɛ tɔa Tɛmpɛloe.’ ”