Ezai 43 - WE NU GALE 1995

NWA Gale a kpasa sɛ owinɔ 'da a

¹ Aa nɛ, obe Israɛlɛ, NWA wele kɛ a dɛa nɛ ni, a tɔ̃a na: “Nɛ tɛ dɛ̃ kili gɔ, mi kpasa sɛ nɛ. Mi sa mɔ hã nɛ do li nɛ, nɛ nɛ a owinɔ 'da mi.

² Mi sɛ do nɛ boe 'da falanɔ vɛ̃. Na mɛ ni, fala kɛ nɛ kũ gba 'du lì, nɛ nde ma gúlú sɛ zu nɛ gɔ. Fala kɛ nɛ la do kɔ nyɛa we, nɛ nde ma bɛ́lɛ́ sɛ nɛ gɔ, nɛ galagula we ni ma á sɛ tɛ nɛ gɔ.

³ Mba gɔ, mi a NWA Gale 'da nɛ. Mi a Gale santo 'da nɛ, obe Israɛlɛ, nɛ wi kpasa nɛ, wi a mi. Mi 'dɔlɔ sɛ Oezipeto, tabi Oetiopi, tabi Oseba olo nɛ, takɔ mi fo nɛ kɔ ngamɔ.

⁴ Mi 'dɔlɔ sɛ ogele winɔ vɛ̃, takɔ mi gɔnɔ do zu nɛ. Mi dɛ ni, nɛ ma be sɛ na, mi kɔ̃ nɛ wena, nɛ nɛ ɔ li mi a dĩ, ɔ nɛ mɔ olo gã gole ni.

⁵ “Nɛ tɛ dɛ̃ kili gɔ, mi do nɛ boe. Mi mba sɛ li nɛ, owinɔ 'da mi, kɛ nɛ pɛsa zi ndũu tɛ si 'biti gba wese, do tɛ si 'biti gɛ̃a wese ni, nɛ mi gese sɛ nɛ dɛ ngɔ nùi 'da nɛ.

⁶ Mi tɔ̃ sɛ hã owinɔ tɛ si gbãlã ngɔ na, wa dá kɔ̃ wa tɛ nɛ, hã nɛ si. Nɛ mi tɔ̃ sɛ 'bɔ hã wanɔ tɛ si ba gɔtɔ na, wa tɛ bɛ̃̀ zu nɛ, owinɔ 'da mi gɔ. Nɛ nɛ yolo sɛ falanɔ vɛ̃ kɛ wa pɛsɛ do nɛ ni, nɛ nɛ si sɛ dɛ ngɔ nùi 'da nɛ.

⁷ Nɛ a owinɔ 'da mi ngboo, mi a mi dɛa nɛ vɛ̃. Mi dɛa nɛ we be dɔ̃lɔ̃ li 'da mi.”

Obe Israɛlɛ wa a Otemɔɛnɔ 'da NWA

⁸ NWA Gale tɔ̃a na: “Nɛ sá mɔ hã owinɔ 'da mi na, wa tɛ we tɔ̃ ngbangga. Gbali wa boe, nɛ nde wa zɔ̀ mɔ gɔ, nɛ zala wa boe, nɛ nde wa zélé we gɔ.

⁹ Nɛ tɔ̃́ hã ogele winɔ na, wa tɛ, hã wa mba li ngba wa we tɔ̃ ngbangga. Ogale 'da ogele winɔ wa wia tɛ tɔ̃ we mɛnɔ kɛ ma dɛ sɛ tɛ̃ ɛ ni nde? Nɛ kuti mɛnɔ ma la zi ni wa tɔ̃a zi we nɛ dati nde? Nɛ tɔ̃́ hã ogalenɔ ni na, wa tɛ do Otemɔɛnɔ 'da wa, nɛ wa be dia gulu we 'da wa dɛ nza, takɔ owinɔ wa zele, nɛ wa kɔ̃ gɛnɛ nɛ!

¹⁰ “Nɛ, obe Israɛlɛ, nɛ a Otemɔɛnɔ 'da mi. Mi saka nɛ na, nɛ ɔ Owi dɛa tonɔ 'da mi. Nɛ nde mi kɔ̃a na, nɛ ĩ ti mi, nɛ nɛ kɔ̃ na, mi a Gale zu mi kpo. Fo zi gele gale dati mi bina, nɛ fo sɛ 'bɔ mbé gale 'do mi bina.

¹¹ “NWA, wele kɛ a wia we kpasa nɛ, wi tati a mi zu mi kpo.

¹² Mi ĩ zi ti mɛnɔ kɛ ma dɛa tɛ̃ ɛ ni, nɛ mi a mi gala zi nɛ kɔ ma. Gele gale wè tɛ dɛ mɔ na mɛ ni gɔ. Nɛ nɛ a Otemɔɛnɔ 'da mi.

¹³ Mi a Gale, nɛ mi 'bana sɛ Gale fai. Wele kpo wè tɛ la mi do ngawi gɔ, nɛ wele wè tɛ kpolo mɛnɔ kɛ mi dɛ ma ni gɔ.”

NWA a fo sɛ obe Israɛlɛ tɛ Babilɔnɛ

¹⁴ NWA Gale santo 'da nɛ obe Israɛlɛ, kɛ a kpasa nɛ kɔ ngamɛnɔ ni, a tɔ̃a na: “Mi tombo sɛ wele we fo nɛ tɛ Babilɔnɛ. Osodanɔ 'da wi ni, wa 'danga sɛ ngbo nu le Babilɔnɛ, nɛ wa bi sɛ ma. Na mɛ ni, yangga 'da owi Babilɔnɛ, ma kifi sɛ hiamɔ ala nu.

¹⁵ Mi a NWA Gale santo 'da nɛ. Mi a mi dɛa nɛ, obe Israɛlɛ, nɛ nwa 'da nɛ, wi a mi.”

NWA a gba sɛ mbé li wala tɛ li go

¹⁶ Zɛ́ dati, nɛ nwa fi li wala do 'dɔ gba lì. Li wala ni, ma la zi do gbogbo 'du lì.

¹⁷ Nɛ a dɛa zi 'bɔ na, onga wi bolo wa kulu ngɔ do ombalata, do ongilingili, hã wa le 'dɔ lì. Nɛ wa tia, nɛ wa kùlù mbé nɛ ngɔ gɔ. Wa fia, nɛ wa bi ɔ nɛ kɛ nyɛa we mwinda bi ni.

¹⁸ Nɛ nde NWA tɔ̃a na: “Nɛ tɛ lènggè do mɛnɔ kɛ ma la zi dati ni gɔ, nɛ nɛ tɛ è sila nɛ ngɔ ma gɔ.

¹⁹ Mba gɔ, mi dɛ sɛ mbé mɔ, nɛ mi kɔla dɔ̃ɔ we dɛ ma ia. Nɛ zɔ sɛ ma ngangga gɛ. Mi gba sɛ wala tɛ li go, nɛ mi dɛ sɛ 'bɔ na, gba lì fo do ngɔ nga nùnɔ.

²⁰ Osa'de zamɛnɔ, do o'banggonɔ, do ogba nɔɛnɔ, wa zɔ sɛ gba lì kɛ mi dɛa na, ma fo do li goe, do ngɔ nga nùnɔ ni, nɛ wa dɔnggɔ sɛ mi. Mba gɔ, mi kɔ̃a na, mi hã lì nɔ nɔa hã owinɔ kɛ mi saka wa ni.

²¹ Wa a owinɔ 'da mi, mi a mi dɛa wa. Wa dɔnggɔ sɛ mi do zuma.”

NWA bia 'dã mɛ 'da obe Israɛlɛ dɛ nza

²² NWA Gale tɔ̃a na: “Nɛ, obe Israɛlɛ, nɛ mbɔkɔ do mi do'do. Nɛ sà mɔ hã mi gɔ.

²³ Obe batanɔ kɛ nɛ dɔa zi wa ni, nɛ dɔnggɔ zi wa do mi gɔ. Nɛ nɛ ha zi dɔnggamɛnɔ 'da nɛ hã mi gɔ. Mi kàlà nɛ do nga nɛ na, nɛ hã odɔnggamɔ hã mi gɔ. Mi ngbɔ̀kɔ̀ nɛ na, nɛ dɔ fũ yɔmbɔ hã mi gɔ.

²⁴ Nɛ òsò zi onga gole yɔmbɔnɔ we hã ma hã mi gɔ. Nɛ ha Okɛndɔ sa'denɔ 'da nɛ hã mi na, ma dɛ yangga tɛ mi gɔ. Nɛ nde nɛ dɛa 'dã mɔ, nɛ mi ba tole nɛ olo nɛ ɔ nɛ ngbá ni, nɛ ma ngba mi do'do.

²⁵ Kɔ ngangga ni, mi fua ku'da 'dã mɛnɔ ni zu nɛ, nɛ ta mi gbá sɛ 'bɔ mbé ngɔ ma gɔ.

²⁶ “Nɛ tɛ́, hã lɛ tɔ̃ ngbangga. Nɛ sá li 'dã mɛ kɛ mi dɛa do nɛ ni. Nɛ bé dia gulu we 'da nɛ dɛ nza.

²⁷ Okuti yaa nɛ, wa dɛa zi 'dã mɔ, nɛ owi kpe dati nɛ, wa bɛ̃a we nu mi.

²⁸ Ma kɛ mi hã sape hã wi ngɔ Tɛmpɛloe 'da mi, nɛ mi dɛa na, owi sɛnɛ nɛ wa tɛ, hã wa 'danga nùi 'da nɛ, obe Israɛlɛ. Nɛ mi dɛa 'bɔ na, nɛ fe dɛla ti kɔ̃ wa.”