Ezai 42 - WE NU GALE 1995

Wi dɛa toe 'da NWA

¹ NWA tɔ́a na: “Nɛ zɔ́ wi dɛa toe 'da mi, mi saka a, nɛ mi hã ngawi hã a. Mi dɛ yangga we duzu a. Hi Wi 'da mi lia kɔ a na, a e bɔlɔ zu dɛa mɔ ngɔ nù gɛ.

² A ó dã gɔ, nɛ a hé mɔ gɔ. Fala kɛ a be we hã owele, nɛ nde a wélé we do nga gɛlɛ gɔ.

³ A zɔ wele kɛ a bili ɔ nɛ sala tɔ̃, nɛ nde a lá a iko gɔ, a zɔ wi kɛ a ɔ nɛ nyɛa we mwinda kɛ ma nɛ bi bi ni, nɛ nde a bɛ̃ gɛnɛ a gɔ. A e bɔlɔ zu dɛa mɔ ngɔ nù gɛ, nɛ bɔlɔ zui ni ma ɔ sɛ fai.

⁴ A dɛ sɛ toe 'da a fai, a mbɔ́kɔ́ sɛ gɔ. A e sɛ bɔlɔ zu dɛa mɔ ngɔ nùi gɛ vɛ̃. Owinɔ kɛ lenɔ 'da wa ma nyɛlɛ wena ni, wa 'bɔ 'da a na, a be mbula hã lo.”

NWA ia sa fala hã nu kɔnggɔ owinɔ

⁵ Gale dɛa li nza do omɛnɔ li ngɔ gɛ vɛ̃. A dɛa 'bɔ nùi, do omɔ ngɔ nɛ vɛ̃, nɛ a hã kpasi hã owinɔ ngɔ nùi gɛ. NWA Gale kɛ a dɛa mɛnɔ vɛ̃ ni, a tɔ́a hã wi dɛa toe 'da a na:

⁶ “Mi NWA, mi dɛa linggamɔ kɔ zã mi, nɛ mi yula gba sala 'do mɔ. Nɛ mɔ ɔ sɛ nɛ nyɛa we ni we be wala hã ogele nu kɔnggɔnɔ. Wa zɔ mɔ, nɛ wa ĩ sɛ na, mi gba tɔkɔ do winɔ do wala 'da mɔ.

⁷ Mɔ dɛ sɛ na, owi lɔa li wa zɔ mɔ, nɛ mɔ fo sɛ owi bɔlɔkɔ kɔ tũ tɔa dɛ nza.

⁸ “Mi zu mi kpo a NWA Gale 'da mɔ. Mi kɔ̃̀ na, ogele galenɔ do okpikimanɔ, wa kpa dɔ̃lɔ̃ li kɛ ma wia do mi ni gɔ.

⁹ Wenɔ kɛ mi tɔ̃a zi ni, ma dɛa tɛ̃ ɛ ia. Ngangga ni, mi nɛ tɔ̃ 'bɔ mbé we hã mɔ, dati kɛ na ma dɛ tɛ̃ ɛ ni.”

Zuma we sambala do Gale

¹⁰ Nɛ gá mbé zuma we dɔnggɔ do nwa! Aa nɛ, owinɔ ngɔ nù gɛ vɛ̃, nɛ sámbálá a! Nɛ, owi yɛnggɛ ngɔ gba lì, nɛ sámbálá a! Nɛ, osa'denɔ do Otunu li mɛnɔ vɛ̃ ti lì gɛ, do owinɔ kɛ lenɔ 'da nɛ ma nyɛlɛ wena ni, nɛ vɛ̃ nɛ sámbálá NWA.

¹¹ Aa nɛ, owinɔ kɛ nɛ ɔ kɔ lenɔ tɛ li gba zɔ̃, do nɛ, wanɔ kɛ fala ɔi 'da nɛ tɛ Kedarɛ, nɛ gá zuma we dɔnggɔ do Gale. Nɛ, owi kɔ le Sela, nɛ dɛ́ yangga. Nɛ kũ dɛ zu kalanɔ, nɛ nɛ zɛ kɔ̃ nɛ hã Gale.

¹² Aa nɛ, owinɔ kɛ lenɔ 'da nɛ nyɛlɛ wena ni, nɛ dɔnggɔ NWA, nɛ nɛ sambala a do nga!

¹³ NWA kulu ngɔ we nɛ bolo, a gɔ nɔ ɔ nɛ nga soda ni. A he hiamɔ bolo, nɛ a be ngawi 'da a hã owi sɛnɛ a.

Gale kpua mbulu we gbaka owinɔ 'da a

¹⁴ NWA Gale tɔ̃a na: “Mi kpia nu mi 'do nɛ nyɛlɛ wena, nɛ mi gèsè nu lɛnggɛ hã owinɔ 'da mi gɔ. Nɛ nde ngangga ni, ngba soe 'da mi ma wia. Mi he sɛ mɔ nganda wena ɔ nɛ wuko kɛ a do zɛlɛ kula ni.

¹⁵ Mi gbɛsɛ sɛ otɔ̃nɔ do okalanɔ, nɛ mi dɛ sɛ na, owɔkɔsɔnɔ do otenɔ kɛ ma hɔ ngɔ kalanɔ ni, ma kolo vɛ̃. Mi dɛ sɛ 'bɔ na, ogbangɔlɔ̃ lìnɔ ma kifi li go, nɛ ondɔnɔ ma kolo na nù.

¹⁶ “Mi ba sɛ te ti owi lɔa lìnɔ, nɛ mi kã sɛ wa do li wala kɛ wa bà kuti nɛ gɔ ni. Mi dɛ sɛ na, gba tũi kɛ wa kɔ nɛ ni, ma kifi sa fala hã wa. Mi kpe sɛ gɔtɔ kɔ̃nɔ dati wa, nɛ li walanɔ 'da wa ma lɔ sɛ. Mɛnɔ kɛ mi kpua mbulu nɛ gɛ a ni. Mi dɛ sɛ ma ɔ nɛ kɛ mi tɔ̃a ni.

¹⁷ Owinɔ kɛ wa dɔnggɔ okpikimanɔ, nɛ wa sa li sɛa tenɔ na, gale 'da wa ni, wa gbɔtɔ sɛ tɛ wa dɛ 'do do sape.”

Obe Israɛlɛ wa a owi lɔa li do owi la zala

¹⁸ NWA Gale tɔ̃a na: “Aa nɛ, owi la zalanɔ, nɛ zélé mi sɛ! Nɛ, owi lɔa linɔ, nɛ 'bá li nɛ, hã nɛ zɔ mɔ!

¹⁹ Wi kɛ li a lɔa nɛa ngɔ kɛ 'da nɛ, owi dɛa tonɔ 'da mi, wi a wio nde? Nɛ wi kɛ zala a la nɛa ngɔ kɛ 'da nɛ, owi nɛ tonɔ 'da mi, wi a wio nde?

²⁰ Nɛ, obe Israɛlɛ, nɛ zɔ mɔ wena, nɛ nde nɛ ĩ̀ ti gulu mɛnɔ kɛ nɛ zɔa ni gɔ. Nɛ zele wenɔ do zala nɛ 'diko, nɛ nde nɛ ĩ́ ti gulu nɛ gɔ.”

²¹ NWA Gale, wele bɔlɔ zu dɛa mɔ, a bia hã owinɔ 'da a na, mbulanɔ 'da ɛ ma gã wena, nɛ ma de wena.

²² Nɛ nde ngangga gɛ, ogele winɔ wa tɛa, nɛ wa kala mɛnɔ 'da owinɔ 'da a. Wa kala 'bɔ owinɔ 'da a do bɔlɔkɔ, nɛ wa kpia nu wa dɛ kɔ tũ tɔa. Owinɔ 'da a wa kpa ngamɔ ti kɔ̃ Owi sɛnɛ wa, nɛ nde fo wi fo wa kɔ ngamɛ ni bina.

²³ Kɔ ngangga ni, sanga nɛ gɛ vɛ̃, wi kɛ a zele sɛ we gɛ, nɛ a gɛ zala a, nɛ a fa we ĩ ti gulu nɛ ni, wi a wio nde?

²⁴ Wi kɛ a 'dɔlɔ zi lɛ, obe Israɛlɛ, hã Owi sɛnɛ lɛ na, wa kala mɛnɔ 'da lɛ ni, wi a wio nde? Wi zi a NWA, kɛ lɛ dɛa zi 'dã mɛ dɛ 'da a ni. Gale bia zi wala hã lɛ obe Israɛlɛ, nɛ nde lɛ bà do li wala ni gɔ. A bia mbula hã lɛ, nɛ lɛ dɛ̃ ma gɔ.

²⁵ Gulu nɛ a zã a nɔ̃lɔ̃ dɛ tɛ lɛ nganda wena, nɛ lɛ kpa ngamɔ tɛ li bolo. Nɔ̃lɔ̃ zã 'da nwa ma ɔ nɛ we ni, ma bɛlɛ lɛ obe Israɛlɛ, nɛ nde lɛ ĩ̀ mɔ kpo gɔ, nɛ mɛ ma dɛa lɛ ni, ma sɔ̃̀ li lɛ gɔ.