Ezai 41 - WE NU GALE 1995

Obe Israɛlɛ wa gbini zã wa do Gale

¹ NWA tɔ̃a na: “Aa nɛ, owinɔ kɛ lenɔ 'da nɛ nyɛlɛ wena ni, nɛ kpé nu nɛ, hã nɛ zele mi sɛ. Nɛ kpala sila nɛ, kɔ nɛ tɛ dɛ kɛ zã mi nga. Nɛ dá mi, kɔ lɛ tɔ̃ ngbangga do nɛ.

² Nɛ ká mɔ tɛ si 'biti gba wese, nɛ nɛ zɔ sɛ nga wi bolo. A nɛa ngɔ owinɔ vɛ̃ li bolo. Wi ia wi ni, wi a mi gɔ nde? A bi ogele nu kɔnggɔnɔ, nɛ a kala wa, nɛ a ma Onwanɔ ti nyanga a. A dumu wa do du kɔya 'da a, nɛ a fi wa nù. Kpilinɔ 'da a ma pɛsɛ wa, ɔ nɛ kɛ bũ pɛsɛ 'bulu zɔ̃ ni.

³ A ndaka 'do wa, nɛ a la do kɔ wa ni, nɛ nde mɔ kpo dɛ́ a gɔ, nɛ nyanga a bá nù gɔ.

⁴ Wi kɛ a dɛa na, mɛ ni ma dɛ tɛ̃ ɛ a wio nde? Wi a mi NWA. Mi a mi tɔ̃a we mɛnɔ kɛ ma dɛ sɛ tɛ̃ ɛ ni. Ndo nyanga mɛnɔ, wi a mi, nɛ fala kɛ mɛnɔ ma Sɔkpɔ sɛ ni, nɛ nde mi sɛ 'bɔ boe.

⁵ “Owinɔ kɛ lenɔ 'da wa nyɛlɛ wena ni, wa zɔa mɛnɔ kɛ mi dɛa ma ni, nɛ wa tana kili, nɛ wa mba li ngba wa.

⁶ Owi dɛ kpikimanɔ wa gala ngba wa, nɛ wa nganda sila ngba wa tɛ li dɛa tonɔ 'da wa.

⁷ Wi sɛ te hã kpã sila hã wi dolo mɔ mbali, nɛ wi dɛ dula hã kpã sila hã wi 'dɛnɛ mɔ bolo, nɛ a na, ma a dia. 'Do nɛ, nɛ wa bɛ̃lɛ̃ kpikima ni, nɛ ma yolo do nyanga ɛ.

Obe Israɛlɛ, nɛ tɛ dɛ̀ kili gɔ

⁸ “Aa nɛ, obe Israɛlɛ, nɛ zélé mi sɛ! Nɛ a Owi dɛa tonɔ 'da mi, nɛ a owinɔ kɛ mi saka nɛ. Nɛ a obe zã Abrahama kɛ a zi a yali ngba mi.

⁹ Mi kala zi nɛ tɛ ndɔti nùi 'di, nɛ mi si do nɛ. Nɛ zi a ndũu nyɛlɛ wena, nɛ mi sa mɔ hã nɛ, nɛ mi tɔ̃ hã nɛ na: ‘Mi bɛ̃̀ gɛnɛ nɛ gɔ, nɛ nde mi saka nɛ, nɛ nɛ a Owi dɛa tonɔ 'da mi.’

¹⁰ Nɛ tɛ dɛ̀ kili gɔ, mba gɔ, mi do nɛ boe. Da dɛ kɔ kili bá nɛ gɔ, we kɛ mi a Gale 'da nɛ. Mi hã sɛ ngawi hã nɛ, nɛ mi gala sɛ nɛ. Ngawili kɔ̃ mi ma si sɛ ngɔ, nɛ ma amba sɛ zu nɛ kɔ ngamɔ.

¹¹ “Owi sɛnɛ nɛ, wa te sɛ li bolo, nɛ wa kpa sɛ sape. Owinɔ kɛ wa bi sɛ nɛ ni, wa fe sɛ, nɛ wa kumu.

¹² Fo sɛ 'bɔ mbé wa ngɔ nù gɛ bina, nɛ mɔ kpo 'báná sɛ olo wa gɔ.

¹³ Mi a NWA Gale 'da nɛ, mi tɛ yolo gba sala 'do nɛ, nɛ mi tɔ̃ hã nɛ fai na: ‘Nɛ tɛ dɛ̀ kili gɔ, we kɛ mi gala sɛ nɛ.’ ”

NWA a gala sɛ obe Israɛlɛ

¹⁴ nwa tɔ̃a na: “Aa nɛ, obe Israɛlɛ, nɛ dɛ̀lɛ̀ gɔ, nɛ nɛ ngàndà gɔ. Owinɔ wa zɔ nɛ li wa ɔ nɛ otɔlɔfɛ ni iko, nɛ nde nɛ tɛ dɛ̃ kili gɔ. Mba gɔ, mi Gale santo 'da nɛ Oisraɛlɛ, mi gala sɛ nɛ, nɛ mi kpasa nɛ.

¹⁵ Mi dɛ sɛ na, nɛ nganda ɔ nɛ gogo mbé mɔ bolo ni. Nɛ zã sɛ okalanɔ dɛ nù, nɛ nɛ pɛsɛ sɛ ma. Nɛ gbini sɛ otɔ̃nɔ, nɛ nɛ nũlũ sanga nɛ, ɔ nɛ kɛ wa nũlũ sanga 'bulu zɔ̃ ni.

¹⁶ Nɛ pɛsɛ sɛ ma, nɛ gba bũ kamba ma kala sɛ ma la do nɛ. 'Do nɛ, nɛ nɛ dɛ sɛ yangga, we kɛ mi a Gale 'da nɛ. Nɛ nɛ sambala sɛ mi, Gale santo 'da nɛ Oisraɛlɛ.”

Li go ma kũ sɛ do waya

¹⁷ “Owi sãnɔ do owi 'bakonɔ wa fa lì we nɔ ma zãa, nɛ kɔ gɛlɛ wa ma kula kparr. Nɛ mi NWA, mi gisa hã wa na, mi, Gale 'da obe Israɛlɛ, mi lá sɛ wa gɔ.

¹⁸ Mi dɛ sɛ na, gã lì yolo ngɔ kalanɔ kɛ fo wɔkɔsɔ ngɔ nɛ bina ni, hã ma fo dɛ nù nga. Mi dɛ sɛ 'bɔ na, o'de ma hɔ go'do gbangɔlɔ̃. Na mɛ ni, li go ma kũ sɛ do waya, nɛ nga nùnɔ ma kifi be kɔla lì.

¹⁹ Mi dɛ sɛ na, ote sɛdrɛ, do kasiã, do olivɛ hɔ tɛ li go 'di. Nɛ mi dɛ sɛ 'bɔ na, falanɔ kɛ fo lì tɛ nɛ bina ni, ma 'bɔ do ote kpi do kpi. Otenɔ kɛ ma ko dia wala te, do kɛnɔ wa dɛ do ma'baya, do kɛnɔ nwá nɛ ma 'bɔ de wena ni, ma hɔ sɛ di ni.

²⁰ Owinɔ wa zɔ na mɛ ni, nɛ wa ĩ sɛ na, wi a mi nwa, kɛ mi a Gale santo 'da nɛ Oisraɛlɛ ni, mi a mi dɛa mɛnɔ ni.”

NWA a hã sɛ etumbu hã ogale bɛlɛnɔ

²¹ NWA Gale, kɛ a a nwa ngɔ nù Israɛlɛ, a tɔ̃a na: “Aa nɛ, galenɔ 'da ogele nu kɔnggɔnɔ, nɛ tɔ̃́ gulu we 'da nɛ, nɛ nɛ be ngawi 'da nɛ.

²² Nɛ ngbɔ́ dɛ 'di nga, nɛ nɛ tɔ̃ gulu mɛnɔ kɛ ma dɛ sɛ tɛ̃ ɛ ni, takɔ lɛ ĩ ti ngba soe kɛ ma dɛ sɛ do tɛ̃ ɛ ni. Nɛ hɔ́ dɛ wila fala, kɔ nɛ tɔ̃ gulu mɛnɔ kɛ ma la zi ni.

²³ Nɛ tɔ̃́ we mɛnɔ kɛ ma hɔ sɛ 'do gɛ ni hã lɛ, nɛ lɛ ĩ sɛ na, nɛ a ogale ngboo. Nɛ dɛ́ mbe de mɔ tabi 'dã mɔ kpo, takɔ ma hã kili hã lɛ, hã lɛ ɔngbɔ ma.

²⁴ Nɛ li mi a mɔ gɔ, nɛ mɛnɔ kɛ nɛ dɛ ma ni, mi zɔ ma yala iko. Owinɔ kɛ wa dɔnggɔ nɛ ni, wa dɛ oyia dɛa mɔ iko.

²⁵ “Nɛ zɔ́, mi saka wele kpo na, a yolo do si 'biti gba wese, kɔ a tɛ. Wa ĩ ti a i mɔ de wena. Nɛ wi ni ndua tɛ ma ia. Mi dɛ sɛ na, a hɔ do kɛ si gbãlã ngɔ, kɔ a tɛ we bi winɔ. A tɛ sɛ, nɛ a ma sɛ ogã wi ngɔ lenɔ ti nyanga a ɔ nɛ wi 'bo kpana ma do gili ni.

²⁶ Sanga nɛ vɛ̃ gɛ, wi kɛ a tɔ́a zi we mɛ kɛ ma dɛ sɛ tɛ̃ ɛ ni, takɔ lɛ kɔ̃ gɛnɛ we 'da a ni wi a wio nde? Wele kpo sanga nɛ tɔ̃̀ we gɔ, wele kpo wèlè we ngɔ ma gɔ.

²⁷ Nɛ nde mi a kuti wi tɔ̃ lɛnggɛ gɛ hã obe Israɛlɛ. Mi tumba wele do to hã Owi Yeruzalɛmɛ na: ‘Onya nɛ wa tɛ si ma.’

²⁸ “Mi ka mɔ tɛ ogalenɔ ni, nɛ nde mbe kpo 'bã́ nu a we wele we gɔ. Mi aka wa, nɛ fo wi gese we bina.

²⁹ Mi zɔ ogalenɔ ni li mi yala iko, wa wè tɛ dɛ mɔ kpo gɔ. Okpikimanɔ ni, wa do ngawi bi sĩ bina.”