Ezai 40 - WE NU GALE 1995

Lɛnggɛ we mbɔkɔ sila obe Israɛlɛ

¹ NWA Gale tɔ̃a hã wi gba olo nu a na: “Mɔ nɛ́, kɔ mɔ hã ngawi hã owinɔ 'da mi, nɛ mɔ dɛ na, sila wa gɛ̃.

² Mɔ zɛ́ nu mɔ hã Owi Yeruzalɛmɛ na, etumbui kɛ mi NWA, mi hã zi hã wa ni, ma Sɔkpɔ vɛ̃ ia. Ngamɛ wa kpa zi olo 'dã mɛnɔ 'da wa ni, ma la li ngele, nɛ ma wia ia.”

³ Mi zele gɛlɛ wele tɛ he mɔ na: “Nɛ 'dáfá wala li gba zɔ̃ 'di! Nɛ dɛ́ li wala ngɔ nga nùnɔ, nɛ nɛ e hã NWA Gale 'da lɛ, kɛ a tɛ tɛ nɛ ni.

⁴ Nɛ kpé gbangɔlɔ̃nɔ, nɛ gbɛ́sɛ́ kalanɔ do otɔ̃nɔ. Nɛ dɛ́ na, okalanɔ do ogbangɔlɔ̃nɔ ma kifi mbɛ nù.

⁵ Mba gɔ, dɔ̃lɔ̃ li 'da NWA ma hɔ sɛ, nɛ owinɔ vɛ̃ wa zɔ sɛ ma. Wenɔ kɛ NWA tɔ̃a gɛ a ni.”

⁶ Mi zele 'bɔ gɛlɛ wele tɛ tɔ̃ na: “Mɔ tɔ̃́ toe!” Nɛ mi aka a na: “Mi tɔ̃ to ki nge nde?” Nɛ a na, mi tɔ̃ toe gɛ na: “Wele ɔ nɛ wɔkɔsɔ ni, a dúngú nza 'do nɛ nyɛlɛ gɔ. Owele wa ɔ́ ngɔ nù gɛ ngboo gɔ, wa ɔ nɛ odo te ni.

⁷ NWA tombo bũ nu a, hã ma a tɛ wɔkɔsɔnɔ, tabi tɛ odo tenɔ, nɛ ma kolo do'do. Na mɛ ni, wele ɔ tɛ mɛ 'bɔ nɛ wɔkɔsɔ ni.

⁸ Mɛ a gbãlã we, wɔkɔsɔ do odo te ma ku kula, nɛ nde we nu Gale 'da lɛ ma 'bana sɛ fai.”

Dia sako we Owi Yeruzalɛmɛ

⁹ Aa nɛ, owi Yeruzalɛmɛ, nɛ kũ dɛ ngɔ ngala kala 'di, nɛ nɛ tɔ̃ dia sakoe gɛ dɛ nza. Nɛ tɔ̃ ma do nga gɛlɛ, nɛ nɛ tɛ dɛ̀ kili gɔ. Nɛ tɔ̃ hã Owi ngɔ nù Yuda na, Gale 'da wa tɛ tɛ ma.

¹⁰ Nɛ zɔ́ NWA Gale, a tɛ tɛ nɛ do ngawi we dungu nwa ngɔ nù gɛ. A tɛ do owinɔ kɛ a kpasa wa ni.

¹¹ A kpe dati owinɔ, ɔ nɛ wi zɔ mɔ tɛ obata ni. A be kɔ a, nɛ wa mba li ngba wa. A kala obe batanɔ dɛ kɔ a, nɛ a zɔ mɔ tɛ onaa batanɔ, kɛ wa ama benɔ do dia nɛ ni.

Gale 'da obe Israɛlɛ gã la mɔ vɛ̃

¹² Wi kɛ a wia we so gba lì dɛ ti kɔ a, nɛ a we 'da gã nɛ ni, wi a wio nde? Wi kɛ a wia we we 'da du li nza do gbãlã zu kɔ a, wi a wio nde? Wi kɛ a wia we so fumbɛlɛnɔ ngɔ nù gɛ dɛ kɔ kɔpɔ, nɛ a we dĩ nɛ, wi a wio nde? Wi kɛ a wia we e kalanɔ, do otɔ̃nɔ ngɔ kilo, we ĩ ti dĩ nɛ, wi a wio nde? Wele kpo wè tɛ dɛ mɛnɔ ni gɔ.

¹³ Wele wia we be mɔ hã nwa, sɛ nɛ a dɛ ma de nde? Wele wia we tɔ̃ mbula hã NWA ngɔ mɛnɔ kɛ a 'dafa ni nde?

¹⁴ Wi kɛ Gale wia we aka a na, a be gulu mɛnɔ hã ɛ, sɛ nɛ ɛ ĩ ti dɛ ma de ni, wi a wio nde?

¹⁵ Ogele nu kɔnggɔnɔ ngɔ nù gɛ wa dati Gale a mɔ gɔ. A zɔ wa li a ɔ nɛ gbãlã lì kɛ ma zĩ nù ni. Owinɔ kɛ lenɔ 'da wa nyɛlɛ nɛ ge nde ni, wa dĩ̀lĩ̀ li a gɔ, wa ɔ nɛ gbãlã kɛnzɛ ni.

¹⁶ Osa'de zamɛnɔ kɔ kɔla Libanɛ vɛ̃, wa dɛlɛ na, wa hã wa do dɔnggamɔ hã Gale 'da lɛ gɔ. Nɛ otenɔ zã kɔla ni, ma dɛlɛ na, wa dɔ do dɔnggamɔ hã Gale 'da lɛ gɔ.

¹⁷ Onu kɔnggɔ winɔ vɛ̃ ngɔ nù gɛ, wa dati nwa a mɔ gɔ, wa do dĩ li a bina.

¹⁸ Wi kɛ wa wia we we Gale do a ni, wi a wio nde? Nɛ wi kɛ wa wia we we tɛlɛ tɛ̃ a do a ni, wi a wio nde?

¹⁹ A wè kɔ̃ do okpikimanɔ kɛ wele dɛa ma do kɔ̃ ɛ, nɛ a nãlã mɔ mbali tɛ nɛ, nɛ a fi sɛni fɛ̃a mɔ bolo gɛlɛ ma ni gɔ.

²⁰ Wi kɛ a a wi sã iko, nɛ a wè we oso mɔ mbali tabi fɛ̃a mɔ bolo gɔ ni, a fa nga te, kɛ lonɔ wa lí ma gɔ ni, nɛ a hã hã wi sɛ te na, a sɛ do kpikima.

²¹ Nɛ ĩ̀ ti nwa gɔ nde? Nɛ zèlè lɛnggɛ 'da a na, a dɛa mɛnɔ nyanga nza gɛ gɔ nde? Nɛ nɛ ĩ̀ gulu mɛnɔ nyanga nza gɛ kɛ a dɛa ma ni gɔ nde?

²² NWA dungu ngɔ kpongbo nwa 'da a ndũu tɛ li ngɔ 'di. Nɛ a zɔ winɔ ngɔ nù nga, wa ɔ be sĩ nɛ olaka ni. A tanda li nza ɔ nɛ gbau tande ni, we ɔ dɛ ti nɛ.

²³ A fua ogã winɔ ngɔ nù gɛ tɛ dɛa to nwa 'da wa, nɛ wa hɔ mɔ yala.

²⁴ Wa ɔ nɛ be bɔlɔ te kɛ liã nɛ tɛ bà nù gɔ ni, ma kolo, nɛ nwa tombo gba bũ kamba, nɛ ma kala ma hau ɔ nɛ zɔ̃ ngɔ tɔa ni, nɛ ma la do ma.

²⁵ Gale santo aka na: “Nɛ wia we we mi do wio nde? Wi kɛ a wia kɔ̃ do mi ni a wio nde?”

²⁶ Nɛ ká mɔ dɛ li nza ngɔ 'di, kɔ nɛ zɔ́ sɔlanɔ. Wi dɛa ma a wio nde? Gɛnɛ kɔ ma dɔa ɔ nɛ Owi bolo, nɛ nde NWA ĩ ti li ma kpo kpo, nɛ ma vɛ̃ dɛ tɛ kɔ a. Ngawi 'da a ma la mɔ vɛ̃, kɔ fala kɛ a ba nu a, nɛ nde sɔla kpo zɔ́lɔ́ we to nɛ gɔ.

Obe Israɛlɛ wa kpa sɛ mbé ngawi

²⁷ Aa nɛ, obe Israɛlɛ, nɛ ala nu nɛ na: “NWA zɔ́ ngamɛ lɛ kpa gɛ gɔ. A zɔ́ dia gulu we 'da lɛ gɔ.” Gulu kɛ nɛ tɔ̃ ni we ge nde?

²⁸ Nɛ ĩ̀ gɔ nde? Nɛ nɛ zèlè gɔ nde? NWA Gale fai boe, a dɛa mɛnɔ nyanga nza gɛ vɛ̃. A mbɔ́kɔ́ fala kpo gɔ, nɛ a do hã zã kɛ fo wi hɔ ndɔti nɛ bina.

²⁹ A hã mbé ngawi hã wi kɛ a mbɔkɔ do'do, nɛ a 'bɔ do ngawi bina ni.

³⁰ Gɛnɛ kɔ obe zagbãlãnɔ, nɛ nde wa wia tɛ mbɔkɔ nɛ, nɛ wa kɔ nyanga wa, nɛ wa te.

³¹ Nɛ nde NWA zɔ owinɔ kɛ wa a sila wa ngɔ a ni, nɛ a hã mbé ngawi hã wa, nɛ wa nganda ɔ nɛ oziki, kɛ wa bũlũ dɛ ngɔ i nyɛlɛ wena ni. Wa yu gbaa, nɛ nde wa mbɔ́kɔ́ gɔ, Wa yɛnggɛ gbaa, nɛ nde wa yóló nù gɔ.