Ezai 39 - WE NU GALE 1995

Nwa ngɔ nù Babilonia tumba Owele hã Ezekiasi

¹ Do fala nɛ ni, nɛ Merodakɛ-Baladanɛ, be 'da Baladanɛ, kɛ a a nwa ngɔ nù Babilonia ni, a zila na Ezekiasi ba zi zɛlɛ, kɔ a kpasa olo nɛ. Nɛ a sa mɔ hã Owi nɛ tonɔ 'da a, nɛ a tombo wa do mbɛti hã Ezekiasi do omɔ we dɔnggɔ do a.

² Ezekiasi zɔa ni, nɛ ma de tɛ̃ a wena. Nɛ a kpia ti owinɔ ni, nɛ a le do wa kɔ tɔa kɛ a usu do mɔ gã golenɔ, do mbili, mɔ mbali, yɔmbɔ, dia unu nɔ, do mɔ bi bolonɔ 'da a ni. Nɛ a bia mɛnɔ vɛ̃ kɛ a usu ma ni hã wa. A bia mɔ kɔ tɔa 'da a do mɔ ngɔ nùi 'da a hã wa vɛ̃, nɛ a ùsù mɔ kpo do wa gɔ.

³ 'Do nɛ, nɛ Ezai, wi gba olo nu Gale nɛa 'da nwa Ezekiasi 'di, nɛ a aka a na: “Owinɔ gɛ wa yula do nde? Nɛ wa tɔ̃a hã mɔ na ge nde?” Nɛ Ezekiasi gisa na: “Wa yula gbaa tɛ ngɔ nù Babilonia, ma nyɛlɛ wena.”

⁴ Nɛ Ezai 'bɔ na: “Nɛ mɛ kɛ wa zɔa ma kɔ tɔa 'da mɔ, mɛ a ge nde?” Nɛ Ezekiasi na: “Wa zɔa mɛnɔ kɔ tɔa 'da mi ni vɛ̃. Nɛ mi bia kpamɛnɔ 'da mi hã wa vɛ̃, mi ùsù mɔ kpo do wa gɔ.”

⁵ Nɛ Ezai tɔ̃a hã Ezekiasi na: “NWA ngɔ mɔ nyanga nza vɛ̃ tɔ̃a na:

⁶ ‘Mbe ngba soe kpo, nɛ omɛnɔ vɛ̃ kɔ tɔa nwa 'da mɔ gɛ, do omɛnɔ kɛ oyaa mɔ wa usu zi ma ni, owi Babilonia wa kala sɛ ma vɛ̃, nɛ wa si do ma. Wa lá sɛ tala mɔ kpo gɔ.

⁷ Nɛ wa kala sɛ 'bɔ mbe wele sanga obe zã mɔ, nɛ wa hɔlɔ wa, nɛ wa a wa we dɛ to kɔ tɔa 'da nwa ngɔ nù Babilonia.’ ”

⁸ Nwa Ezekiasi zila ni, nɛ nde a ĩ̀ ti gulu nɛ gɔ, nɛ a lengge na, kɔ dungu nza 'dɛ ɛ, lo sɛ do dia dungu, do dungu fio boe. Nɛ a gisa hã Ezai na: “Toe kɛ nwa tumba do mɔ hã mi gɛ, ma a dia.”