Ezai 38 - WE NU GALE 1995

Nwa Ezekiasi ba zɛlɛ, nɛ a kpasa

¹ Do fala nɛ ni, nɛ zɛlɛ fio ba nwa Ezekiasi. Nɛ Ezai, be 'da Amɔtisi, kɛ a a wi gba olo nu Gale ni, a kulu ngɔ, nɛ a nɛ we zɔ Ezekiasi, nɛ a tɔ̃ hã Ezekiasi na: “NWA Gale tɔ̃a hã mɔ na, mɔ 'dafa mɛnɔ 'da mɔ vɛ̃ do dia nɛ. Mba gɔ, zɛlɛ tɛ mɔ gɛ ma gbɛ sɛ mɔ.”

² Ezekiasi nɛa we zele ni, nɛ a siki li a dɛ ngu'du dɛlɛ tɔa, nɛ a sambala nwa na:

³ “Aa nwa, mɔ kɔ̃́, nɛ ta zu mɔ gba ngɔ mi sɛ. Mi dɛa zi to tɛ mi dati mɔ do bɔlɔ nɛ, nɛ mi fa zi fai we hã yangga hã mɔ.” A nɛa we tɔ̃ ni do'do, nɛ a 'bã nu a ngɔ kɔ̃a.

⁴ Nɛ NWA Gale ba nu a hã Ezai na,

⁵ a kpolo tɛ̃ a, hã a tɔ̃ hã Ezekiasi na: “Mi NWA Gale 'da yaa mɔ Davidi, mi zila sambala 'da mɔ, nɛ mi zɔa mili kɔ̃a li mɔ. Ma hã mi kɔ̃a we e mɔ na, mɔ ɔ 'bɔ mbé nɛ sabɛlɛ 'bu ngɔ nɛ mɔlɔ, sɛ nɛ mɔ fe de.

⁶ Mi kpasa sɛ mɔ do owi Yeruzalɛmɛ, nɛ mi fo sɛ nɛ ti kɔ̃ nwa ngɔ nù Asiri. Nɛ mi zɔ sɛ mɔ tɛ le Yeruzalɛmɛ fai.”

²¹ 'Do nɛ, nɛ Ezai ba nu a na, wa to fũ wala te figɛ, nɛ wa zanga ma, hã wa ɛnzɛ do ngɔ hɛ̃a mɛ tɛ nwa ni, nɛ a kpasa sɛ.

²² Nɛ nwa Ezekiasi aka a na: “Mɔ sá li mɔ kpo kɛ ma be sɛ hã mi na, mi kpasa sɛ, nɛ mi wia sɛ 'bɔ we nɛ kɔ Tɛmpɛloe 'da NWA 'di ni.”

⁷ Nɛ Ezai gisa na: “NWA Gale a be sɛ mɔ kpo hã mɔ, takɔ mɔ ĩ na, a dɛ sɛ mbuli kɛ a kpua ma hã mɔ ni.

⁸ Mɔ ká mɔ, hã mɔ zɔ́ ngalangala kɛ nwa Ahazɛ kũ zi do ma we le kɔ tɔa 'da a ni, wese sɔ tɛ to dɛ tɛ nɛ, kɔ ngangga ni, gɔ̃lɔ̃ kila ngɔ nɛ pilii. NWA a dɛ sɛ na, gɔ̃lɛ̃ ni ma kũ dɛ ngɔ, hã ma fo tɛ̃ ɛ ngɔ ngalangala we nyanga wi 'bu.” Mɛ ni dɛa tɛ̃ ɛ ɔ nɛ olo nu a ni, nɛ gɔ̃lɛ̃ fua tɛ̃ ɛ ngɔ ngalangala we nyanga wi 'bu, nɛ wese tua dɛ tɛ nɛ.

Ezekiasi kpasa, nɛ a sambala Gale

⁹ Nwa Ezekiasi kpasa olo zɛlɛmɛ 'da a do'do, nɛ a kɔma zuma sambala gɛ:

¹⁰ Mi lingga zi zu mi na, mi ɔ̃ ngɔ nù gɛ ngboo gɔ, nɛ mi nɛ fe do nga tɛ mi 'diko. Otũnɔ kɛ mi nɛ ɔ sɔ ngɔ nù gɛ ni, mi ɔ sɛ ma do kɔ le 'da ofionɔ 'di.

¹¹ Nɛ mi lingga zi 'bɔ na, mi hɔ kɔ le 'da ofionɔ, nɛ nde mi zɔ́ sɛ 'bɔ tɛ NWA mbé nɛ gɔ, nɛ mi zɔ́ sɛ 'bɔ tunu li winɔ ngɔ nùi gɛ gɔ.

¹² Wa 'bili mbuli 'da mi do'do, ɔ nɛ kɛ wa 'bili do gbau tulu ni. Nɛ wa kasa ma ɔ nɛ bunggu ni, nɛ wa la do ma nyɛlɛ do mi ndũu. Nɛ mi lingga zi na, NWA gɔna mbuli 'da mi ia.

¹³ Nɛ do tũi vɛ̃, mi zi tɛ bi tɛ mi ɔ nɛ sa'de kɛ gbɔgbɔ tɛ o gbãlã a ni. Nɛ mi lingga zi na, NWA gɔna mbuli 'da mi ia.

¹⁴ Mi hia kɔ̃a do be gɛlɛ, nɛ gɛlɛ mi wila ɔ nɛ gɛlɛ dɔndɛa ni. Mi ka mɔ dɛ li nza 'di, nɛ gbali mi wè tɛ zɔ 'bɔ mɔ gɔ. Aa nwa, mɔ kpásá mi kɔ ngamɛnɔ ni.

¹⁵ Wi dɛa mɛnɔ ni vɛ̃, wi a NWA, kɔ mi nɛ tɔ̃ 'bɔ na ge nde? Mi do 'bako kɔ sila mi, nɛ yala yu li mi ndũu.

¹⁶ Aa NWA, mɔ ĩ ti ngamɛ kɛ ma kpa zi mi ni, nɛ mɔ gisa hi mi dɛ olo nɛ, nɛ mɔ hã ngawi hã mi na, mi kpasa.

¹⁷ Nɛ ngangga ni, 'bakoe 'da mi ma kifi yangga. Mba gɔ, mɔ kɔ̃ gɛnɛ mi wena, nɛ mɔ kpasa mi kɔ fio, nɛ mɔ fua ku'da 'dã mɛnɔ zu mi do'do.

¹⁸ Wele hɔ kɔ le 'da ofionɔ 'di, nɛ nde a dɔ́nggɔ́ 'bɔ mɔ gɔ. Wele fe, nɛ nde a ĩ́ 'bɔ ti dia zã 'da mɔ gɔ.

¹⁹ Winɔ kɛ wa wia we dɔnggɔ mɔ, ɔ nɛ kɛ mi dɔnggɔ mɔ ngangga ni, wi tati a wanɔ wa 'bana nza ni 'diko. Obaa be wa be hã benɔ 'da wa na, mɔ a wi kɛ mɔ élé dɛ olo nu mɔ gɔ.

²⁰ Aa NWA, mɔ kpasa mi kɔ fio ia. Lɛ nɛ sɛ kɔ Tɛmpɛloe 'da mɔ, nɛ lɛ zɛ kundu, nɛ lɛ ga zuma we dɔnggɔ do mɔ li dungu 'da lɛ vɛ̃.