Ezai 37 - WE NU GALE 1995

Nwa Ezekiasi aka Ezai do we

¹ Nwa Ezekiasi nɛa we zele toe wa tumba hã a ni, nɛ a ɛ̃ tulu tɛ̃ a do 'bako, nɛ a he'de tulu gɛla. 'Do nɛ, nɛ a kulu ngɔ, nɛ a nɛ kɔ Tɛmpɛloe 'da NWA Gale.

² Nɛ Ezekiasi sa mɔ hã Eliakimɛ, gã wi ngɔ owi dɛa tonɔ kɔ tɔa 'da a, do Sɛbna, wi kɔmɔ mbɛti, do okpasa nganganɔ, nɛ wa zi vɛ̃ do tulu gɛla tɛ wa. Wa hɔa, nɛ a tombo wa hã Ezai, wi gba olo nu Gale, kɛ a a be 'da Amɔtisi ni na:

³ “Sɔɛ gɛ, mɛ a kɔ̃ tũ etumbu 'da lɛ. Lɛ kpa 'bako do sape. Lɛ ɔ nɛ wuko kɛ a do zɛlɛ kula, nɛ nde a do ngawi we ko ma bina ni.

⁴ Nwa ngɔ nù Asiri tumba gã wi ngɔ sodanɔ 'da a na, a tɛ hã a dã Gale, wele kpasi. Mi ala nu mi na, e kɔ NWA Gale 'da mɔ zele dɛlanɔ ni, nɛ a hã etumbu hã wi dã a. Mi aka mɔ na, mɔ sambala nwa we duzu tala owinɔ 'da a kɛ wa 'bana gɛ.”

⁵ Ezai nɛa we zele toe kɛ nwa Ezekiasi tumba hã a ni,

⁶ nɛ a gese na: “NWA Gale tɔ̃a na, mɔ tɛ dɛ̃ kili gã wi ngɔ osoda Asiri kɛ a dã ɛ ni gɔ.

⁷ Ɛ dɛ sɛ na, mbe lɛnggɛ kpo le zala nwa ngɔ nù Asiri, nɛ a kulu sɛ ngɔ, nɛ a si dɛ ngɔ nù 'da a. Kɔ a hɔ i mɔ, nɛ ɛ Gale, ɛ dɛ sɛ 'bɔ na, wa gbɛ a.”

Sɛnakeribɛ tulu 'bɔ mbé owi Yeruzalɛmɛ

⁸ Gã wi ngɔ osoda Asiri zila na, nwa ngɔ nù Asiri kulu ngɔ Lakisi, hã a la dɛ Libna we bi ma. Nɛ gã wi ni nɛa, nɛ a kpa a dɛ Libna ni.

⁹ Do fala ni, nɛ wa tɔ̃a hã nwa ngɔ nù Asiri na, Tiraka, wi Etiopi, kɛ a a nwa ngɔ nù Ezipeto ni, a kulu ngɔ do osodanɔ 'da a we bi a. Kɔ nwa ngɔ nù Asiri nɛa we zele ni, nɛ a tombo mbɛti hã Ezekiasi,

¹⁰ nwa ngɔ nù Yuda na: “Mɔ dɛ́ gã zu, nɛ mɔ tɔ̃ na, Gale kɛ mɔ gbini zã mɔ do a ni, a amba sɛ mi na, mi tɛ bà le Yeruzalɛmɛ gɔ. Nɛ nde mɔ tɛ mbɔkɔ li mɔ gɔ, a ɔkɔlɔ mɔ iko.

¹¹ Mɔ zèlè tɛlɛ tɛ kɛ onwa ngɔ nu Asiri wa bi zi ogele nùnɔ, nɛ wa 'danga ma ni gɔ nde? Kɔ mɔ lengge na, wa bá sɛ nùi 'da nɛ gɔ nde?

¹² Oyaa mi wa 'danga zi le Gozanɛ, Haranɛ do Rɛsɛfɛ, nɛ wa bi zi Telasarɛ, gã le 'da Oedeni, nɛ wa 'danga ma. Nɛ nde galenɔ kɔ lenɔ ni, wa kpàsà zi owinɔ 'da wa gɔ.

¹³ Nɛ mɔ lénggé 'bɔ do mɛ ma dɛa zi onwa ngɔ nù Hamatɛ, Arpadɛ, Lairɛ, Sɛfarvaimɛ, Hena do Ava ni. Owinɔ ni wa sɔɛ gɛ a do nde?”

Nwa Ezekiasi sambala Gale

¹⁴ Nwa Ezekiasi ba mbɛti kɛ Owi to Asiri wa tɛa nɛ hã a ni, nɛ a tɔlɔ ma. 'Do nɛ, nɛ a ba mbɛti ni dɛ kɔ̃ a, nɛ a nɛ do ma kɔ tɔa Tɛmpɛlo i, nɛ a e ma hã NWA Gale.

¹⁵ Nɛ a sambala na:

¹⁶ “Aa NWA Gale ngɔ mɔ nyanga nza vɛ̃, Gale 'da lɛ obe Israɛlɛ, mɔ a mɔ dɛa li nza do nùi. Nɛ mɔ dungu ngɔ kpongbo nwa 'da mɔ, ngɔ Okerubinɛnɔ. Nɛ mɔ zu mɔ kpo a Gale, nwa ngɔ lenɔ ngɔ nù gɛ vɛ̃.

¹⁷ Aa NWA, mi aka mɔ na, mɔ ká mɔ, hã mɔ zɔ mɛnɔ ma la do lɛ gɛ. Nɛ mɔ zélé 'bɔ dɛlanɔ kɛ owi nɛ tonɔ 'da Sɛnakeribɛ, wa dã do mɔ Gale, wele kpasi ni.

¹⁸ Aa NWA, lɛ ĩ vɛ̃ na, onwa ngɔ nù Asiri wa bi zi ogele nu kɔnggɔnɔ, nɛ wa gbɛ wa wena, nɛ wa 'danga lenɔ 'da wa.

¹⁹ Wa dɔa galenɔ 'da nu kɔnggɔ winɔ ni, nɛ wa bɛlɛ, we kɛ wa a ngbongbo gale gɔ. Wa tati a okpikima kɛ wele wa sɛa ma do te, tabi wa dɛa do ta iko.

²⁰ Nɛ nde ngangga ni, mi aka mɔ NWA Gale 'da lɛ na, mɔ kpásá lɛ ti kɔ̃ Sɛnakeribɛ do'do. Mɔ dɛ́ na mɛ ni, nɛ owinɔ ngɔ nù gɛ vɛ̃ wa ĩ sɛ na, mɔ NWA, mɔ zu mɔ kpo a ngbongbo Gale.”

Ezai tumba to hã nwa Ezekiasi

²¹ Ezai, be 'da Amɔtisi tumba to hã Ezekiasi, we tɔ̃ tɛlɛ tɛ kɛ NWA Gale 'da obe Israɛlɛ, gisa do nu sambala 'da a dɛ ngɔ Sɛnakeribɛ ni.

²² A tumba olo nu NWA Gale na: “Owi Yeruzalɛmɛ wa mɔmɔ mɔ Sɛnakeribɛ gbɔlɔ gbɔlɔ, nɛ wa zɔ mɔ li wa ɔ nɛ yia wi ni.

²³ Wi kɛ mɔ dã a, nɛ mɔ nɔ̃lɔ̃ zã a ni, wi a wio nde? Wi kɛ mɔ dɛ gã zui hã a, nɛ mɔ bɛ̃ we dɔnggɔ a ni, wi a wio nde? Wi a mi NWA Gale santo 'da obe Israɛlɛ.

²⁴ Mɔ tumba owi dɛa tonɔ 'da mɔ we dã mi NWA. Mɔ tɔ̃a na, mɔ Sɛnakeribɛ, mɔ kũ gbaa zu ongala kalanɔ tɛ Libanɛ do ogili ngilingilinɔ 'da mɔ, nɛ mɔ gɔmɔ ogba dia te sɛdrɛnɔ do odu te siprɛnɔ 'di mɔ ni, nɛ mɔ si do ma. Nɛ mɔ le sɛ 'bɔ gbaa, nɛ zu mɔ kpa kɔ tũ kɔlanɔ i mɔ ni vɛ̃.

²⁵ Nɛ mɔ tɔ̃a 'bɔ na, mɔ zã o'de mɔ mɔ, nɛ mɔ nɔ lì kɔ 'de 'da ogele nu kɔnggɔnɔ. Nɛ mɔ tɔ̃ na, mɔ le sɛ ngɔ nù Ezipeto, nɛ mɔ dɛ sɛ na, osodanɔ 'da mɔ wa ma ogbakɔ̃ lì Nilɛ do nyanga wa, nɛ ma ɔ̃sɔ̃ vɛ̃.

²⁶ “Nɛ nde mɔ Sɛnakeribɛ, mɔ ĩ̀ na, mɛnɔ ma dɛ tɛ̃ ɛ ni, wi a mi NWA hã mi 'dafa zi ma belee ni gɔ nde? Mɛnɔ kɛ mi 'dafa zɛ́ ma ni, ma kɛ mi dɛ ma ngangga gɛ. Mi hã ngawi hã mɔ, nɛ mɔ bi lenɔ kɛ gba ngbo zĩ ma takpa ni, nɛ mɔ gbini ma dɛ nù.

²⁷ Owi kɔ lenɔ ni wa mbɔka, nɛ wa kpa gã sape, nɛ wa tana kili. Wa ɔ nɛ owɔkɔsɔ kɔ fɔ, tabi owɔkɔsɔ kɛ ma hɔ ngɔ tɔa, nɛ ma 'bana do bɔlɔ nɛ, nɛ ma kolo ni.

²⁸ “Nɛ nde mi ĩ ti mɔ de wena. Mi ĩ ti mɛnɔ mɔ dɛ ma ni, do li wala mɔ ba nɛ ni. Mi ĩ ti tɛlɛ tɛ kɛ zã mɔ nɔ̃lɔ̃ dɛ tɛ mi ni.

²⁹ Mɔ dɛa dã dɛ tɛ mi, nɛ mɔ dã mi, nɛ mi zila. We duzu ma, mi gbo sɛ zɔ̃ mɔ ɔ nɛ kɛ wa gbo do zɔ̃ dã sa'de ni, nɛ mi yulu te kɔ nɛ, nɛ mi kpo fɛlɛ tɛ nɛ, nɛ mi gbɔtɔ mɔ si do mɔ. Mi gese sɛ mɔ dɛ ngɔ nùi 'da mɔ do kpo li wala mɔ tɛa zi nɛ ni.”

³⁰ Nɛ Ezai bia 'bɔ tɛlɛ tɛ mɛnɔ kɛ ma la sɛ ni hã Ezekiasi. A na: “Sabɛlɛ gɛ, do kɛ 'do gɛ, nɛ mí sɛ kpalɛ gɔ. Ble ma hɔ sɛ do tɛ̃ ɛ iko, nɛ nɛ nyɔngɔ sɛ ma. Nɛ sabɛlɛ 'do ki ni, nɛ mi sɛ oblenɔ 'da nɛ, nɛ nɛ kala ma. Nɛ nɛ 'dafa sɛ ti vinɔnɔ 'da nɛ, nɛ nɛ nɔ dɔ̃ nɛ.

³¹ Nɛ tala nɛ Oyudanɔ kɛ nɛ 'bana sɛ nza ni, nɛ dɔ sɛ wena. Nɛ ɔ sɛ nɛ te kɛ liã nɛ ba nù, nɛ ma wala wena ni.

³² Tala Owi Yeruzalɛmɛ, tɛ ngɔ kala Sioni, wa sanza sɛ, nɛ wa dɛlɛ sɛ wena. Mi NWA ngɔ mɔ nyanga nza vɛ̃ do hɛ̃lɛ̃ we dɛ mɛ a 'dafa ni.”

³³ Nɛ NWA Gale tɔ̃a 'bɔ lɛnggɛ gɛ hã Ezai, we duzu nwa ngɔ nù Asiri na: “A lé sɛ kɔ le Yeruzalɛmɛ gɔ, nɛ a dá sɛ okpili dɛ kɔ nɛ gɔ. Osodanɔ 'da a wa kálá sɛ Ongele dɛ kɔ̃ wa we bi le ni gɔ, nɛ wa dɛ́ sɛ 'dingba kɛ zã gba ngbo nu le ni, we kũ do ngɔ nɛ gɔ.

³⁴ Nwa ngɔ nù Asiri a si sɛ do kpo kpo li wala a tɛa zi do ma ni, nɛ nde a lé sɛ Yeruzalɛmɛ gɔ. Mi nwa, mi tɔ̃a ni.

³⁵ Mi zɔ sɛ mɔ tɛ le Yeruzalɛmɛ, nɛ mi kpasa sɛ Owi kɔ nɛ, we be dɔ̃lɔ̃ li 'da mi, do we lengge Davidi, wi toe 'da mi.”

Oasiri wa si

³⁶ 'Do nɛ, nɛ anzɛ 'da NWA nɛa tɛ fala ɔi 'da osoda Asiri, nɛ a gbɛ wa koto kama do 'bu wa ngbɛ'dɛ'dɛ ngɔ wa mɔlɔ. Nɛ fala sa do titole, nɛ Owi Yeruzalɛmɛ wa kulu ngɔ, nɛ wa gbanga wɔlɔ owinɔ ni vɛ̃ do li wa.

³⁷ Nɛ nwa Sɛnakeribɛ ba nu a, nɛ wa kala mɛnɔ 'da wa, nɛ wa si nɛ dɛ Ninivɛ, gã le ngɔ nùi 'da wa Asiri.

³⁸ Wa hɔa i mɔ, nɛ mbe tũ kpo, nɛ Sɛnakeribɛ nɛa kɔ tɛmpɛloe 'da gale 'da a Nisrɔkɛ, we sambala a. Nɛ ombe bulu benɔ 'da a bɔa, li wa a Adramelɛkɛ do Sarɛsɛrɛ wa nɛa, nɛ wa dumu a do du kɔya, nɛ wa gbɛa a. 'Do nɛ, nɛ wa yu dɛ ngɔ nù Araratɛ. Nɛ mbe kɔ obulu benɔ 'da a kpo, li a a Asaradoni dungu nwa olo a.