Ezai 36 - WE NU GALE 1995

Nwa ngɔ nù Asiri tulu owi Yeruzalɛmɛ

¹ Ezekiasi, nwa ngɔ nù Yuda ɔa tɛ dɛa to nwa 'da a sabɛlɛ 'bu ngɔ nɛ nalɛ. Nɛ do 'da fala ni, nɛ Sɛnakeribɛ, nwa ngɔ nù Asiri nɛa, nɛ a bi olenɔ 'da Oyuda kɛ gba ngbo zĩ ma takpa ni, nɛ a kala ma vɛ̃.

² A 'bana dɛ kɔ le Lakisi, nɛ a tombo mbe gã wi ngɔ osodanɔ 'da a hã nwa Ezekiasi tɛ Yeruzalɛmɛ i. Gã wi ni kulu ngɔ do gba dɔa osoda, nɛ wa la do li wala 'da Owi fɔlɔ tulunɔ, nɛ wa 'bɔ dɛ kɛ zã wala lì wa gba ma yolo tɛ ndɔnɔ si ngɔ i ni.

³ Nɛ nwa tumba obe Yuda talɛ kɛ wa dɛ toe kɔ tɔa 'da a ni we kpa ngba wa do a. Wi zi a Eliakimɛ, gã wi ngɔ Owi dɛa tonɔ kɔ tɔa 'da nwa, a a be 'da Hilkia, Sɛbna, wi kɔmɔ mbɛti 'da nwa, do Yoa, gã wi nɛ toe 'da nwa, a a be 'da Asafɛ.

⁴ Wa hɔa, nɛ gã wi ngɔ osoda Asiri tɔ̃ hã wa na, wa nɛ hã wa tɔ̃ toe 'da gã nwa ngɔ nù Asiri hã nwa Ezekiasi na: “Mi kɔ̃a we ĩ gulu kɛ mɔ dɛ́ kili mi gɔɛ ni.

⁵ Mɔ lengge na, wila we nu mɔ wia we nɛ ngɔ osoda do ngawi we bi bolo olo wa nde? Mɔ bɛ̃a we nu mi nwa ngɔ nù Asiri. Nɛ wi mɔ gbini zã mɔ do a, nɛ mɔ dɛ nga zu hã mi ni a wio nde?

⁶ Ngangga ni, mɔ gbini zã mɔ do Oezipeto, nɛ nde wa ɔ nɛ ka gole 'diko, fala kɛ wele tɔndɔ ma do tɛ̃ ɛ, nɛ ma gbini, nɛ ma le kɔ̃ a surr. Mɔ zɔ́ mɛ kɛ nwa ngɔ nù Ezipeto dɛ do owinɔ vɛ̃, kɛ wa gbini zã wa do a gɛ a ni.”

⁷ Nɛ gã wi ngɔ osoda Asiri tɔ̃ 'bɔ na: “Mɔ tɔ̃ sɛ na, lo gbini zã lo do NWA Gale 'da lo. Nɛ nde mɔ Ezekiasi, mɔ 'danga ogbagalanɔ do fala santonɔ wa 'dafa we dɔnggɔ do Gale ni do'do. Nɛ mɔ ba nu mɔ hã obe Yuda do owi Yeruzalɛmɛ na, wa dɔnggɔ Gale tati nɛ dɛ dati gbagala Yeruzalɛmɛ gɛ iko.

⁸ Kɔ mi kɔ̃a we dɛ na do mɔ do zu li wele mi, nwa ngɔ nù Asiri. Mi wia sɔ we hã ombalata koto bɔa hã mɔ, nɛ nde mɔ do owi kù ngɔ wa bina.

⁹ Gɛnɛ kɔ be soda Asiri iko, nɛ nde mɔ wè tɛ bɛ̃ we hã a gɔ. Nɛ mɔ tɛ gbìnì zã mɔ do Oezipeto na, wa hã sɛ ongilingili do ombalata hã mɔ gɔ.

¹⁰ Mɔ lengge na, nwa ngɔ nù Asiri bi le 'da nɛ, we ba ma, nɛ nde NWA Gale kɔ̃̀ gɔ nde? NWA Gale do tɛ̃ a ngboo hã a ba nu a hã nwa ngɔ nù Asiri na, a bi le 'da nɛ, hã a 'danga ma.”

¹¹ Gã wi ngɔ osoda Asiri nɛa we da nu ɛ, nɛ Eliakimɛ, do Sɛbna do Yoa, wa tɔ̃ hã a na: “Mɔ kɔ̃̀, nɛ mɔ tɔ̃ lɛnggɛ hã lɛ do nu aramenyɛ, nɛ lɛ zele sɛ ma. Mɔ tɛ tɔ̃̀ do nu hebre gɔ. Mba gɔ, mɔ tɔ̃ do hebre, nɛ ogili winɔ vɛ̃ wa kũ dɛ zu ngboe gɛ, wa zele sɛ.”

¹² Nɛ gã wi ngɔ osoda Asiri gese hã wa na: “Nɛ lengge na, nwa ngɔ nù Asiri tumba toe gɛ hã nɛ mba do nwa ngɔ nɛ iko nde? Toe gɛ ma zɔa tɛ mɛ 'bɔ owinɔ vɛ̃ kɛ wa kũ dɛ zu ngboe gɛ. Mba gɔ, 'da kala be sĩ, nɛ lɛ ba sɛ le 'da nɛ, nɛ nɛ do owinɔ gɛ, nɛ nyɔngɔ sɛ 'dɔlɔ go'do nɛ, nɛ nɛ nɔ sɛ ini go'do nɛ ngboo.”

¹³ Nɛ gã wi ngɔ osoda Asiri kulu ngɔ, nɛ a he mɔ do hebre na: “Nɛ zélé toe kɛ nwa ngɔ nù Asiri tumba hã nɛ gɛ!

¹⁴ A na, nɛ tɛ mbɔ̀kɔ̀ li nɛ hã Ezekiasi ɔkɔlɔ nɛ gɔ. Mba gɔ, a wé sɛ we kpasa nɛ ti kɔ̃ mi gɔ.

¹⁵ Nɛ tɛ zèlè bɛlɛ kɛ a 'bili hã nɛ ni gɔ. Ezekiasi tɔ́a hã nɛ na, nɛ gbini zã nɛ do NWA, nɛ a kpasa sɛ nɛ ti kɔ̃ lɛ osoda Asiri, nɛ a dɛ sɛ na, lɛ tɛ bà le 'da nɛ gɔ.

¹⁶ Nɛ nde nɛ tɛ kɔ̃̀ gɛnɛ lɛnggɛ 'da Ezekiasi gɔ. Nɛ zélé tati a toe kɛ nwa ngɔ nù Asiri tumba hã nɛ na, nɛ hɔ́ nza kɔ le 'da nɛ, hã lɛ dɛ na do nɛ ni. Fala kɛ dɛ ni, nɛ wele do wele sanga nɛ gɛ, a nɔ sɛ dɔ̃ vinɔɛ kɛ a mi ma ni, nɛ a nyɔngɔ sɛ kpalɛ li fɔɛ 'da a, nɛ a nɔ sɛ lì kɔ 'de 'da a.

¹⁷ 'Do nɛ, nɛ nwa a si sɛ do nɛ dɛ ngɔ dia nù ɔ nɛ kɛ 'da nɛ gɛ. Nùi ni, ma do nɔ gɔlɔ, nɛ ma 'bɔ do ble wena we dɛ do mapa. Ma do wala te vinɔ wena we dɛ do dɔ̃.

¹⁸ Mba gɔ Ezekiasi ɔkɔlɔ nɛ na, NWA Gale a kpasa sɛ nɛ, kɔ nɛ tɛ kɔ̃̀ gɔ. Nwa ngɔ nù Asiri kala zi lenɔ 'da ogele nu kɔnggɔnɔ, nɛ galenɔ 'da wa wa àmbà zu wa gɔ.

¹⁹ Ogalenɔ 'da Owi Hamatɛ do Owi Arpadɛ wa a do nde? Nɛ wanɔ 'da owi Sɛfarvaimɛ wa a do nde? Gulu kɛ mbe gale kpo bɛ zu le Samaria gɔ we ge nde?

²⁰ 'Da fala kɛ nwa ngɔ nù Asiri kala nùnɔ kɔ̃ ogele nu kɔnggɔnɔ ni, nɛ gale mɔ wa kpo àmbà zu ma gɔ. Kɔ gulu kɛ nɛ lengge na, NWA Gale a amba sɛ zu le Yeruzalɛmɛ we ge nde?”

²¹ Do 'da fala ni, nɛ Owi Yeruzalɛmɛ vɛ̃ kɛ wa zi di ni ni, wa kpia nu wa, nɛ wele kpo gèsè we gɔ. Wa dɛa ɔ nɛ kɛ nwa Ezekiasi tɔ̃a zi hã wa ni.

²² Nɛ Eliakimɛ, do Sɛbna, do Yoa, wa ɛ̃a tulu tɛ wa, nɛ wa kpolo tɛ wa, nɛ wa gba olo nu gã wi ngɔ osoda Asiri hã nwa Ezekiasi.