Ezai 35 - WE NU GALE 1995

Owinɔ 'da Gale wa si sɛ dɛ ngɔ nùi 'da wa

¹ Li go ma dɛ sɛ yangga, nɛ wɔkɔsɔ ma hɔ sɛ, nɛ ma kele ngɔ nga nùnɔ.

² Li goe ma ga sɛ zuma do yangga. Ofulɛlɛ ma hɔ sɛ di ni, nɛ ma de sɛ ɔ nɛ ngɔ kalanɔ tɛ ngɔ nù Libanɛ ni. Ma hɔ sɛ dia nù mi do kpalɛ ɔ nɛ nùi tɛ ngɔ kala Karmɛlɛ, do kɛ tɛ ngɔ mbɛ nù Saroni ni. Wele kpo kpo a zɔ sɛ ma, nɛ ma be sɛ dɔ̃lɔ̃ li 'da NWA do nganda 'da a. Nɛ a ĩ sɛ na NWA a gã wi ngboo.

³ Kɔ̃ owinɔ ma mbɔka, nɛ zugolo wa ma gɛ̃a. Nɛ nde nɛ gésé ngawi hã wa, nɛ dɛ́ na, kɔ̃ wa do zugolo wa nganda.

⁴ Nɛ tɔ̃̀ hã owinɔ kɛ wa mbɔka ni na: “Nɛ ngo tɛ nɛ, nɛ nɛ tɛ dɛ kili gɔ! Nɛ zɔ́ Gale kulu ngɔ we kpasa nɛ ia. A tɛ tɛ ma we hã etumbu hã owinɔ kɛ wa zɛlɛ tɛ nɛ ni, nɛ a kpasa sɛ nɛ ti kɔ̃ wa.”

⁵ Owi lɔa linɔ wa zɔ sɛ mɔ, nɛ owi la zala wa zele sɛ we.

⁶ Owi mbi ku wa bũlũ sɛ dɛ ngɔ, nɛ wa yɔ yɔla. Nɛ owinɔ kɛ wa wélé we gɔ ni, wa wele sɛ we do yangga. Nɛ ofua lì ma la sɛ do li go.

⁷ Okɛnzɛnɔ kɛ ma kolo mɛnɔ ni, ma kifi sɛ ndɔ. Nɛ owaya ma fo sɛ tɛ ngɔ nùnɔ kɛ ma kula kparr ni. Osala tɔ̃ do okɔako, ma hɔ sɛ, nɛ ma gã tɛ falanɔ kɛ ogbokologboenɔ wa ɔ zi tɛ nɛ ni.

⁸ Nɛ owinɔ 'da NWA Gale, wa la sɛ wala do di ni. Nɛ wa sa sɛ li wala ni na: “Li wala 'da owinɔ 'da NWA.” 'Dã wi lá sɛ li wala ni gɔ, nɛ yia wi yɛ́nggɛ́ sɛ yali do di ni gɔ.

⁹ Fo sɛ ogbɔgbɔ di ni bina, nɛ o'dã sa'de kpi do kpi, wa gɔ́nɔ́ sɛ wala di ni gɔ. Owinɔ kɛ NWA kpasa wa ni, wa si sɛ do li wala ni dɛ ngɔ nùi 'da wa.

¹⁰ Wa si sɛ do zuma, wa zɛ sɛ kaliã, nɛ wa le sɛ dɛ Sioni do yangga. Wa dɛ́ sɛ 'bɔ 'bako gɔ, nɛ wa ámá sɛ gba ama gɔ. Wa dɛ sɛ yangga 'da fala fai.