Ezai 34 - WE NU GALE 1995

NWA Gale a gɔnɔ sɛ ngbangga 'da owinɔ vɛ

¹ Aa nɛ, ogele winɔ, nɛ tílí dɛ nga, nɛ nɛ gɛ́ zala nɛ, kɔ nɛ zele. Ma wia na, nùi do owinɔ ngɔ nɛ vɛ̃, wa zele we gɛ do dia nɛ.

² Zã NWA Gale nɔ̃lɔ̃ dɛ tɛ ogele winɔ vɛ̃. A siki li a dɛ tɛ osodanɔ 'da wa, nɛ a 'bili na, wa kumu sɛ tɛ li bolo.

³ Wɔlɔ owinɔ 'da wa ma kpa sɛ do nù fatata, nɛ ma mbulu, nɛ ma unu kpãa. Tɔkɔ tɛ wa ma fo sɛ kɛ zã li kalanɔ ɔ nɛ lì ni.

⁴ Wese, do zɛkɛ do sɔlanɔ li nza 'di wa yeke sɛ, nɛ li nza kasa dɛ ngɔ ngbɛ ɛ ɔ nɛ bunggu ni. Osɔlanɔ ma ala sɛ dɛ nù nga vɛ̃ ɔ nɛ kula nwá ni.

NWA Gale a hã sɛ etumbu hã Oedɔmɛ

⁵ NWA 'bili na, a kumu Oedɔmɛ. Du kɔya 'da a yula li nza 'di, nɛ ma zĩlĩ dɛ ngɔ wa.

⁶ Li du kɔya 'da NWA kpa do tɔkɔ do nɔ tɛ wa, ɔ nɛ tɔkɔ tɛ be bata, do wili dua, tabi ɔ nɛ nɔ wala kole wili bata, tɛ li kɔya kɛ wa gbɛa do wa we hã do dɔnggamɔ ni. Mba gɔ, NWA Gale a gbɛ sɛ Oedɔmɛ ɔ nɛ dɔnggamɔ ni tɛ Bɔsra, gã le ngɔ nù 'da wa. Mɛnɔ ma 'danga sɛ, nɛ mɛ sɛ a Sɔkpɔ tala ngamɔ.

⁷ Owinɔ wa te sɛ kpuu ɔ nɛ oyele do obe ngɔmbɔ, kɛ Owele wa gbɛa wa ni. Nùi ma fele sɛ do tɔkɔ, nɛ nɔ tɛ winɔ ma a sɛ nù.

⁸ Do ngba soe ni, NWA a bi sɛ bolo ngɔ Owi Sioni we kpasa wa, nɛ a bili sɛ gbã hã owi sɛnɛ wa.

⁹ Ofua lìnɔ tɛ ngɔ nù Edɔmɛ ma ngo sɛ ɔ nɛ ndaka ni. Nɛ nùi ma kolo sɛ kparr, ma ba sɛ we ɔ nɛ nɔ kɛ wa ia ma li we, hã ma hɔa kambili ni.

¹⁰ Do tũi, do gba wese, ma sɛ tɛ bɛlɛ mɛnɔ, nɛ zɛ̃ we nɛ ma la sɛ dɛ ngɔ 'di 'da fala fai. Nùi ni ma 'danga sɛ, nɛ ma 'bana sɛ do 'danga nɛ kɔ sabɛlɛ do sabɛlɛ. Nɛ wele kpo gɔ́nɔ́ sɛ wala do di ni gɔ.

¹¹ Odili do oganakele wa ba sɛ ma do mɔ́ wa, nɛ wa ɔ sɛ dɛ di ni. NWA a dɛ sɛ na, nùi ni ma 'danga vɛ̃, nɛ fo sɛ 'bɔ dia mɔ di ni bina.

¹² Wele kpo dùngù sɛ 'bɔ nwa ngɔ nùi ni gɔ, nɛ ogã winɔ wa sɛ 'bɔ bina.

¹³ Ote tɛ̃ do ohɛlɛ ma hɔ sɛ kɔ tɔa nwanɔ do kɔ gba ngbonɔ. Nɛ ma kifi sɛ fala ɔi mɔ́ ogbokologboe do odili.

¹⁴ Mɛ sɛ a fala mɔ́ osa'de zamɔ, nɛ o'dã sa'de wa mba sɛ li ngba wa dɛ di ni. Ogba sɔ̃ mɛnɔ kɛ wa yɛnggɛ do tũi ni, wa nɛ sɛ we kpe tɛ wa di ni.

¹⁵ Odili wa dɛ sɛ tɔa 'da wa, nɛ wa ko sɛ, nɛ wa dala benɔ 'da wa dɛ di ni. Oganakele wa mba sɛ 'bɔ ngba wa dɛ di ni.

¹⁶ Fala kɛ nɛ ba 'Buki 'da NWA Gale, hã nɛ fa kɔ nɛ, nɛ nɛ tɔlɔ sɛ wenɔ gɛ: Sa'de kpo kɔ wa ni 'bànà 'do gɔ, nɛ mbe kpo zɔlɔ gɔ. NWA ba nu a hã wa, nɛ wa tɛa, nɛ Hi Wi 'da a ma mba li wa.

¹⁷ NWA gɔnɔ sanga nùi hã wa. A hã kɛ 'da sa'de kpo kpo hã a. Wa ɔ sɛ dɛ di ni kɔ sabɛlɛ do sabɛlɛ, nɛ wele nùi ni sɛ a mɔ wa fai.