Ezai 33 - WE NU GALE 1995

Owi sɛnɛ lɛ wa kpa sɛ 'bako

¹ Aa nɛ, owi sɛnɛ lɛ, nɛ kpa sɛ 'bako. Nɛ 'danga mɛnɔ 'da owinɔ 'da lɛ vɛ̃, nɛ nde wele 'dàngà mbe mɔ mɔ nɛ ɔ ni fala kpo gɔ. Nɛ vũ to tɛ wa, nɛ nde wele vũ̀ mbe kuti to tɛ nɛ gɔ. Kɔ nɛ ĩ́ na, fala kɛ nɛ 'danga mɛnɔ vɛ̃ do'do, nɛ Owele wa 'danga sɛ tɛ mɛ 'bɔ mɛnɔ 'da nɛ. Nɛ vũ sɛ to tɛ wa gbaa, nɛ do ndɔti nɛ, Owele wa vũ sɛ tɛ mɛ 'bɔ to tɛ nɛ.

² Aa NWA, lɛ gbini zã lɛ do mɔ, mɔ ĩ́ 'bako hã lɛ. Mɔ zɔ́ mɔ tɛ lɛ tũ kpo kpo, mɔ ámbá zu lɛ, nɛ mɔ fo lɛ kɔ ngamɔ.

³ Fala kɛ mɔ kulu ngɔ we bi bolo zu lɛ, nɛ ogele nu kɔnggɔnɔ wa zele giti mɔ, nɛ wa pɛsɛ dati mɔ gbɔrr.

⁴ Ogele wele wa te sɛ ngɔ tolenɔ 'da Owi sɛnɛ lɛ fala kpo ɔ nɛ odɔla ni, nɛ wa kala ma, nɛ wa yu do ma.

⁵ Aa NWA, mɔ a gã wi ngɔ omɛnɔ vɛ̃, wele nwa a mɔ́ mɔ. Mɔ dɛa na, bɔlɔ zu dɛa mɔ, ma kpa kɔ le Yeruzalɛmɛ vɛ̃.

⁶ 'Da fala fai, mɔ tɛ amba zu lɛ owinɔ 'da mɔ, nɛ mɔ dɛ na, gbãlã zã lɛ ma siki, nɛ lɛ ɔ do hã zã. Nɛ mɔ hã 'bɔ gɛ̃a dungu hã lɛ. Gã kpamɛ 'da lɛ, mɛ tati a kɛ lɛ dɔnggɔ zu li mɔ NWA ni.

Owinɔ wa dungu gɛla

⁷ Owi Yeruzalɛmɛ wa zɛa nu wa do kɔ̃a. Owi nɛ tonɔ kɛ wa tumba zi wa na, wa nɛ hã wa tɔ̃ to dɛa na ni, wa kpolo tɛ wa do kɔ̃a, nɛ wa dunu do 'bako.

⁸ 'Dã mɛnɔ ma dɔ wena, nɛ wele gɔ́nɔ́ 'bɔ wala gɔ. Nwa 'da Owi sɛnɛ wa 'danga dɛa na do wa do'do, nɛ a zɔ lenɔ 'da wa li a yala iko.

⁹ Nùi ma dungu gɛla. Otenɔ kɔ kɔla Libanɛ, kɛ nwá nɛ 'bɔ zi 'bɔa fai ni, ma kula. Nɛ dia nùi tɛ Saroni ma ɔ 'bɔ nɛ li go ni. Nwá tenɔ tɛ Basanɛ do Karmɛlɛ ma ala vɛ̃.

¹⁰ NWA tɔ́a hã nu kɔnggɔ owinɔ na: “Mi nɛ kulu ngɔ ngangga ni, we be ngawi 'da mi hã nɛ.

¹¹ Omɛnɔ kɛ nɛ 'dafa we dɛ ma ni, ma mbulu sɛ ɔ nɛ wɔkɔsɔ ni. Nɛ mɛnɔ vɛ̃ nɛ dɛ sɛ ma ni, ma ɔ sɛ yala 'diko. Mi ufu sɛ bũ nu mi, nɛ ma bɛlɛ sɛ nɛ ɔ nɛ we ni.

¹² Nɛ bɛlɛ sɛ ɔ nɛ zɔ́ ni, nɛ nɛ ngutu sɛ, nɛ nɛ dɛ bũ.

¹³ Mɛnɔ kɛ mi dɛ sɛ ma gɛ a ni. Aa nɛ, owinɔ kɛ nɛ nyɛlɛ wena ni, nɛ zélé ma, nɛ nɛ, kɛ nɛ dɔ̃ɔ ni, nɛ zɔ́ ma, hã nɛ ĩ ti ngawi 'da mi.”

¹⁴ Owi 'dã gulu wenɔ kɔ le Sioni wa dɛa kili, nɛ owanɔ kɛ wa bɛ̃a we nu Gale ni, wa tana. Nɛ wa na: “Gale 'bili we 'da ɛ, nɛ ma bele wele ɔ nɛ we ni. Kɔ sanga lɛ gɛ, wi kɛ a wia sɛ we dungu kɛ zã kalĩ we, kɛ ma bɛlɛ mɛnɔ fai ni a wio nde?”

¹⁵ Wi kɛ a wia sɛ we 'bana kɛ zã we ni, wi a wi dɛ bɔlɔ zu dɛa mɔ, wi tɔ̃ gbãlã we, do wele kɛ a bɛ̃ dɛ ngatɛ we kpa do mɔ ni. A kɔ̃́ na, wele hã de mɔ hã ɛ, nɛ ɛ hɔ wi 'da a gɔ. A bá zã zu we do wi gbɛ wi, tabi do wi dɛ 'dã mɔ gɔ.

¹⁶ Wi ni a kpasa sɛ ɔ nɛ wi kɛ a ɔ kɔ kpangba tanɔ, nɛ ma amba zu a ni. A kpá sɛ ngamɔ gɔ. Nɛ 'da fala fai, a sɛ do nyɔngɔmɔ, do lì kɛ zã a boe.

Le Yeruzalɛmɛ ma kpa sɛ dɔ̃lɔ̃ li

¹⁷ Nɛ zɔ sɛ 'bɔ nwa 'da lɛ do dɔ̃lɔ̃ li 'da a vɛ̃, nɛ nɛ zɔ sɛ nùi 'da lɛ, do 'da fala kɛ ma gã sɛ wena ni.

¹⁸ Nɛ nɛ lengge sɛ ngamɛnɔ kɛ nɛ kpa zi ma ni, nɛ nɛ aka na: “Ogele winɔ kɛ wa kala zi mbili takonɔ, do owinɔ kɛ wa ngɛ'dɛ zi ngbo nu lenɔ ni, wa 'bɔ a do nde?”

¹⁹ Nɛ ogele winɔ kɛ wa dɛ zi gã zunɔ, nɛ nɛ zélé zi lɛnggɛ nu wa gɔ, nɛ nɛ wè tɛ ĩ̀ gulu wenɔ wa tɔ̃ ma gɔɛ ni, fo sɛ 'bɔ wa bina.

²⁰ Nɛ nɛ zɔ sɛ Yeruzalɛmɛ, le dungu fie kɛ lɛ dungu do ɛngganɔ 'da lɛ ni. Ma nganda sɛ ɔ nɛ tɔa, kɛ nyanga nɛ ba nù wena, nɛ ma 'bana sɛ dɛ olo nɛ fai, ma 'dángá sɛ gɔ.

²¹ NWA Gale a be sɛ dɔ̃lɔ̃ li 'da a hã lɛ dɛ kɔ le ni. Ogã lì ma fo sɛ do di ni, nɛ nde masuanɔ 'da Owi sɛnɛ lɛ ma lá sɛ ngɔ nɛ gɔ.

^22-23 Ofɛlɛnɔ kɛ Owi sɛnɛ lɛ wa kpo do bɛndɛlɛnɔ 'da wa ni, ma gɔnɔ sɛ, nɛ fo sɛ 'bɔ wala na, wa gbɔtɔ bɛndɛlɛnɔ 'da wa dɛ ngɔ bina. Do 'da fala ni, nɛ lɛ kɛ̃ sɛ sanga gba gili mɔ olo wa dɛ kɔ̃ lɛ vɛ̃. Gɛnɛ kɔ Owi 'dã nyanganɔ, nɛ wa kpa sɛ mɔ olo Owi sɛnɛ lɛ. NWA Gale a wi kpasa lɛ. A dungu sɛ nwa ngɔ lɛ, nɛ a gɔnɔ ngbangganɔ 'da lɛ.

²⁴ Wi Yeruzalɛmɛ kpo álá sɛ 'bɔ nu ɛ na, ɛ do zɛlɛ gɔ. Nɛ 'dã mɛnɔ ma fo sɛ tɛ̃ ɛ zu owinɔ kɔ le ni vɛ̃.