Ezai 32 - WE NU GALE 1995

Nwa kɛ a dɛ to do wala olo nɛ

¹ Mbe tũ kpo, nɛ nwa ngɔ nùi 'da lɛ, a dɛ sɛ toe 'da a do wala olo nɛ, nɛ ogã winɔ wa zɔ sɛ mɔ tɛ lenɔ do bɔlɔ nɛ.

² Wele kpo kpo kɔ wa ni, a ɔ sɛ nɛ da, kɛ ma amba zu wele do 'da fala gba bũ, tabi do 'da fala ua dã kolo ni. Wa ɔ sɛ nɛ fua lì, kɛ ma la do li go ni. Wa ɔ sɛ nɛ kpangba ta, kɛ ma fi gɔ̃lɔ̃ kɔ le tua wese ni.

³ Owinɔ wa gɛ sɛ zala wa hã ngba wa, nɛ wa fi li wa we zɔ do mɔ tɛ ngba wa.

⁴ Do fala nɛ ni, nɛ oyia winɔ wa saka sɛ, nɛ owi tɔ̃ gugumanɔ wa wele sɛ we do dia nɛ.

⁵ Wi dɛ mbana kpá sɛ dɔ̃lɔ̃ li gɔ, nɛ 'dã wele sɛ do dĩ bina.

⁶ Owi dɛ mbananɔ wa lengge tati a mɔ mbana, nɛ wa 'dafa we dɛ 'dã mɔ. Dɛa to tɛ wa do wila we nu wa ma dé tɛ NWA Gale gɔ. Wele do wɔ, nɛ nde wa ha nyɔngɔmɔ hã a gɔ, nɛ wa dɔ 'bɔ wi kɛ a do wɔ lì ni do lì.

⁷ Nɛ o'dã winɔ wa dɛ 'dã mɔ do owi sãnɔ. Wa 'bili bele dɛ tɛ wa, nɛ wa bɛ̃ we ĩ ti dia gulu we 'da wa.

⁸ Nɛ nde odia winɔ wa lengge dia we, nɛ wa dɛ tati a dia mɔ iko.

Gale yaka zala owuko Yeruzalɛmɛ

⁹ Aa nɛ, owukonɔ do obe zɔnganɔ kɛ nɛ lénggé mɔ gɔɛ gɛ, nɛ zélé mi sɛ.

¹⁰ Da dɔ̃ ni, nɛ lénggé mɔ gɔ, nɛ nde sabɛlɛ 'do gɛ, nɛ nɛ sa sɛ tɛ nɛ. Mba gɔ, nɛ kpá sɛ 'bɔ wala te vinɔ li fɔ 'da nɛ gɔ.

¹¹ Aa nɛ, owukonɔ kɛ nɛ ɔ ɔi mbɔkɔ sila gɛ, nɛ táná kili, nɛ nɛ sa tɛ nɛ. Nɛ kpóló dia tulu tɛ nɛ do tulu gɛla.

¹² Nɛ zɛ́ ngu'du nɛ, nɛ nɛ he kɔ̃a tɛ nɛ, we kɛ dia fɔnɔ 'da nɛ, do vinɔnɔ 'da nɛ kɛ ma wala nɛ ge nde ni, ma 'danga do'do.

¹³ Otɔanɔ do olenɔ kɛ ma hã zi yangga hã nɛ ni, ma 'bɔ bina. Te tɛ̃ do ogele wɔkɔsɔ hɔa olo nɛ vɛ̃.

¹⁴ Owinɔ wa la kɔ tɔa nwa, nɛ wa yu kɔ gã le vɛ̃, nɛ ma hɔa olo tɔa. Otɔanɔ do gba'da we zɔ do mɔ nu le, ma 'danga sɛ fai. Opunda zamɔ do ogele sa'de wa nɛ sɛ di ni, nɛ wa nyɔngɔ mɔ, nɛ wa dɛ yangga.

Mɛnɔ ma kpolo sɛ ngbɛ ɛ vɛ

¹⁵ Mbe tũ kpo, nɛ nwa a tombo sɛ Hi Wi 'da a dɛ ngɔ lɛ. Do fala nɛ ni, nɛ 'dã nù ma kifi sɛ dia nù, nɛ owinɔ 'da lɛ wa mi sɛ wala te di ni, nɛ fɔnɔ ma ko sɛ odia kpalɛ.

¹⁶ Wa dɛ sɛ bɔlɔ zu dɛa mɔ ngɔ nùi 'da lɛ vɛ̃.

¹⁷ Nɛ bɔlɔ zui 'da wa, ma dɛ sɛ na, wa ɔ do gɛ̃a sila, do dungu fio 'da fala fai.

¹⁸ Owinɔ 'da Gale wa kpa sɛ dia dungu, nɛ wa bí sɛ 'bɔ tɛ wa gɔ. Wa sɛ do dungu fio kɔ tɔa 'da wa.

¹⁹ Nɛ nde kolo gbãlã mũlũ ma 'danga sɛ kɔla 'da owi sɛnɛ wa, nɛ olenɔ 'da wa ma te sɛ sã, nɛ ma 'danga.

²⁰ Nɛ yangga sɛ wena do owinɔ 'da lɛ vɛ̃. Mba gɔ, wa mi sɛ kpalɛnɔ 'da wa tɛ falanɔ vɛ̃ kɛ ma do lì boe ni, nɛ wa la sɛ ongɔmbɔnɔ do opundanɔ 'da wa na, wa yɛnggɛ, nɛ mɔ kpo dɛ́ sɛ wa gɔ.