Ezai 31 - WE NU GALE 1995

Oezipeto wa a ogale gɔ

¹ 'Bako do nɛ, owinɔ kɛ nɛ kulu ngɔ, nɛ nɛ nɛ ngɔ nù Ezipeto we fa na, wa gbaka nɛ ni. Nɛ gbini zã nɛ do osoda Ezipeto, do ongilingilinɔ, do ombalatanɔ 'da wa. Mba gɔ, owinɔ ni wa do odɔa mɔ bi bolo kɛ ma do ngawi wena. We duzu ma, obe Israɛlɛ wa siki 'do wa hã NWA Gale santo 'da wa, nɛ wa kɔ̃̀ we aka a na, a gbaka lo gɔ.

² Gɛnɛ kɔ na mɛ ni, nɛ nde NWA ĩ ti mɛnɔ kɛ a dɛ ma ni. A tumba ngamɔ dɛ ngɔ obe Israɛlɛ, nɛ a là fala hã etumbu hã wa gɔ. A siki li a dɛ tɛ wi Ezipeto, do oyia winɔ kɛ wa amba zu wa ni.

³ Oezipeto wa a Owele 'diko, wa wè tɛ dɛ mɔ ɔ nɛ ogale gɔ. Nɛ ombalatanɔ 'da wa, wa wè tɛ dɛ ɔngbamɔ gɔ. Fala kɛ NWA kala kɔ ɛ dɛ ngɔ, nɛ Owi ngawinɔ, kɛ wa bi bole ngɔ osulu winɔ ni, wa ala sɛ nù. Wa mba sɛ do winɔ kɛ wa bi ngɔ wa ni vɛ̃, nɛ wa kumu.

NWA a zɔ sɛ mɔ tɛ le Yeruzalɛmɛ

⁴ NWA tɔ́a hã mi na: “Fala kɛ gbɔgbɔ ba sa'de mɔ ɛ, nɛ a dãlã ngɔ a, nɛ nde a dɛ́ kili mɔ kpo gɔ. Nɛ wele wè tɛ ndaka a ngɔ sa'de kɛ a gbɛa ni gɔ. Kɔ mɔ ĩ́ na, mi NWA ngɔ mɔ nyanga nza vɛ̃, mi dãlã sɛ tɛ mɛ 'bɔ ngɔ le Yeruzalɛmɛ na mɛ ni, nɛ mɔ kpo ámbá sɛ mi gɔ.”

⁵ NWA ngɔ mɔ nyanga nza vɛ̃, a tata sɛ 'baka a dɛ ngɔ Yeruzalɛmɛ, ɔ nɛ kɛ nɔɛ tata do 'baka ɛ ngɔ tɔa nɛ ni. Nɛ do 'da fala ni, a amba sɛ zu le Yeruzalɛmɛ, nɛ a kpasa sɛ ma kɔ ngamɔ.

⁶ NWA tɔ̃a na: “Aa nɛ, obe Israɛlɛ, nɛ bɛ̃a gɛnɛ mi, nɛ nɛ dɛa 'dã mɔ dɛ 'da mi. Nɛ nde ngangga ni, nɛ sí 'do dɛ 'da mi.

⁷ Mbe tũ kpo, nɛ wele do wele sanga nɛ gɛ, a kala sɛ okpikimanɔ kɛ a dɛa wa do mɔ mbali, do fɛ̃a mɔ bolo ni, nɛ a da ma nù.

⁸ Nɛ nù Asiri ma 'danga sɛ, nɛ nde wi 'dángá sɛ ma a wele gɔ. Oasiri wa yu sɛ bolo, nɛ owi bi wa wa kala sɛ onga osodanɔ 'da wa, nɛ wa a wa tɛ to kolofe.

⁹ Nwa ngɔ nù Asiri a tana sɛ kili, nɛ a yu sɛ. Nɛ ogã wi ngɔ sodanɔ 'da a wa dɛ sɛ 'bɔ kili, nɛ wa yu, nɛ wa la obɛndɛlɛnɔ 'da wa.” NWA Gale, wele kɛ gbagala dɔ do sa'de hã a tɛ Yeruzalɛmɛ ni, a tɔ̃a ni.