Ezai 30 - WE NU GALE 1995

Obe Israɛlɛ wa dɛa na do Oezipeto

¹ NWA Gale tɔ̃a na: “'Bako do nɛ, owi zɔ mɔ tɛ obe Israɛlɛ, we kɛ nɛ bɛ̃a we nu mi. Nɛ 'dafa mɛnɔ kɛ ma yòlò nu mi gɔ ni, nɛ nɛ dɛ ma. Nɛ gba tɔkɔ do ogele wele, nɛ nde mi wèlè nu mi tɛ ma gɔ. Na mɛ ni, nɛ tɛ dɛ 'dã mɔ 'do ngbɛ ɛ do 'do ngbɛ ɛ.

² Nɛ nɛa ngɔ nù Ezipeto we fa na, wa gbaka nɛ, nɛ nde nɛ àkà mi gɔ. Nɛ gba tɔkɔ do nwa ngɔ nù Ezipeto na, a bi bolo zu nɛ.

³ Nɛ nde a sɛ do ngawi we bi bolo zu nɛ bina. Na mɛ ni, Oezipeto wa wé sɛ we gbaka nɛ gɔ, nɛ nɛ kpa sɛ sape li bolo.

⁴ Gɛnɛ kɔ nɛ tombo Owi olo li nɛ do Owi nɛ tonɔ 'da nɛ ngɔ nù Ezipeto, tɛ kɔ le Soanɛ do Hanɛsi,

⁵ nɛ wa vɛ̃ wa kpa sɛ sape. Mba gɔ, Owi kɔ lenɔ ni wa dɛ́ saka mɔ hã wele kpo gɔ. Wa gbáká sɛ nɛ we bi bolo ngɔ nɛ gɔ. Na mɛ ni, nɛ kpa sɛ sape, nɛ nɛ ya sɛ.”

Obe Israɛlɛ wa fa gbaka wi kɔ̃ Oezipeto

⁶ NWA Gale tumba toe gɛ we duzu osa'denɔ tɛ li gba zɔ̃ Negɛvɛ. A na: “Owi nɛ tonɔ 'da obe Israɛlɛ wa kala okpamɔ kpi do kpi, nɛ wa a ma ngɔ opunda do osamo, nɛ wa nɛ do ma hã Oezipeto, kɛ wa gbáká wele gɔ ni. Owinɔ ni wa la do ngɔ nù Negɛvɛ, kɛ ngamɔ do 'dã mɔ kɔ nɛ wena ni. Ogbɔgbɔ, do odã gɔ̃̀, do ogba sɔ̃ sa'de kɛ wa bũ bũlũ ni wa di ni boe.

⁷ Oezipeto wa ɔlɔ li obe Israɛlɛ na, lo gala sɛ wa. Gulu nɛ a mi ia li Oezipeto na: ‘Gba sɔ̃ sa'de kɛ a sulu wena.’ ”

NWA yaka zala obe Israɛlɛ

⁸ Nɛ NWA tɔ̃a hã mi na, mi kɔmɔ 'dã mɛnɔ kɛ obe Israɛlɛ wa kɔ̃a gɛnɛ dɛ ma ni dɛ kɔ 'buku, nɛ 'buki ni ma 'bana sɛ fai. Kɔ do 'do nza, nɛ ma be sɛ gulu we hã wa na, wa a wi dɛ 'dã mɔ.

⁹ Owinɔ ni wa bɛ̃a we nu mi, wa a Owi 'bili bɛlɛ, nɛ wa kɔ̃̀ we zele mbulanɔ 'da mi gɔ.

¹⁰ Wa tɔ̃ hã Owi gba olo nu mi na: “Nɛ tɛ àkà Gale we ĩ ti mɛnɔ a kɔ̃a ni gɔ. Nɛ tɛ tɔ̃̀ gbãlã we hã lɛ gɔ. Nɛ tɔ̃ we kɛ ma dia zala lɛ dia ni iko. Nɛ tɔ̃́ tati a linggamɔ zu nɛ hã lɛ,

¹¹ nɛ tɛ kpè wala ti lɛ gɔ. Lɛ kɔ̃̀ we zele li Gale santo 'da lɛ obe Israɛlɛ gɔ.”

Mɛnɔ ma 'danga sɛ vɛ

¹² Nɛ zélé wenɔ kɛ Gale santo 'da obe Israɛlɛ tɔ̃ ma gɛ. A na: “Ta zu nɛ ila ngɔ wenɔ kɛ mi tɔ̃ ma hã nɛ ni, nɛ nɛ kɔ̃a tati a dɛ ngatɛ do dɛ nga zu iko.

¹³ Nɛ a Owi dɛ 'dã mɔ. 'Dã mɛnɔ 'da nɛ ma mangga sɛ nɛ, ɔ nɛ kɛ dɛlɛ tɔa mangga nɛ ni, nɛ 'da fala kpo, nɛ nɛ ala sɛ hurr.

¹⁴ Nɛ gbini sɛ kisi kisi ɔ nɛ kpana kɛ wa zɛa sanga nɛ zɛa ni. Wa 'bó sɛ 'bɔ ma dɛ olo nɛ gɔ, nɛ wa kpá sɛ 'bɔ sangbãlã kpana ni we u do we, tabi we kɛ'dɛ do lì gɔ.”

Nɛ gbíní zã nɛ do NWA Gale

¹⁵ NWA, kɛ a a Gale santo 'da obe Israɛlɛ ni na: “Nɛ lá fala yɛnggɛ mba mba, nɛ dúngú fio. Nɛ kpóló tɛ nɛ dɛ 'da mi, nɛ mi hã sɛ ngawi hã nɛ, nɛ nɛ dɛ́ sɛ 'bɔ kili gɔ.” Nɛ nde nɛ kɔ̃̀ we dɛ na mɛ ni gɔ.

¹⁶ Nɛ gbíní zã nɛ na, nɛ kũ sɛ ngɔ ombalatanɔ 'da nɛ, nɛ nɛ yu sɛ owi sɛnɛ nɛ. Mɛ a gbãlã we, nɛ yu sɛ wa. Nɛ nɛ lengge 'bɔ na, ombalatanɔ 'da nɛ wa ĩ ti yu yu wena, nɛ nde nɛ ĩ́ na, owi sɛnɛ nɛ wa ndaka sɛ 'do nɛ, nɛ wa kpa nɛ.

¹⁷ Gɛnɛ kɔ ombe winɔ sanga nɛ ni wa mba ngba wa koto kpo, kɔ wa zɔ wi sɛnɛ nɛ zu a kpo iko, nɛ wa yu sɛ a. Kɔ owi sɛnɛ nɛ wa hɔ mɔlɔ, nɛ nɛ vɛ̃ nɛ yu sɛ. Tala osodanɔ 'da nɛ wa 'báná sɛ gɔ. Wa kpa sɛ olo wa tati a obɛndɛlɛ bolonɔ kɛ wa zĩ ma ndũu ndũu tɛ zu kalanɔ ni iko.

NWA a gala sɛ obe Israɛlɛ

¹⁸ NWA 'bɔ 'da ngba soe kɛ a wia we be dia zã, do ĩ 'bako hã nɛ ni. Mba gɔ, a a Gale, wi dɛ bɔlɔ zu dɛa mɔ. Owinɔ vɛ̃ kɛ wa gbini zã wa do a ni, wa a wi yangga.

¹⁹ Aa nɛ, owi Yeruzalɛmɛ, nɛ hé sɛ 'bɔ kɔ̃a mbé nɛ gɔ. Nɛ sa sɛ mɔ hã NWA, nɛ a zele sɛ, nɛ a gese nu nɛ, we kɛ a do mbɔkɔ li wena.

²⁰ Do 'da fala ngamɔ, nɛ nwa a gbaka sɛ nɛ, nɛ a hã sɛ mɛnɔ kɛ nɛ kɔ̃a ni hã nɛ. A be sɛ mɔ hã nɛ, nɛ a úsú sɛ tɛ̃ a do nɛ gɔ. Nɛ zɔ sɛ a do li nɛ ngboo.

²¹ Fala kɛ nɛ nɛ yɔ wala, we ba si ngɔ gale tabi ngɔ ngawili kɔ̃, nɛ nɛ zele sɛ gɛlɛ a tɛ tɔ̃ na: “Nɛ zɔ́ dia wala mɛ a kɛ gɛ, nɛ bá do ma!”

²² Okpikimanɔ kɛ nɛ nãlã fɛ̃a mɔ bole do mɔ mbalinɔ tɛ nɛ ni, nɛ zɔ sɛ ma na, mɛ a mɔ ndi, nɛ nɛ da sɛ ma zamɔ. Nɛ tɔ̃ sɛ na: “Fó mɔ ndinɔ gɛ li lɛ do'do!”

²³ Nɛ nɛ mi sɛ kpalɛnɔ 'da nɛ, nɛ nwa a dɛ sɛ na, kolo tɛ dɛ ngɔ nɛ, hã ma gã. Nùi 'da nɛ ma ko sɛ odia kpalɛ hã nɛ, nɛ ma dɔ sɛ wena. Nɛ osa'denɔ 'da nɛ wa nyɔngɔ sɛ dia wɔkɔsɔ tɛ li zɔ̃nɔ.

²⁴ Ongɔmbɛnɔ do opundanɔ kɛ nɛ dɛ toe do wa kɔ fɔnɔ 'da nɛ ni, wa kpa sɛ odia nyɔngɔmɔ we nyɔngɔ ma.

²⁵ Do ngba soe ni, ngbo nu le 'da owi sɛnɛ nɛ ma gbini sɛ, nɛ wa fe sɛ. Nɛ kalanɔ do otɔ̃nɔ vɛ̃ ma fũ sɛ, nɛ lì yolo kɔ nɛ, nɛ ma fo.

²⁶ Zɛkɛ ma to sɛ ɔ nɛ wese ni, nɛ wese ma to sɛ nɛ ngɔ kɛnɔ ma to fai ni fala sambo. Do ngba soe ni, NWA a fɔlɔ sɛ li dani tɛ owinɔ 'da a, nɛ a kpasa sɛ wa.

NWA a 'bili sɛ we 'da Oasiri

²⁷ Nɛ zɔ́ nwa do tɛ̃ a ngboo, a yula nyɛlɛ wena, kɔ a tɛ tɛ ma. Dã ba a wena, nɛ li a fila tɛ nɛ gizi gizi. Wila we nu a bɛlɛ mɔ ngba'dii ɔ nɛ we ni.

²⁸ A fi gba bũ dati a, nɛ ma kala mɛnɔ vɛ̃, nɛ ma la do ma ɔ nɛ gba fua lì ni. A tɛ we hã etumbu hã nu kɔnggɔ owinɔ. A kumu sɛ wa do omɛnɔ kɛ wa 'dafa we dɛ ma ni vɛ̃.

²⁹ Nɛ nɛ, owi Yeruzalɛmɛ, nɛ dɛ sɛ yangga, nɛ nɛ ga zuma, ɔ nɛ kɛ nɛ ga do tũi 'da fala ɛngga Ɔ ti Da ni. Sila nɛ sɛ do yangga ɔ nɛ sila owinɔ kɛ wa zele giti gaga, nɛ wa la do 'da nɛ we kũ dɛ ngɔ kala 'da NWA Gale, wi amba zu nɛ obe Israɛlɛ ni.

³⁰ NWA a dɛ sɛ na, winɔ vɛ̃ wa zélé gɛlɛ a, kɛ ma dɔlɔ nganda wena ni. Nɛ a dɛ sɛ 'bɔ na, wa ĩ ti ngawi 'da a. A be sɛ dã 'da a hã owinɔ kɔ nyɛa we, kɛ ma bɛlɛ mɛnɔ ni, do kɔ gba kolo, do kɔ kolo gbãlã mũlũ.

³¹ Oasiri wa zele sɛ gɛlɛ NWA, nɛ wa zɔ sɛ dã 'da a, nɛ wa tana kili.

³² NWA a bi sɛ do Oasiri, nɛ a hã sɛ etumbu hã wa. Etumbui ni, ma dɛ sɛ yangga tɛ owinɔ 'da a, nɛ wa zɛ sɛ biã do kundu, nɛ wa 'bu kɔ̃ wa do 'da nɛ.

³³ Wa 'dafa zi fala we dɔ do nwa ngɔ nù Asiri belee ia. Fala ni, wa zã ma korr gã wena, nɛ ma 'du wena. Wa a ogua kɔ nɛ dɛlɛ wena, nɛ wa fi sɛ we tɛ nɛ we dɔ do a. NWA a fi sɛ gba bũ, nɛ ma ufu we ni, nɛ ma nyɛ vɛ vɛ vɛ.