Ezai 3 - WE NU GALE 1995

Nù Yuda ma 'danga sɛ

¹ Gale, NWA ngɔ mɔ nyanga nza vɛ̃, a dɛ sɛ na, nyɔngɔmɔ do lì nɔ nɔa tɛ 'bànà 'bɔ ngɔ nù Yuda, do kɔ le Yeruzalɛmɛ gɔ. Nɛ a fo sɛ mɛnɔ vɛ̃, kɛ ma gala winɔ ni do'do.

² A fo sɛ Owi bolonɔ, do onga sodanɔ, Owi gɔnɔ we, Owi gba olo nu a Gale, Owi dɛ sɔ̃, do okumu lenɔ,

³ onwa ngɔ osodanɔ, do ogã winɔ, owi tɔ̃ mbulanɔ, Owi dɛ gba mɛnɔ, do onganga tunu mɛnɔ.

⁴ NWA tɔ̃a na: “Mi e sɛ obe zagbãlãnɔ, kɛ li wa tɛ sɔ̃̀ gɔ ni, nɛ wa dungu nwa ngɔ wa. Nɛ wa dɛ sɛ do wa nɛ́ kɛ zã wa kɔ̃a ni.”

⁵ Sanga owinɔ, wele do wele a fa sɛ we zɛlɛ tɛ ngba a, tabi nya a. Obenɔ wa dɛ́ sɛ kili kpasa winɔ gɔ, nɛ Owele yala iko wa zɛlɛ sɛ tɛ nwanɔ.

⁶ Wi wili a te sɛ tɛ nya a, kɛ wa do a nu fɛlɛ kula kpo ni, nɛ a tɔ̃ hã a na: “Mɔ do gba tulu ngɔ we he'de ma boe. Mɔ dúngú nwa ngɔ lɛ, hã mɔ e mbula ngɔ le 'da lɛ kɛ ma 'danga gɛ.”

⁷ Nɛ wi ni a gese sɛ na: “Ɔ̃ ɔ̃, fo nyɔngɔmɔ, do gba tulu ngɔ kɔ̃ mi bina. Mi wè we dɛ gba sɔ̃ mɔ hã nɛ gɔ. Nɛ tɛ è mi do nwa gɔ.”

⁸ Yeruzalɛmɛ tia nù, nɛ nù Yuda ma 'danga. Lɛnggɛ nu owinɔ do dɛa mɔ tɛ wa ma be na, wa bɛ̃a we nu nwa, nɛ wa dã zu li a.

⁹ Bula li wa ma be na, wa a wi dɛ 'dã mɔ. Wa dɛ 'dã mɔ dɛ gbali owinɔ, ɔ nɛ kɛ owi Sodɔmɛ wa dɛ zi ni, nɛ wa úsú ma gɔ. 'Bako do wa, wa fa ngamɛ 'da wa do tɛ wa.

¹⁰ Nɛ ĩ na, Owi bɔlɔ zu wa sɛ do yangga, we kɛ wa kpa sɛ si olo mɛnɔ kɛ wa dɛ ma ni.

¹¹ 'Bako do o'dã winɔ! Mɛnɔ vɛ̃ ma 'danga sɛ do wa, nɛ wa kpa sɛ etumbu olo mɛnɔ wa dɛa ni.

¹² NWA Gale tɔ̃a na: “Aa owinɔ 'da mi, Onwanɔ kɛ wa dungu ngɔ nɛ gɛ, wa a owi nga'ba, wa fa we kala mbili kɔ̃ nɛ iko. Aa owinɔ 'da mi, owi kpe dati nɛ, wa ɔkɔlɔ nɛ, nɛ wa be 'dã wala hã nɛ.”

Gale 'bili ngbangga 'da onwa ngɔ owinɔ 'da a

¹³ NWA kulu ngɔ we gɔnɔ ngbangga, a nɛ 'bili we 'da owinɔ 'da a.

¹⁴ A dãlã do okumu lenɔ, do onwa ngɔ owinɔ 'da a na: “Wi 'danga fɔ vinɔ 'da mi, wi a nɛ. Tɔa 'da nɛ dunu do mɛnɔ kɛ nɛ kala ma kɔ̃ Owi sãnɔ ni.

¹⁵ Gulu kɛ nɛ hã ngamɔ hã owinɔ 'da mi, nɛ nɛ zɛlɛ tɛ wi sãnɔ we ge nde?” NWA Gale ngɔ mɔ nyanga nza vɛ̃ tɔ̃a ni.

Gale dãlã do owuko Yeruzalɛmɛ

¹⁶ NWA tɔ̃a na: “Owuko Yeruzalɛmɛ wa dɛ wali wena. Wa 'bete ngu'du wa, nɛ wa nɛ do nɔ, wa nyɛ li wa hã wi wilinɔ, wa bá nyanga wa ngɔ gɔ, nɛ wa dɛ na, mɔ mbalinɔ nu gɛlɛ nyanga lo ni lo ngbɛ ɛ, nɛ ma wele, hã winɔ wa zele.”

¹⁷ We duzu ma, NWA a hã sɛ sape hã wa, a kɛlɛ sɛ mili zu wa vɛ̃ do'do.

¹⁸ Do kɔ̃ tũi ni, NWA a kala sɛ mɔ 'dafa tɛ wa kɔ̃ wa vɛ̃. A kala sɛ mɔ mbali nu gɛlɛ nyanga wa, mɔ walinɔ wa e ngɔ zu wa ni,

¹⁹ mɔ zala winɔ, mɔ nu kɔ̃ winɔ, do obe tulunɔ wa gu li wa ni.

²⁰ A kala sɛ 'bɔ okitambalanɔ, osɛninɔ, o'dɛ̃nɔ do oina mbɔ'dɛnɔ wa he'de dɛ tɛ wa ni.

²¹ A kala sɛ opɛtɛnɔ zu kɔ̃ wa, do kɛnɔ wa kɔ'bɔ nu zɔ̃ wa ni,

²² otulu ɛngganɔ 'da wa, do obe tulu fi 'do gɛlɛ wa, do be koe wa a do mɛnɔ 'da wa ni,

²³ ogba tulu ngɔnɔ, osimisinɔ do tulu fi zu 'baka wa.

²⁴ Wa fɛ́lɛ́ sɛ 'bɔ yɔmbɔ gɔ, nɛ tɛ wa ma unu sɛ mbulu mɔ, nɛ wa fa sɛ nga gbãlã fɛlɛ, nɛ wa kpo ngɔ tulu 'da wa olo li 'dɛ̃. Wa kɛlɛ sɛ mili zu wa vɛ̃, olo li kɛ na, wa dɛ ma de wena ni. Wa he'de sɛ tulu gɛla olo dia tulunɔ 'da wa. Mɛ a gbãlã we, bula li wa ma 'danga sɛ, nɛ wa kpa sɛ sape.

Owi fio wilinɔ tɛ Yeruzalɛmɛ

²⁵ Aa nɛ owuko Yeruzalɛmɛ, owili nɛ vɛ̃ wa fe sɛ li bolo. Gɛnɛ kɔ onga sodanɔ, nɛ nde wa kpásá sɛ li bole gɔ.

²⁶ Nɛ he sɛ kɔ̃a, nɛ nɛ ala sɛ nu nɛ kɔ le gɛ. Nɛ sɛ a owi fio wili, fo sɛ mbé mɔ kɔ̃ nɛ bina, nɛ dungu sɛ dɛ bulu nù gɛ iko.