Ezai 28 - WE NU GALE 1995

Nù Israɛlɛ si gbãlã ngɔ ma 'danga sɛ

¹ 'Bako do nɛ Owi Samaria! Nɛ dɛa le 'da nɛ dɛ ngɔ dia nùi kɔ gbangɔlɔ̃, nɛ odia tɔanɔ kɔ nɛ ni, mɛ a mɔ wali 'da ogã winɔ, kɛ wa a Owi bá dɔ̃ iko. Le ni ma ɔ nɛ dia ndasa nwa kɛ wa gu ma zu wele, kɛ a yɔndɔ tɛ bá dɔ̃ do'do ni.

² Kɔ nɛ zɔ́, NWA a tombo sɛ wele kpo kɛ a nganda wena, nɛ a tɛ sɛ ɔ nɛ gba kolo gbãlã mũlũ, tabi gba bũ kamba, tabi ua dã kolo ni. Wi ni a hɔ, nɛ a bindi sɛ nùi 'da nɛ vɛ̃ ti lì.

³ Wa 'danga sɛ mɛnɔ vɛ̃ kɛ ma hã wali hã ogã winɔ ni do'do. Ogã winɔ ni wa a Owi bá dɔ̃ iko.

⁴ Le Samaria, kɛ wa dɛa ma ngɔ dia nù kɔ gbangɔlɔ̃, nɛ ogba dia tɔanɔ kɔ nɛ wena ni, ma 'danga sɛ. Ma fele sɛ ɔ nɛ wala te figɛ, kɛ ma fele dati hã zɔlɔ nɛ ni. Fala kɛ wele zɔ ma, nɛ a 'bi, nɛ a da kɔ nu a fala kpo, nɛ a nyɔngɔ do ti.

⁵ Mbe 'da fala kpo, nɛ nwa ngɔ mɔ nyanga nza vɛ̃ sɛ a dia ndasa dɔ̃lɔ̃ li 'da owinɔ 'da a, kɛ wa 'bana nza ni.

⁶ A dɛ sɛ na, owi 'bili wenɔ wa gɔnɔ ngbangganɔ do bɔlɔ nɛ ngboo, nɛ osodanɔ wa ɔ do ngawi we ndaka Owi sɛnɛ wa nu ngbo le 'da wa do'do.

Owi bá dɔ̃nɔ wa mɔma Ezai

⁷ Nɛ zɔ̃ onganganɔ do Owi gba olo nu Gale, wa yɔndɔ tɛ nɔ nga dɔ̃nɔ do'do. Wa nɔ nga dɔ̃ɛ hã ma ba wa, nɛ wa dɛ gbee gbee ni. Nɛ owi gba olo nu Gale wa ka mɔ tafu, nɛ nde wa zɔ́ mɛnɔ kɛ Gale be ma hã wa ni do dia nɛ gɔ. Nɛ onganganɔ wa tɔ̃́ 'bɔ mbula hã owinɔ do dia nɛ gɔ.

⁸ Wa nɔ dɔ̃ɛ, nɛ wa ɔ̃lɔ̃, nɛ ma kpa do ngɔ mɛsa 'da wa vɛ̃. Mɔ ndinɔ wa dɛ ma ni, ma kpa do falanɔ vɛ̃.

⁹ Nɛ wa tɔ̃ do zu li mi na: “Ezai kɔ̃a we be we hã wio nde? A tɔ̃ we mɛnɔ kɛ Gale be ma li a ni hã wio nde? A zɔ wá lɛ ɔ nɛ ogbɛ̃a be, kɛ wa yula tɛ gɔnɔ bele naa wa ni, do kɛ na a be wenɔ 'da a hã lɛ nde?

¹⁰ Nɛ zélé kɛ a yamba we be wenɔ hã lɛ gbãlã nɛ kpo kpo kpo, do gulu nɛ kpo kpo kpo gɛ.”

¹¹ Fala kɛ nɛ kɔ̃́ we zele mi gɔ, nɛ NWA Gale a be sɛ wenɔ 'da a hã nɛ do lɛnggɛ kɛ nɛ zélé ma ngboo gɔ ni.

¹² NWA hã zi wala dia dungu do gɛ̃a dungu hã nɛ, nɛ nde nɛ bɛ̃a we zele nu a.

¹³ Gulu nɛ hã a be sɛ wenɔ 'da a hã nɛ gbãlã nɛ kpo kpo kpo do gulu nɛ kpo kpo kpo. Kɔ ma hɔ ndɔti nɛ, nɛ nɛ te sɛ ngindi, nɛ gbogbolo nɛ ma gbini sɛ, nɛ nyanga nɛ ma kala sɛ ti nɛ do'do. Nɛ nde nɛ wé sɛ we kulu ngɔ, hã nɛ yu gɔ.

Ta bɛlɛduma tɔa 'da owi Yeruzalɛmɛ

¹⁴ Aa nɛ, owi walinɔ kɛ nɛ dungu nwa ngɔ owi Yeruzalɛmɛ gɛ, nɛ zélé wenɔ kɛ NWA tɔ̃ ma gɛ, a na:

¹⁵ “Nɛ dɛ́ wali tɛ tɔ̃ na, nɛ gba tɔkɔ do ofionɔ ti nù gɛ, nɛ nde nɛ kpá sɛ 'bɔ mbé ngamɔ gɔ. Mba gɔ, nɛ zɔ na, mɔ bɛlɛnɔ do oyia dɛa mɛnɔ ni, ma amba sɛ zu nɛ.”

¹⁶ Nɛ NWA Gale tɔ̃a 'bɔ na: “Mi fa sɛ dia ta, kɛ ma nganda wena ni, nɛ mi e ma nyanga tɔa tɛ Sioni, nɛ mi dɛ bɛlɛduma do ta dɛ ngɔ nɛ. Mi dɛ sɛ na mɛ ni we yamba do sila winɔ. Wi kɛ a gbíní zã a do mi, nɛ a nganda sɛ ɔ nɛ ta bɛlɛduma tɔa ni.

¹⁷ Fɛlɛ kɛ mi zɔ sɛ do 'da bɔlɔ dɛlɛ tɔa ni, mɛ sɛ a bɔlɔ zu dɛa mɔ. Nɛ fɛlɛ mɔ bole we zɔ do 'da bɔlɔ ngala dɛlɛ tɔa, mɛ a dɛ mɔ do wala olo nɛ.” Nɛ nde kolo gbãlã mũlũ ma 'danga sɛ fala bɛlɛ kɛ nɛ usu do tɛ nɛ ni do'do, nɛ lì ma nɛ sɛ ngɔ ma fɛɔɔ.

¹⁸ Gba tɔkɛ kɛ nɛ gba ma sanga nɛ do ofionɔ ti nù gɛ ni, ma Sɔkpɔ sɛ, nɛ ma ámbá sɛ zu nɛ gɔ. Na mɛ ni, fala kɛ ngamɔ ma hɔ, nɛ ma gbɛ sɛ nɛ.

¹⁹ Ngamɛ ni, ma la sɛ kɔ̃ tũ kpo kpo, do tũ tabi do gba wese, nɛ ma kpa sɛ nɛ. Nɛ nɛ tana sɛ kili dati tonɔ 'da Gale.

²⁰ Nɛ kpa sɛ zɛlɛ tɛ ɔ nɛ wi kɛ wa tɔ̃ lɛnggɛ 'da a do gba we na, a ɔa ngɔ be dɔ tangge, nɛ fo fala bɔlɔ nyanga a bina. Nɛ a fi gbau tulu kɛ li ma ga gɔ ni ngɔ a.

²¹ NWA a bi sɛ nɛ, ɔ nɛ kɛ a bi zi owinɔ tɛ ngɔ kala Pɛrasimɛ, do kɛ a bi zi 'bɔ owanɔ tɛ ngɔ mbɛ nù Gabaoni ni. A dɛ sɛ na mɛ ni, takɔ linggamɛ kɛ a 'dafa ma ni, ma dɛ tɛ̃ ɛ. Nɛ nde toe kɛ a nɛ dɛ ma ni, mɛ sɛ a gba sɔ̃ dɛa to.

²² Ngangga ni, nɛ lá fala dɛ yia yangganɔ nɛ dɛ ma gɛ. Ní gɔ, nɛ fɛlɛ ma nɔ sɛ gɛlɛ nɛ. We kɛ NWA Gale ngɔ mɔ nyanga nza vɛ̃ tɔ̃a hã mi na, a 'bili ia, a 'danga sɛ nùi gɛ vɛ̃.

Hã zã 'da Gale

²³ Nɛ gɛ́ zala nɛ, hã nɛ zele wenɔ kɛ mi nɛ tɔ̃ ma hã nɛ ni do dia nɛ.

²⁴ Nɛ ĩ vɛ̃ na, fala kɛ wele wa mɔ, nɛ nde a 'dángá sa 'da a tɛ gɔmɔ nùi vɛ̃ dɛ ngɔ gɔ. A 'dáfá ngɔ nɛ, nɛ a yɔlɔ wala ngɔ nɛ vɛ̃, sɛ nɛ a mi kpalɛ tɛ nɛ de gɔ.

²⁵ A gɔmɔ tati a fala fɛ do 'bulu sanggonɔ, nɛ a yɔlɔ wala fala mi lɔsɔ do ɔrzɛ, nɛ a mi gã gbãlã blenɔ do nu ngbaka.

²⁶ Wi bia hã zã dɛ na mɛ ni hã a, wi a Gale.

²⁷ Nɛ we fo gbãlã 'bulu Sanggo, nɛ nde wele á wala nɛ nù, nɛ a nɛ ngɔ ma do ngilingili gɔ. A ba te, nɛ a ngbɔ do ma ngbɔa iko.

²⁸ Nɛ we fo gbãlã ble, nɛ a nɛ ngɔ ma do ngilingili. Nɛ nde a nɛ́ ngɔ ma gbaa na gbãlã nɛ ma 'bu 'bu gɔ.

²⁹ Wi bia hã zã dɛ na mɛ ni, wi 'bɔ a NWA ngɔ mɔ nyanga nza vɛ̃. Nɛ mɛnɔ kɛ a 'dafa ma, nɛ ma dɛ tɛ̃ ɛ ni, ma de wena, nɛ ma be hã lɛ na, hã zã 'da a ma gã wena.