Ezai 26 - WE NU GALE 1995

Gale a hã sɛ dungu fio hã owinɔ 'da a

¹ Do ngba soe ni, owi ngɔ nù Yuda wa ga sɛ zuma na: Le 'da lɛ ma nganda wena. Wi kɛ a zɔ mɔ tɛ nɛ, wi a NWA do tɛ̃ a ngboo. A dɛa gba ngbo 'do ma bɔa, nɛ ma zĩ ma takpa.

² Nɛ fĩ́ nu ngbo le, takɔ owi kɔ̃ Gale kɛ wa dɛ bɔlɔ zu dɛa mɛnɔ ni, wa le kɔ nɛ.

³ NWA, mɔ a mɔ hã dungu fio ngboo hã owinɔ kɛ wa kpóló nu wa gɔ, nɛ wa gbini zã wa do mɔ fai ni.

⁴ Lɛ é sila lɛ ngɔ nwa fai, we kɛ a lá fala amba zu lɛ gɔ.

⁵ A hã sape hã Owi dɛ ngatɛnɔ, nɛ a 'danga lenɔ 'da wa kɛ wa dɛa zi gba ngbonɔ 'do nɛ ni. A gbini ngbonɔ ni vɛ̃ dɛ nu.

⁶ A dɛa na, owi 'bakonɔ do owi sãnɔ wa ma lenɔ ni do nyanga wa.

⁷ NWA, mɔ be bɔlɔ wala hã wi bɔlɔ zu, nɛ a yɛnggɛ do li dia wala kɛ mɔ 'dafa ma hã a ni.

⁸ Lɛ zele mbulanɔ 'da mɔ, nɛ lɛ gbini zã lɛ do mɔ. Lɛ ia sila lɛ vɛ̃ ngɔ mɔ, nɛ lɛ kɔ̃a tati a dia zu li mɔ.

⁹ Do tũi, nɛ mi lengge do mɔ, nɛ mi e sila mi vɛ̃ we fa mɔ. Aa NWA, mɔ gɔnɔ ngbangga 'da owinɔ sɛ a wa yambala we dɛ mɔ do bɔlɔ nɛ de.

¹⁰ Gɛnɛ kɔ mɔ ĩ 'bako hã o'dã winɔ, nɛ nde wa yámbálá sɛ dɛ bɔlɔ zu dɛa mɔ gɔ. Gɛnɛ kɔ wa ɔ dɛ sanga odia winɔ, nɛ nde wa dɛ fai a 'dã mɔ iko. Wa bɛ̃a we ĩ ti gã wi 'da mɔ NWA.

¹¹ NWA, mɔ bia kɔ̃ mɔ li o'dã winɔ, nɛ nde wa lènggè do ma gɔ. Wa zɔ sɛ mɔ tɛ bi ngɔ owinɔ 'da mɔ, wanɔ kɛ wa ngɔ sila mɔ ni, nɛ sape ma ba sɛ li wa. NWA, mɔ ha ngamɔ hã wa, ɔ nɛ kɛ mɔ hã ma hã Owi sɛnɛ mɔ ni.

¹² NWA, lɛ ĩ na, mɔ hã sɛ dungu fio hã lɛ, nɛ mɛnɔ vɛ̃ kɛ lɛ dɛ sɛ ma ni, ma be sɛ na mɔ do dia zã we lɛ boe.

¹³ Aa NWA Gale 'da lɛ, mɔ a NWA 'da lɛ zu mɔ kpo, lɛ lengge tati a do mɔ. Nɛ nde ogele nwanɔ ngɔ nù gɛ, wa ia zi mbula ngɔ lɛ.

¹⁴ Nɛ Onwanɔ ni wa fia, wa hɔa obɔzɔ wi. Wa kúlú sɛ 'bɔ ngɔ gɔ, wa kpásá sɛ mbé nɛ gɔ. Mɔ kumu wa ngɔ nù nga do'do, nɛ mɔ 'danga mɛnɔ wa dɛa zi ni vɛ̃ na, ma tɛ gbà 'bɔ ta zu wele ngɔ wa gɔ.

¹⁵ Aa NWA, mɔ dɛa na, lɛ owinɔ 'da mɔ, lɛ dɛlɛ, nɛ nùi 'da lɛ ma gã dɛ dati, nɛ ma be dɔ̃lɔ̃ li 'da mɔ.

¹⁶ NWA, mɔ hã zi etumbu hã lɛ, nɛ lɛ owinɔ 'da mɔ, lɛ kpa ngamɔ. Nɛ nde lɛ siki li lɛ dɛ 'da mɔ, nɛ lɛ sa mɔ hã mɔ na, mɔ gbaka lɛ.

¹⁷ Lɛ zɛa nu lɛ dati mɔ NWA, ɔ nɛ wuko kɛ a do zɛlɛ kula ni.

¹⁸ Lɛ zɔa zi ngamɔ yala iko, nɛ nde lɛ kò be olo nɛ gɔ. Nɛ lɛ dɛ̃ na, owinɔ 'da lɛ wa dɛlɛ gɔ. Lɛ dɛ̀ dia mɔ kpo we le 'da lɛ gɔ.

¹⁹ Aa NWA, ofionɔ 'da mɔ, wa tunu sɛ, mɔ kpasa sɛ wa kɔ fio. Wɔlɔ winɔ 'da mi vɛ̃ wa za'da sɛ nza, nɛ wa he sɛ mɔ do yangga. NWA a kpasa sɛ winɔ kɛ wa fia zi belee ni, ɔ nɛ kɛ mbɔɛ ma kpã ngɔ nga nùi, nɛ ma mbɔkɔ, nɛ mbé kpalɛ hɔ ni.

NWA a gɔnɔ sɛ ngbangga 'da owinɔ

²⁰ Aa nɛ, owinɔ 'da mi, nɛ yú, hã nɛ lé tɔa. Nɛ kpé nu tɔa dɛ ngɔ nɛ, nɛ nɛ kã ma. Nɛ úsú tɛ nɛ gbaa na, dã 'da nwa ma e sɛ nɛ de.

²¹ NWA hɔa nza kɔ tɔa 'da a, nɛ a tɛ tɛ ma we hã etumbu hã Owi dɛ 'dã mɛnɔ ngɔ nù gɛ. Tɔkɔ tɛ winɔ kɛ ma a zi nù ni, ma be sɛ tɛ̃ ɛ, nɛ wɔlɔnɔ kɛ wa usu zi ma ni, nùi ma fo sɛ ma dɛ nza.