Ezai 25 - WE NU GALE 1995

Zuma dɔnggɔ do Gale

¹ Aa NWA, mɔ a Gale 'da mi. E kɔ mi dɔnggɔ mɔ, nɛ mi tɔ̃ de sako li mɔ, we ɔngbamɛnɔ vɛ̃ kɛ mɔ dɛa ni. Zi dati belee, mɔ lingga zi we dɛ de mɛnɔ ni, nɛ mɔ dɛa ma ɔ nɛ kɛ mɔ lingga ni.

² Mɔ 'danga le 'da Owi sɛnɛ lɛ. Mɔ gbini ngbo nu le 'da wa, nɛ mɔ gbɛsɛ gà tɔanɔ 'da wa do'do. Wa dɛ́ sɛ 'bɔ ma dɛ olo nɛ gɔ.

³ Ma hã owinɔ kɛ wa nganda zi wena ni, wa dɔnggɔ sɛ dɔ̃lɔ̃ li 'da mɔ, nɛ wa dɛ sɛ 'bɔ kili mɔ. Ogã winɔ kɛ wa zɛlɛ zi tɛ ongba wa ni, wa dɛ sɛ 'bɔ kili mɔ.

⁴ Owi 'bakonɔ do owi sãnɔ wa siki zi li wa dɛ 'da mɔ, nɛ mɔ amba zu wa 'da fala ngamɔ. Owi zɛlɛ tɛ winɔ wa 'danga le 'da wa, ɔ nɛ kɛ gba kolo 'danga kpalɛ li fɔ ni. Nɛ mɔ kila zu wa, ɔ nɛ kɛ tɔa kele zu wele do 'da fala gba kolo ni. Olo owi zɛlɛ tɛ wa ma kolo ngaɔɔ, ɔ nɛ kɛ wese kolo wɔkɔsɔ do 'da fala sabɛlɛ ni.

⁵ Nɛ mɔ fi zi gɔ̃lɔ̃ ngɔ wa, ɔ nɛ kɛ gba te fi gɔ̃lɔ̃ do 'da fala tua wese ni. Mɔ NWA, mɔ kpia nu owi sɛnɛ lɛ, nɛ mɔ kila dati wa vɛ̃, ɔ nɛ kɛ tũ kolo kele li wese ni.

Gale a dɛ sɛ mɔ dɔ hã owinɔ vɛ̃

⁶ NWA Gale ngɔ mɔ nyanga nza vɛ̃, a tɛ sɛ dɛ ngɔ kala Sioni, nɛ a dɛ sɛ mɔ dɔ hã owinɔ ngɔ nù gɛ vɛ̃. Wa nyɔngɔ sɛ odia mulu sa'de kpi do kpi, nɛ wa nɔ sɛ 'bɔ odia dɔ̃.

⁷ Dɛ ngɔ kala ni, a hɔlɔ sɛ tulu gɛlanɔ tɛ owinɔ, nɛ a fo 'bako kɔ sila wa do'do.

⁸ NWA Gale a fo sɛ fio ngɔ nù gɛ do'do, nɛ mbé fio gbɛ́ sɛ 'bɔ wele gɔ. A dili sɛ mili kɔ̃a li owinɔ vɛ̃, nɛ sape kɛ owinɔ 'da a wa kpa zi ma ngɔ nù gɛ ni, a fo sɛ ma do'do. Nɛ zɔ, mbuli kɛ NWA kpua ma gɛ a ni.

⁹ Do ngba soe ni, owinɔ wa tɔ̃ sɛ na: “NWA, mɔ a Gale 'da lɛ ngboo. Lɛ gbini zi zã lɛ do mɔ, nɛ mɔ fua lɛ li ngamɔ. Lɛ he mɔ, nɛ lɛ dɛ yangga, we kɛ mɔ a wi kpasa lɛ.”

Gale a hã sɛ etumbu hã Omoabɛ

¹⁰ NWA a zɔ sɛ mɔ tɛ kala Sioni. Nɛ nde owi sɛnɛ Omoabɛ wa mbɔtɔ sɛ wa ti nyanga wa, ɔ nɛ kɛ wele ma do zɔ̃ tɛ li fɔ ni.

¹¹ Omoabɛ wa kala sɛ kɔ̃ wa dɛ ngɔ do 'bako, ɔ nɛ wi yambala zula lì, kɛ a tia 'dɔ gba 'du lì, nɛ nde a wè tɛ hɔ nza gɔ ni. NWA a hã sɛ sape hã wa olo wali 'da wa, nɛ wa wé sɛ we yu ngamɛ ni gɔ.

¹² NWA a gbini sɛ gba ngbo nu lenɔ 'da wa, nɛ a 'danga sɛ ongala tɔanɔ 'da wa. A zã sɛ ma vɛ̃ dɛ nù.