Ezai 24 - WE NU GALE 1995

NWA Gale a 'danga sɛ nùi gɛ vɛ

¹ NWA Gale a 'danga sɛ nùi, nɛ ma kulu sɛ. A vĩ sɛ zu mɛnɔ ngɔ nù gɛ, nɛ a pɛsɛ sɛ owinɔ.

² Ngamɔ ma kpa sɛ zu owinɔ vɛ̃. Onganganɔ do ogele winɔ, ongbánɔ do Owele wa, owi be gole do Owi oso mɔ, Owele mbili do Owi ba ku'da mbili, owi sã do Owi kpamɔ, wa vɛ̃ wa kpa sɛ kpo kpo ngamɛ ni.

³ Mɛnɔ ngɔ nù gɛ ma 'danga sɛ vɛ̃, tala mɔ kpo 'báná sɛ 'bɔ gɔ. NWA Gale tɔ̃a na mɛ ni, nɛ olo nu a ma dɛ sɛ tɛ̃ ɛ.

⁴ Nùi ma kolo ngaɔɔ, nɛ ma 'danga vɛ̃. Dia mɔ kpo 'bànà 'bɔ ngɔ nù gɛ gɔ. Nɛ li nza ma tɛ 'danga tɛ mɛ 'bɔ fala nɛ kpo do nùi.

⁵ Dɛa to tɛ owinɔ ma faka nùi do'do. Mba gɔ, wa bɛ̃a we nu NWA Gale, nɛ wa zèlè mbulanɔ 'da a gɔ. Wa 'danga gba tɔkɛ kɛ a gba zi do wa na, ma ɔ fai ni do'do.

⁶ Ma hã Gale fɔmbɔ nùi, nɛ owinɔ wa tɛ kpa ngamɔ olo 'dã mɛnɔ wa dɛa ni. Wa fe wena, nɛ tala wa 'bana be sĩ iko.

⁷ Wala te vinɔnɔ ma kolo sɛ, nɛ dɔ̃ vinɔ ma zɔlɔ sɛ. Owi dɛ yangga dɔnɔ wa dungu sɛ do 'bako.

⁸ Ngɔ tɛ biãnɔ ma gɛ̃a vɛ̃. Fo mbé wi dɛ ɛngga bina, nɛ giti kundu wélé 'bɔ gɔ.

⁹ Wa zélé 'bɔ gɛlɛ wele tɛ ga zuma nu kpana dɔ̃ gɔ, nɛ onga dɔ̃nɔ ma kpãlã kɔ nu Owi nɔ ma do'do.

¹⁰ 'Da le ma kula ko ko ko, nɛ ma 'danga do'do. Owinɔ wa yu dɛ kɔ tɔa, nɛ wa kpe nu nɛ dɛ ngɔ wa, nɛ wa kã ma.

¹¹ Owi yɛnggɛ li walanɔ wa ala nu wa, we kɛ wa kpá 'bɔ dɔ̃ na, wa nɔ ma gɔ. Nɛ fo 'bɔ wi dɛ yangga kɔ le ni bina.

¹² Tɛ 'di mɔ, wa kpa tati a Ogbɛsa tɔa iko, nɛ nu ngbo le ma gbini vɛ̃.

¹³ Kpo kpo ngamɛ ni, ma kpa sɛ kɔ lenɔ ngɔ nù gɛ vɛ̃, nɛ de mɔ 'báná sɛ 'bɔ gɔ. Lenɔ ma ɔ sɛ nɛ te vinɔ tabi te olivɛ, kɛ wa 'bi wala nɛ ngɔ nɛ vɛ̃ do'do ni.

Wa dɛ yangga do yala iko

¹⁴ Owinɔ kɛ wa fè gɔɛ ni, wa ga zuma we dɔnggɔ do NWA Gale, we kɛ a gã wena. Owinɔ si 'biti gɛ̃a wese, wa he mɔ do yangga,

¹⁵ nɛ owanɔ si 'biti gba wese, wa 'bu kɔ̃ wa hã NWA. Owanɔ kɛ wa ɔ nu gba lìnɔ ni, wa tɔ̃ de sako li NWA Gale 'da obe Israɛlɛ.

¹⁶ Nɛ tɛ ndɔti nù 'di, lɛ zila zuma na: “Lɛ dɔ́nggɔ́ Gale, a a wi bɔlɔ zu!” Nɛ nde kɛ 'da mi, mi tɔ̃ do kɔ sila mi na: “Ma ia do mi ia, fo 'bɔ mbé kpasi do mi bina. Mi a wi 'bako!” Owi tɔ̃ ngalangbanɔ wa tɛ tɔ̃ ngalangba, nɛ wa tɛ 'danga sanga winɔ dɛ dati fai.

¹⁷ Nɛ, owinɔ ngɔ nù gɛ vɛ̃, nɛ zélé mi sɛ. Nɛ kpa sɛ ngamɔ do 'bako. Wa kala sɛ nɛ, ɔ nɛ kɛ bili tabi gbanda ma kala osa'de ni.

¹⁸ Wi kɛ a dɛ kili, kɔ a fa we yu ngamɛ ni, nɛ a te sɛ kɔ 'du kɔ. Kɔ fala kɛ a hɔ nza kɔ Kɔ̃ɛ ni, nɛ a te sɛ kɔ gbanda. Nu li nza ma fí, nɛ lì ma sulu dɛ nù nga, nɛ nyanga nza ma mbi.

¹⁹ Nùi ma zã, nɛ ma yaka, nɛ ma gbini.

²⁰ Ma dɛ gbee gbee ɔ nɛ wi bá dɔ́ ni, nɛ ma yaka ɔ nɛ kɛ bũ yaka tɔa kɔnggɔ ni. 'Dã mɛ 'da owinɔ ma dɔ wena, nɛ nùi ma tia ti dĩ tole 'dã mɛnɔ ni, kɔ ma wè 'bɔ tɛ bɔlɔ tɛ̃ ɛ gɔ.

Ngawi 'da Gale ma be sɛ tɛ ɛ ngɔ nù nga

²¹ Do ngba soe ni, NWA Gale a siki sɛ li a dɛ tɛ owi ngawinɔ li nza 'di, do wanɔ ngɔ nù nga gɛ, nɛ a 'danga sɛ ngawi 'da wa.

²² A mba sɛ li wa vɛ̃ dɛ kɔ gã kɔ̃ ɔ nɛ owi bɔlɔkɔ ni, nɛ wa hɔ́ sɛ 'bɔ nza gɔ gbaa we hɔ ngba soe kɛ a gɔnɔ sɛ do ngbangga 'da wa, nɛ a hã etumbu hã wa ni.

²³ Sape ma ba sɛ li zɛkɛ do wese, nɛ ma tó sɛ 'bɔ gɔ. Mba gɔ, NWA Gale ngɔ mɔ nyanga nza vɛ̃, a dungu sɛ nwa kɔ le Yeruzalɛmɛ, tɛ ngɔ kala Sioni. Nɛ dɔ̃lɔ̃ li 'da a ma be sɛ tɛ̃ ɛ dati okumunɔ kɔ le ni.