Ezai 23 - WE NU GALE 1995

Ogã le Tirɛ do Sidoni ma 'danga sɛ

¹ Nɛ zélé toe gɛ, NWA Gale tumba ma hã owi kɔ le Tirɛ na: “Aa nɛ, Owi Tirɛ, kɛ nɛ yɛnggɛ do masuanɔ ngɔ gba lì 'di ni, nɛ bí tɛ nɛ, nɛ nɛ álá nu nɛ. Mba gɔ, le olo nɛ do nu kole kɛ nɛ kpɔ zi do masuanɔ 'da nɛ ni, ma 'danga vɛ̃. Nɛ yula wala yalinɔ 'da nɛ, nɛ nɛ hɔa ngɔ nù Siprɛ, kɔ nɛ tɛ si nɛ, nɛ nɛ zila toe ni.

² Aa nɛ, owi be golenɔ tɛ kɔ le Sidoni, kɛ ma dɛ nu gba lìnɔ ni, nɛ konggo kili. Nɛ, kɛ nɛ tombo owinɔ na, wa kũ gba li,

³ nɛ wa oso Okpalɛnɔ kɛ wa mi ma kɛ zã nu lì Nilɛ, nɛ wa oso 'bɔ gole sanga tɛ ngba wa do ogele nu kɔnggɔnɔ kpi do kpi ni, nɛ gɔ́nɔ́ kili.

⁴ Aa nɛ, owi Sidoni, kɛ nɛ dɛa gba ngbo, nɛ ma zĩ le 'da nɛ takpa dɛ kɛ zã nu gba lì ni, nɛ dɛ́ sape. Mba gɔ, gba lì ala nu ɛ na: ‘Mi kò mbe kuti kula do kɛ na mi ĩ ti zɛlɛ kula gɔ. Nɛ mi dàlà mbɛ be fala kpo gɔ.’

⁵ Do fala kɛ Oezipeto wa zele sɛ we gɛ ni, nɛ ma zɛlɛ sɛ tɛ wa wena, ɔ nɛ kɛ wa zila zi 'bɔ we kɛ le Tirɛ 'danga zi, nɛ ma zɛlɛ tɛ wa ni.

⁶ Aa nɛ, kɛ nɛ ɔ nu lìnɔ gɛ, nɛ hé kɔ̃a tɛ nɛ, nɛ kṹ gba lì, nɛ nɛ yu gbaa dɛ kɔ le Tarsisi.

⁷ Le 'da nɛ, mɛ a ã le zi dati belee. Mɛ zi a le yangga, nɛ owinɔ wa yolo zi di ni, nɛ wa nɛ nyɛlɛ wena we e mbula ngɔ ogele lenɔ.

⁸ Nɛ ia zi onwa ngɔ gele lenɔ, nɛ owi be gole mɛnɔ kɔ le 'da nɛ, wa ɔ zi nɛ nwa ni. Dia sako li wa ma kpa zi ngɔ nù gɛ vɛ̃. Kɔ nɛ zɔ̃, le Tirɛ ma 'danga do'do. Wi kɛ a 'dafa na ma 'danga na mɛ ni, wi a wio nde?

⁹ Wi 'dafa na mɛ ni, wi a NWA Gale ngɔ mɔ nyanga nza vɛ̃. A dɛa ni we hã sape hã owinɔ kɛ wa fa tati a dɔ̃lɔ̃ li ni, do we yulu nu ngatɛ 'da ogã winɔ nù.

¹⁰ Aa nɛ, owi Tirɛ, nɛ sí, hã nɛ wa fɔ iko, we kɛ fo 'bɔ mbé nu kolo we kpɔ do masuanɔ 'da nɛ, kɛ nɛ yɛnggɛ do ma ngɔ gba lìnɔ 'di ni bina.

¹¹ NWA bia kɔ̃ a dɛ ngɔ gba lì, nɛ a dãlã do ma. A hã kili hã onu kɔnggɔ winɔ, nɛ tɛ wa tana. Nɛ a ba nu a na, owi bolo wa 'dángá gba ngbo nu lenɔ tɛ ngɔ nù Fenisi do'do.”

¹² Nɛ NWA tɔ̃a 'bɔ na: “Aa nɛ, owi Sidoni, le 'da nɛ ma 'danga ia, fo 'bɔ mbé yangga kɔ nɛ bina. Gɛnɛ kɔ nɛ kũ gba lì, hã nɛ yu dɛ ngɔ nù Siprɛ kɛ ma dɛ gbogbo zã gba lì ni, nɛ nde nɛ kpá sɛ fala kpe tɛ nɛ gɔ.

¹³ Le Tirɛ ma 'danga, nɛ ma hɔa fala ɔi mɔ osa'de zamɔ. Nɛ nde wi 'dàngà zi ma wi a Oasiri gɔ, wi a Owi Babilɔnɛ. Wa tɛa do onga mɔ bi bolonɔ 'da wa, nɛ wa bi le Tirɛ, nɛ wa 'danga odia tɔanɔ kɔ nɛ ni, nɛ le ma kulu.

¹⁴ Aa nɛ, owi Tirɛ, kɛ nɛ yɛnggɛ do masuanɔ ngɔ gba lì 'di ni, nɛ bí tɛ nɛ, nɛ nɛ álá nu nɛ. Mba gɔ, le olo nɛ ma 'danga vɛ̃.”

¹⁵ Na mɛ ni, ta zu wele ma ele sɛ ngɔ le Tirɛ gbaa 'do sabɛlɛ 'bu nɛ sambo, ɔ nɛ sabɛlɛ kɛ mbe nwanɔ wa ɔ nɛ ngɔ nù gɛ ni. Sabɛlɛnɔ 'bu nɛ sambo ni ma la, nɛ mɛnɔ ma dɛa zi wuko ndumba kɛ wa ga zuma do li a ni, ma dɛ sɛ tɛ mɛ 'bɔ le Tirɛ. Wa ga zuma do li wuko ndumba ni na:

¹⁶ “Aa mɔ, wuko ndumba gɛ, ta zu winɔ ila ngɔ mɔ do'do. Mɔ bá kundu 'da mɔ, nɛ mɔ zɛ́ ma. Mɔ 'dáfá kɔ gɛlɛ mɔ, nɛ mɔ gá zuma, nɛ mɔ yɛ́nggɛ́ do 'da le gɛ vɛ̃. Mɔ dɛ́ ni, sɛ a ta zu winɔ gba ngɔ mɔ de.”

¹⁷ Sabɛlɛnɔ 'bu nɛ sambo ni ma la sɛ do'do, nɛ NWA Gale a dɛ sɛ 'bɔ na, Owi Tirɛ wa be golenɔ 'da wa hã ogele winɔ. Na mɛ ni, wa kpa sɛ mbili, nɛ dɛa to tɛ wa ma 'danga sɛ ɔ nɛ dɛa to tɛ wuko ndumba ni.

¹⁸ Nɛ mbilinɔ kɛ wa kpa sɛ ma ni, ma la sɛ dɛ 'da NWA Gale. Wa mbá sɛ li nɛ we usu ma do mɔ wa gɔ, nɛ nde wi nyɔngɔ sɛ ma, wi a owinɔ kɛ wa dɔnggɔ NWA Gale ni. Wa oso sɛ ma do nyɔngɔmɔ, do dia tulu mɔ́ wa.