Ezai 22 - WE NU GALE 1995

NWA yaka zala owi Yeruzalɛmɛ

¹ Nɛ zélé toe gɛ, NWA Gale tumba ma hã owinɔ tɛ fala wa sa li nɛ na: “Gbangɔlɔ̃ kɛ Gale be do mɛ li winɔ” ni. Aa nɛ, owi Yeruzalɛmɛ, ma dɛa nɛ nde? Gulu kɛ owinɔ 'da nɛ vɛ̃ wa kũ dɛ gbogbo zu tɔanɔ,

² nɛ wa dɛ yangga, nɛ wa he mɔ, nɛ wa dɛ sa we ge nde? Osodanɔ 'da nɛ kɛ wa fia ni, wa fè li bolo gɔ.

³ Ogã wi ngɔ wa wa yu bole, wa dɛa kili kpili 'da owi sɛnɛ wa. Nɛ gɛnɛ kɔ owanɔ wa yu nyɛlɛ wena ni, owi sɛnɛ wa wa kpa wa, nɛ wa kala wa do ngbá.

⁴ Kɔ we duzu ma, nɛ e mi ni, hã mi he kɔ̃a ngamɛ kɛ owinɔ 'da mi wa kpa ma gɛ, nɛ nɛ tɛ gà mi gɔ.

⁵ We kɛ sɔɛ gɛ, mɛ a kɔ̃ tũ 'bako. Mɛnɔ ma 'danga, nɛ zu lɛ ma vĩ. Wi a NWA Gale ngɔ mɔ nyanga nza vɛ̃, a dɛa na mɛ ni. Ngbo nu le 'da lɛ ma gbini vɛ̃, nɛ owinɔ wa zɛa nu wa, nɛ ma wila gbaa ngɔ kalanɔ 'di.

⁶ Osoda Elamɛ wa kũ ngɔ ombalata do kɔ ongilingili, wa kala onzabele do okpili dɛ kɔ̃ wa, nɛ wa yu dɛ i nga nganda wena. Nɛ osoda Kirɛ wa kala ngele 'da wa dɛ ngɔ.

⁷ Owi bolo wa tɛa do ongilingili do ombalata, nɛ wa kpa do ngɔ dia nùnɔ 'da nɛ tɛ nyanga kalanɔ 'di ni vɛ̃. Wa yula dɛ nu ngbo le 'da nɛ, nɛ wa 'bɔ tati a we bi nɛ iko.

⁸ Fo zi 'bɔ mbé mɔ kpo we amba zu Oyuda bina. Do ngba soe ni, nɛ nɛa we zɔ ni, nɛ nɛ gbini zã nɛ do omɔ bi bolonɔ 'da nɛ, kɛ nɛ usu ma kɔ tɔa nɛ sa li ma na: “Kɔla Libanɛ” ni.

⁹ Nɛ nɛ nɛa we zɔ li holonɔ kɛ ma tɛ ngbo nu le ni, takɔ nɛ 'dafa ma. Nɛ sua 'bɔ lì dɛ kɔ gã kɔ̃ lì kɔ le 'da nɛ ni.

¹⁰ Nɛ yɛngga kɔ tɔanɔ vɛ̃, nɛ nɛ gbɛsa ombee nɛ, nɛ nɛ kala mɔ tɛ nɛ we 'dafa do ngbo nu le.

¹¹ Nɛ zã mbé kɔ̃ lì dɛ sanga ngbonɔ, nɛ nɛ 'dafa ma do tɛlɛ tɛ kɛ na, lì yolo kɔ ã kɔ̃ɛ, nɛ ma fo dɛ kɔ mbé kɛ. Nɛ dɛa mɛnɔ ni vɛ̃, nɛ nde nɛ lènggè do Gale kɛ a 'dafa na, nɛ kpa ngamɛ ni gɔ. A ndua zi 'dafa na mɛ ni belee, nɛ nde nɛ lènggè zi do ma gɔ.

¹² Do ngba soe ni, nɛ NWA Gale ngɔ mɔ nyanga nza vɛ̃ tɔ̃a hã nɛ na: “Nɛ bí tɛ nɛ, nɛ álá nu nɛ, nɛ kɛ́lɛ́ mili zu nɛ do'do, nɛ nɛ he'de tulu gɛla.”

¹³ Nɛ nde nɛ lengge zi do dɛ mɔ dɔ iko. Nɛ gbɛa ongɔmbɔ do obata, nɛ nyɔnga mulu sa'de, nɛ nɛ nɔ dɔ̃, nɛ nɛ tɔ̃ na: “Lɛ nyɔ́ngɔ́ tala nyɔngɔmɔ, nɛ lɛ nɔ́ tala dɔ́ do ti, we kɛ bindɛ nde lɛ fia ia.”

¹⁴ Nɛ NWA Gale ngɔ mɔ nyanga nza vɛ̃ tɔ́a hã mi na: “Mi 'bili ia, mi élé sɛ 'dã mɛ 'da wa fala kpo gɔ gbaa na wa fia sɛ nɛ de.” NWA Gale ngɔ mɔ nyanga nza vɛ̃ tɔ́a ni.

Gale a fo sɛ Sɛbna tɛ dɛa toe 'da a

¹⁵ NWA Gale ngɔ mɔ nyanga nza vɛ̃ ba nu a hã mi na, mi nɛ́ 'da Sɛbna, gã wi ti nu nwa kɛ a zɔ mɔ tɛ tɔa nwa ni, nɛ mi tɔ̃ hã a na:

¹⁶ “Mɔ a wio nde? Nɛ mɔ lengge zu mɔ na ge nde? Wi ba wala hã mɔ na, mɔ zã zunu ngɔ kala 'di, nɛ mɔ e ma na, wa mí sɛ do mɔ, wi a wio nde?

¹⁷ Mɔ a gã wele kpaa, nɛ nde nwa a ba sɛ mɔ, nɛ a da sɛ mɔ nyɛlɛ wena. A 'bo sɛ mɔ ɔ nɛ kili nù ni,

¹⁸ nɛ a da mɔ vĩi, nɛ mɔ te ndũu ngɔ gele nù kɛ ma gã wena. Nɛ mɔ 'bana sɛ dɛ i mɔ, nɛ mɔ fe dɛ kɛ zã ongilingilinɔ 'da mɔ, kɛ mɔ dɛ wali nɛ wena ni. Mɔ hã sɛ sape hã nwa ngɔ mɔ do owinɔ kɔ ngboe 'da a vɛ̃.”

¹⁹ NWA tɔ́a hã Sɛbna na: “Mi ndaka sɛ mɔ tɛ fala 'da mɔ do'do, nɛ mi fo sɛ mɔ tɛ gã dɛa toe 'da mɔ.

²⁰ Do ngba soe ni, mi sa sɛ mɔ hã wi dɛa toe 'da mi Eliakimɛ, be 'da Hilkia na, a tɛ.

²¹ Kɔ a hɔ do'do, nɛ mi he'de sɛ tulu nwa 'da mɔ hã a, nɛ mi e sɛ a do gã wi kɔ tɔa nwa dɛ olo mɔ. A ɔ sɛ nɛ baa Owi Yeruzalɛmɛ do Owi ngɔ nù Yuda vɛ̃ ni.

²² Mi e sɛ a do gã wi dɛ ti nu nwa, kɛ a a be zã Davidi ni. Mi hã sɛ fungula nu tɔa 'da nwa hã a. Do fala kɛ a fì nu tɔa ni, nɛ nde wele kpo kpé sɛ ma gɔ, kɔ a kpe ma, nɛ fo sɛ wi fĩ ma bina.

²³ Mi dɛ sɛ 'bɔ na, a yolo nganda ɔ nɛ kunggu kɛ wa bɛ̃lɛ̃ ma dɛ zã te ni. Owi nu fɛlɛ a vɛ̃ wa kpa sɛ dɔlɔ li we duzu a.

²⁴ “Na mɛ ni, onya a do owi nanɔ 'da a vɛ̃, wa tɛ sɛ dɛ ti kɔ̃ a, nɛ wa sɛ a dĩ tole wena we duzu a. Wa gãlã sɛ dɛ tɛ̃ a zuu, ɔ nɛ dĩ tole nu kunggu ni.

²⁵ Ma ɔ sɛ ni fai, nɛ kunggi kɛ ma nɔa zi nɛ ge nde ni, ma mbɔkɔ sɛ, nɛ ma te, nɛ mɛnɔ vɛ̃ kɛ wa gãlã zi nu nɛ ni, ma o sɛ. Mi NWA, mi tɔ́a ni.”