Ezai 21 - WE NU GALE 1995

Gã le Babilɔnɛ ma 'danga sɛ

¹ Nɛ zélé toe gɛ, ma tɔ̃ we ngɔ le: “Li go tɛ nu gba lì.” Ngamɔ ma yolo sɛ li go 'di, tɛ kɔ le kɛ owinɔ vɛ̃ wa dɛ kili ma ni. Ma tɛ sɛ ɔ nɛ gba bũ kɛ ma la do li gba zɔ̃ Negɛvɛ ni.

² NWA Gale bia mɔ hã mi, mɛ a mɔ kɛ ma 'danga wena, nɛ tɛ wele fe tɛ nɛ fia. Owinɔ kɛ wa dɛ zi na dati dɛa ni, wa hɔa wi vũ to tɛ ngba wa. Ngba soe 'danga mɔ ma hɔa ia. NWA tɔ̃a na: “Osoda Elamɛ, nɛ kúlú ngɔ we bi bolo! Osoda Mɛdɛ, nɛ bá le ni! Mi dɛ sɛ na, ngawi 'da Owi Babilɔnɛ ma e, nɛ wa ha sɛ 'bɔ ngamɔ hã wele gɔ.”

³ Mi zɔa ni, nɛ mi tana kili. Nɛ tɛ mi zɛlɛ ɔ nɛ tɛ wuko kɛ kula tua a ni. Mɛnɔ vɛ̃ kɛ mi zɔa, do kɛnɔ mi zila ni, ma zɛlɛ sila mi, nɛ zu mi vĩ tɛ nɛ do'do.

⁴ Mi do mbé ngawi bina, nɛ sila mi ma to kpu kpu kpu. Mi 'bɔ na, wese le nù hã sila mi gɛ̃. Nɛ nde wese nɛa we le nù, nɛ kili ba 'bɔ mi dɛ dati.

⁵ Mi zɔa nɛ nde wa 'dafa mɔ dɔ. Wa na mɔ dungu hã owinɔ, nɛ wa nyɔngɔ mɔ, nɛ wa nɔ dɔ̃. Do 'da fala ni, nɛ hiamɔ dɔ̃lɔ̃ na: “Onwa bolonɔ, nɛ kúlú ngɔ, hã nɛ kálá mɔ bi bolonɔ 'da nɛ!”

⁶ Nɛ NWA Gale tɔ̃a hã mi na: “Mɔ é wele kpo we zɔ mɔ tɛ nu le, nɛ a tɔ̃ we mɛnɔ kɛ a zɔ sɛ ma ni hã mɔ.

⁷ Fala kɛ a zɔ ombalata tɛ gbɔtɔ ngilingili nɛ bolo, tabi a zɔ Owele ngɔ punda tabi ngɔ samo, nɛ li a sɔ̃ tɛ wa.”

⁸ Nɛ wi kɛ mi ia a we zɔ mɔ tɛ nu le ni, a hia mɔ na: “Nwa, sɔɛ gɛ vɛ̃, mi zɔa mɔ nu le, mi là dɛ gele fala gɔ, nɛ mi ɔ̃ 'bɔ yala do tũ gɔ. Nɛ nde mi zɔ̃ mɔ gɔ.

⁹ Kɔ mɔ zɔ́, wele kpo a 'di mɔ ni, a a kɔ ngilingili, nɛ ombalata wa gbɔtɔ ma. A tɛ he mɔ na: ‘Babilɔnɛ 'danga ia. Wa gbini sanga okpikima galenɔ 'da Owi Babilɔnɛ sikili sikili, nɛ wa a ma nù.’ ”

¹⁰ Aa nɛ, owinɔ 'da mi, obe Israɛlɛ, owi Babilɔnɛ wa zɛa zi nɛ, ɔ nɛ kɛ wa zɛ do kpalɛ ngɔ 'dinggili ni. Kɔ ngangga gɛ, mi tɔ́a dia sako hã nɛ. Sakoe ni, wi tɔ́a ma hã mi wi a NWA Gale 'da lɛ obe Israɛlɛ.

NWA tumba to hã Oedɔmɛ

¹¹ Kɛ gɛ a olo nu NWA Gale, Ezai tɔ́a ma hã Oedɔmɛ. Mi zele wala gɛlɛ wele tɛ kɔ le Seirɛ, tɛ ngɔ nù Edɔmɛ, a he mɔ na: “Aa sinzili, tũi ma 'bana wena nde? Fala tɛ kɔ̀lɔ̀ fala sa nɛ gɔ nde?”

¹² Nɛ sinzili gese na: “Fala ma kɔla fala sa nɛ ia, nɛ nde tũi ma tũ sɛ 'bɔ mbé nɛ. Kɔ mɔ kɔ 'bɔ we aka mi, nɛ mɔ tɛ, nɛ mɔ aka.”

NWA tumba to hã Owi Arabi

¹³ Nɛ zélé toe gɛ, NWA Gale tumba ma hã Owi Arabi. Nɛ, Odedanɛ, kɛ nɛ yɛnggɛ do tolenɔ 'da nɛ kunggudii do li gba zɔ̃ɛ gɛ, fala kɛ tũ tũ, nɛ nɛ lé zamɔ, nɛ nɛ úsú tɛ nɛ.

¹⁴ Aa nɛ, owinɔ kɛ nɛ ɔ kɔ le Tema, nɛ yɛ́lɛ́ ti Owi yu bolonɔ kɛ wa fe wɔ lì gɛ, nɛ nɛ hã lì hã wa. Nɛ gɔ́nɔ́ dati wa, nɛ nɛ hã nyɔngɔmɔ hã wa.

¹⁵ Mba gɔ, wa yu dati owinɔ kɛ wa gbɔtɔ du kɔyanɔ we gbɛ do wa, 1 na wa mana nzabele we ndɔlɔ do wa ni. Wa yu dati ngawi bole.

¹⁶ NWA Gale tɔ́a hã mi na: “Ma 'bana sabɛlɛ kpo, nɛ do kpo kɔ̃ tũi gɛ, dɔ̃lɔ̃ li 'da le Kedarɛ ma Sɔkpɔ sɛ.

¹⁷ Tala onga soda bolonɔ, do owi da nzabelenɔ kɔ le ni wa 'bana sɛ bi sĩ iko.” NWA Gale 'da obe Israɛlɛ tɔ̃a ni.