Ezai 2 - WE NU GALE 1995

¹ NWA tumba zi to hã Ezai, be 'da Amɔtisi. Toe ni ma zi we nù Yuda do le Yeruzalɛmɛ.

Owinɔ vɛ̃ wa nɛ sɛ tɛ Yeruzalɛmɛ

² Mbe tũ kpo, nɛ kala kɛ tɔa Tɛmpɛloe ngɔ nɛ ni, ma ngala sɛ nɛ ngɔ kɛnɔ kɛ zã nɛ ni vɛ̃, nɛ mɛ sɛ a nwa kala. Nɛ onu kɔnggɔ winɔ vɛ̃ wa nɛ sɛ dɛ tɛ nɛ.

³ Kɔ gba gili winɔ ni wa ma ngɔ nɛ 'di mɔ, nɛ wa tɔ̃ sɛ do 'da li wala na: “Lɛ nɛ́, lɛ kṹ ngɔ kala Sioni, kala 'da nwa, lɛ lé kɔ tɔa 'da Gale 'da Yakɔbɔ. A be sɛ mbulanɔ 'da a hã lɛ, nɛ lɛ ba sɛ wala kɛ a be hã lɛ ni. Mba gɔ, bia wenɔ 'da NWA ma yolo tɛ ngɔ kala Sioni, nɛ lɛnggɛnɔ 'da a, kɛ ma hɔ zala lɛ ni, ma yolo Yeruzalɛmɛ.”

⁴ A gɔnɔ sɛ ngbangganɔ sanga onu kɔnggɔ winɔ, nɛ a 'dafa sɛ ngbala wa vɛ̃. Wa yámbálá sɛ 'bɔ bi bolo gɔ, tua kɛ wa bí sɛ 'bɔ mbé bolo do ngba wa gɔ. Wa kala sɛ du kɔya bolonɔ 'da wa, nɛ wa dolo do kongo. Nɛ osɛlɛ bi bolonɔ 'da wa, wa dɛ sɛ do dugbu we wa do fɔ.

⁵ Aa nɛ, obe zã Yakɔbɔ, nɛ kúlú ngɔ hã lɛ mbá ngba lɛ kpo, hã lɛ yɛnggɛ kɔ sa fala kɛ nwa hã ma hã lɛ gɛ.

Kɔ̃ tũ kɛ NWA a gɔnɔ sɛ ngbangga 'da owinɔ

⁶ NWA, mɔ siki 'do mɔ hã obe zã Yakɔbɔ, kɛ wa a owinɔ 'da mɔ ni. Owi dɛ sɔ̃nɔ kɛ wa yolo si 'biti gba wese, wa dɛlɛ kɔ le 'da wa wena. Owi zɔ nu mɔ tɛ wele, wa dɔa 'da wa ɔ nɛ wanɔ ngɔ nu Filisti ni. Owinɔ 'da mɔ wa mba ngba wa do ogele wele.

⁷ Mɔ mbali, do fɛ̃a mɔ bolo, do okpamɔ kpi do kpi, ma dunu le 'da wa dunu. Aka we ombalata do ongilingili we nɛ bolo kɔ le ni gɔ.

⁸ Ogale bɛlɛnɔ wa kpa fala vɛ̃, nɛ owinɔ vɛ̃ wa gu nù ti okpikima, kɛ wa dɛa ma do kɔ̃ wa ni.

⁹ We duzu ma, wa vɛ̃ wa kpa sɛ sape, nɛ wa usu sɛ li wa. Nɛ NWA, dɔ mɔ ĩ́ 'bako hã wa gɔ.

¹⁰ Nɛ úsú tɛ nɛ kɔ ta, nɛ za kɔ̃, hã nɛ yu dɛ kɔ nɛ. Nɛ tɛ hɔ nza dati nwa gɔ, nɛ dɛ́ kili a, we kɛ dɔ̃lɔ̃ li 'da a gã nɛa ngɔ mɔ vɛ̃. Nɛ tɛ hɔ nza dati a gɔ.

¹¹ Do tũi ni, wi kɛ a ka mɔ do wali, nɛ a bili sɛ zu a nù, nɛ wi dɛ ngatɛ, a kpa sɛ sape. Owinɔ wa ĩ sɛ na, nwa zu a kpo a gã wi.

¹² Do kpo kɔ̃ tũi ni, nwa ngɔ mɔ nyanga nza vɛ̃, a siki sɛ li a dɛ tɛ winɔ kɛ wa be tɛ wa ngɔ ngba wa ni, nɛ a hã sɛ sape hã wa.

¹³ A siki sɛ li a dɛ tɛ te sɛdrɛnɔ ngɔ nù Libanɛ, kɛ ma dulu nɛ ge nde ni, do tɛ te sɛnɛnɔ ngɔ nù Basanɛ, nɛ a 'danga sɛ ma vɛ̃.

¹⁴ A gbɛsɛ sɛ ogã kalanɔ, do ongala tɔ̃nɔ.

¹⁵ A gbini sɛ ongala tɔanɔ, do ogba ngbo nu lenɔ vɛ̃.

¹⁶ A bindi sɛ ogã masuanɔ, kɛ ma dia nɛ ge nde ni.

¹⁷ Wi dɛ wali, a kpa sɛ sape, nɛ wi dɛ ngatɛ, a usu sɛ li a. Do kɔ̃ tũi ni, owinɔ wa ĩ sɛ na, NWA zu a kpo a gã wi.

¹⁸ Nɛ gale bɛlɛ kpo 'báná sɛ gɔ.

¹⁹ Nɛ úsú tɛ nɛ kɔ ta, nɛ zã kɔ̃, hã nɛ yu dɛ kɔ nɛ. Nɛ tɛ hɔ nza dati NWA gɔ, nɛ dɛ́ kili a, we kɛ dɔ̃lɔ̃ li 'da a gã nɛa ngɔ mɔ vɛ̃. Fala kɛ a hɔ, nɛ a dɛ sɛ na, nùi ma yaka.

²⁰ Do tũi ni, owinɔ wa kala sɛ okpikimanɔ, kɛ wa dula wa do mɔ mbali, do fɛ̃a mɔ bolo we dɔnggɔ wa ni, nɛ wa da sɛ wa hã ozula ti nù do opipili.

²¹ Wa dɛ sɛ kili, nɛ wa yu sɛ NWA, kɛ dɔ̃lɔ̃ li 'da a gã nɛa ngɔ mɔ vɛ̃ ni, nɛ wa usu sɛ tɛ wa kɔ holo tanɔ, nɛ nde wa hɔ́ sɛ nza dati a gɔ. Fala kɛ nwa hɔ, nɛ a dɛ sɛ na, nùi ma yaka.

²² Nɛ lá fala gbini zã nɛ do wele, we kɛ a fe fio dɔ̃ɔ iko. Wele a mɔ gɔ.