Ezai 19 - WE NU GALE 1995

Ngamɔ ma kpa sɛ Oezipeto

¹ Nɛ zélé toe gɛ, NWA Gale tumba ma hã Oezipeto. Nɛ zɔ́ NWA Gale, a kũ dɛ ngɔ gba kutunɔ, nɛ ma tɛ yu do a nganda wena we e a ngɔ nù Ezipeto. A nɛa we hɔ 'di mɔ, nɛ ogalenɔ ngɔ nù Ezipeto wa tana kili, nɛ Oezipeto wa 'bɔa hɛɔɔ, fo 'bɔ ngawi do wa bina.

² Nɛ NWA tɔ̃a na: “Mi nɛ 'danga sila wa dɛ tɛ ngba wa, nɛ wa bi sɛ bolo dɛ sanga wa. Onya wi wa gbɛ sɛ ngba wa, nɛ nu fɛlɛ kula bi ngbɛ ɛ do gele nu fɛlɛ kula. Onwanɔ ngɔ nùi ni, wa bi sɛ do ngba wa we wɛlɛ zu dɛa to nwa.

³ Mi 'danga sɛ linggamɔ zu wa dɛ ngɔ nùi 'da wa, nɛ zu wa ma vĩ sɛ. Kɔ wa zɔ ni, nɛ wa aka sɛ ogalenɔ 'da wa, do Owi zɔ gulu mɛnɔ, do obɔzɔnɔ na, wa gbaka lo.

⁴ Mi e sɛ nù Ezipeto ti mbula 'da mbe 'dã nwa kpo, kɛ li a kolo wena, nɛ a hã sɛ ngamɔ hã winɔ.” NWA Gale ngɔ mɔ nyanga nza vɛ̃ tɔ̃a ni.

⁵ Lì Nilɛ ɔ̃sã gɛɔ do gɛɔ gbaa nɛ ma kula vɛ̃.

⁶ Nɛ ogbakɔ̃ nɛ ma mbulu, nɛ ma ɔ̃sã gbaa, nɛ ma na nù. Te papirusinɔ do osala tɔ̃nɔ kɔ nɛ ni, ma kula.

⁷ Owɔkɔsɔnɔ tɛ nu konggolo lì Nilɛ ni, do Okpalɛnɔ kɛ wa mi ma kɔ gbangɔlɔ̃ lì ni, ma kula, nɛ bũ ma pɛsa ma. Mɔ kpo 'báná sɛ olo nɛ gɔ.

⁸ Owi gbɛ kɔyɔnɔ, kɛ wa kpasa we duzu lì Nilɛ ni, wa bi tɛ wa, nɛ wa ala nu wa, tua kɛ wa dɛ́ 'bɔ to do galĩnɔ do gbandanɔ 'da wa gɔ. Fo 'bɔ mbé wala kpasi do wa bina.

⁹ Owukonɔ do Owi wilinɔ kɛ wa dɛ tulunɔ do fɛlɛ linɛ ni, wa 'bɔa vɛ̃, fo 'bɔ wala we dɛ toe 'da wa bina.

¹⁰ Owi ngbɔ tulunɔ, do owinɔ vɛ̃ kɛ wa kpasa do dɛa to tuli ni, wa mbɔka do'do, we kɛ fo 'bɔ wala we dɛ toe 'da wa bina.

¹¹ Ogã wi ngɔ le Soanɛ wa ĩ̀ ti toe 'da wa gɔ, nɛ Owi hãnɔ kɛ wa tɔ̃ mbula hã nwa ngɔ nù Ezipeto li dɛa to 'da a ni, fo gbãlã zã wa bina. Kɔ gulu kɛ wa dɔnggɔ tɛ wa na, lo a wi hã zã, lo a be zã nwanɔ zi dati ni we ge nde?

¹² Mɔ, nwa ngɔ nù Ezipeto, Owi hãnɔ kɛ wa tɔ̃ mbula hã mɔ ni, wa a do nde? Mɔ áká wa, hã wa tɔ̃ tɛlɛ tɛ mɛnɔ kɛ Gale, NWA ngɔ mɔ nyanga nza vɛ̃, a 'bili we dɛ do nù Ezipeto ni hã mɔ.

¹³ Fo gbãlã zã ogã wi ngɔ le Soanɛ bina, nɛ ogã wi ngɔ le Mɛmfisi, linggamɔ zu wa tɛ ɔkɔlɔ wa. Wi 'danga nù Ezipeto wi a wa, ogã wi ngɔ lenɔ ni.

¹⁴ NWA Gale vĩ zu wa do'do, ma hã mɛnɔ kɛ wa 'dafa we dɛ ma ni, nɛ wa 'danga 'bɔ ma vɛ̃. Nɛ Oezipeto wa dɛ mɔ tɛ wa ɔ nɛ wi bá dɔ̃ kɛ a ɔ̃lɔ̃, nɛ a te dɛ kɔ nɛ ni.

¹⁵ Fo wi dɛ saka mɔ kɔ wa bina. Gɛnɛ kɔ gã wi tabi be wi, wi kpamɔ tabi wi sã, nɛ nde wele kpo dɛ́ 'bɔ gbãlã we dɛa mɔ gɔ.

Oezipeto wa dɔnggɔ sɛ NWA Gale

¹⁶ Mbe ngba soe kpo, nɛ Oezipeto wa kúnú sɛ 'bɔ sila wa gɔ. Sila wa ma ɔ sɛ nɛ sila wuko ni. Wa zɔ sɛ Gale, NWA ngɔ mɔ nyanga nza vɛ̃ tɛ tɛ we hã etumbu hã wa, nɛ wa tana sɛ kili.

¹⁷ Ta zu wa gba ngɔ nù Yuda, nɛ wa tana gbulu gbulu. 'Da falanɔ vɛ̃ kɛ wa zele sɛ li Yuda ni, nɛ ma gba sɛ ta zu wa ngɔ mɛ kɛ NWA ngɔ mɔ nyanga nza vɛ̃ nɛ dɛ sɛ do wa ni, nɛ wa tana sɛ kili.

¹⁸ Mbe wese kpo, nɛ wa tɔ̃ sɛ lɛnggɛ nu Oyuda kɔ gã le mɔlɔ tɛ ngɔ nù Ezipeto. Nɛ Owi kɔ lenɔ ni wa zonggo sɛ tɛ wa na, lo a winɔ 'da NWA ngɔ mɔ nyanga nza vɛ̃. Wa e sɛ li mbe kpo kɔ lenɔ ni na “Le Wese.”

¹⁹ Mbe ngba soe kpo, nɛ wa dɛ sɛ gbagala hã NWA tɛ gbogbo nù Ezipeto, nɛ wa zĩ sɛ 'bɔ ta tɛ li ngbala nùi 'da wa we dɔnggɔ do a.

²⁰ Wa dɛ sɛ na mɛ ni we gba ta zu winɔ na, NWA ngɔ mɔ nyanga nza vɛ̃ tɛ ngɔ nù Ezipeto boe. Do fala kɛ owi sɛnɛ Oezipeto wa tɛ we hã ngamɔ hã wa, nɛ wa sa sɛ mɔ hã NWA na, a gbaka lo. Nɛ NWA a zele sɛ sa mɛ 'da wa, nɛ a kpasa wa.

²¹ Nɛ NWA a be sɛ tɛ̃ a hã Oezipeto, nɛ wa ĩ sɛ ti a. Wa gbɛ sɛ sa'de hã a, nɛ wa hã sɛ 'bɔ dɔnggamɔ hã a. Wa kpo sɛ mbulu hã NWA, nɛ wa dɛ sɛ olo mbuli ni.

²² Do 'da fala kɛ wa dɛ 'dã mɔ, kɔ NWA hã ngamɔ hã wa olo nɛ, nɛ wa kpolo sɛ tɛ wa dɛ 'da a, nɛ a zele sɛ sambala 'da wa, nɛ a kpasa sɛ wa.

²³ Mbe ngba soe kpo, nɛ li wala ma yolo sɛ ngɔ nù Ezipeto gbaa nɛ ma hɔ ngɔ nù Asiri. Nɛ Oasiri wa nɛ sɛ gɛnɛ tɛ Ezipeto, nɛ Oezipeto wa nɛ sɛ tɛ mɛ 'bɔ gɛnɛ tɛ Asiri. Wa mba sɛ ngba wa, nɛ wa sambala NWA Gale fala nɛ kpo.

²⁴ Mbe ngba soe kpo, nɛ nù Israɛlɛ ma we sɛ kɔ̃ do nù Ezipeto do Asiri we be na, Gale a wele sɛ nu a tɛ nùnɔ vɛ̃.

²⁵ Gale, NWA ngɔ mɔ nyanga nza vɛ̃, a wele sɛ nu a tɛ nùnɔ ni na: “Mi wele nu mi tɛ Oezipeto, owinɔ 'da mi, do tɛ Oasiri kɛ mi dɛa wa do kɔ̃ mi, do tɛ obe Israɛlɛ kɛ mi saka wa do mɔ́ mi ni.”