Ezai 18 - WE NU GALE 1995

NWA yaka zala Oetiopi

¹ 'Bako do nɛ Oetiopi! Nùi 'da nɛ dɛ kɛ zã nu lì Nilɛ, nɛ giti sala 'baka be sa'denɔ wele 'da nɛ nwuu.

² Nɛ tombo Owele, nɛ wa kũ lì Nilɛ dɛ ngɔ do ga kɛ wa dɛa ma do te papirusi. Aa nɛ, Owi nɛ to Etiopi, kɛ nɛ lu ga dɔ́ dɔ́ gɛ, nɛ kpóló tɛ nɛ dɛ ngɔ nùi 'da nɛ, kɛ fua lìnɔ dɛlɛ tɛ nɛ wena ni. Nɛ sí dɛ 'da owinɔ 'da nɛ, kɛ wa dulu wena, nɛ ndala tɛ wa nde ndila ni. Owinɔ ngɔ nù gɛ vɛ̃ wa dɛ kili wa wena, we kɛ wa nganda wena, nɛ wa zɛlɛ tɛ ogele winɔ wena.

³ Nɛ, owinɔ ngɔ nù gɛ vɛ̃, nɛ ká mɔ we fa bɛndɛlɛ kɛ wa zĩ sɛ ma ngɔ kalanɔ 'di ni, nɛ nɛ gɛ́ zala nɛ we 'bɔ do 'da giti mɔtũlĩ kɛ ma wele sɛ ni.

⁴ We kɛ NWA Gale tɔ́a hã mi na: “Mi dungu tɛ nu tɔa 'da mi ngɔ 'di, nɛ mi ka mɔ, nɛ mi zɔ mɛnɔ ma la ngɔ nù gɛ. Nɛ mi yɛ̀kɛ̀ tɛ mi gɔ, mi dungu fio ɔ nɛ nwá, do 'da fala tua wese kɛ bũ fí ti nɛ gɔ ni. Nɛ mi yɛ́kɛ́ tɛ mi gɔ, ɔ nɛ gba kutu sabɛlɛ ni.”

⁵ Nɛ nde nɛ ĩ na, do 'da fala kɛ te vinɔ ma do, nɛ ma wala. Kɔ fala kɛ wala nɛ ndo fele nɛ, nɛ dati kɛ na wa 'bi ma ni, nɛ wa sɛlɛ gbakɔ̃ kɛnɔ kɛ wala nɛ tɛ nɛ bina ni dɛ nù, nɛ ma kolo.

⁶ Na mɛ ní, wa la sɛ wɔlɔ Oetiopi dɛ nù, nɛ oganakele wa nyɔngɔ sɛ ma do zɔlɔ sabɛlɛ, nɛ osa'de zamɔ wa nyɔngɔ do zɔlɔ lì kolo.

⁷ Do 'da fala ni, Oetiopi kɛ fua lìnɔ dɛla ngɔ nùi 'da wa wena ni, wa tɛ sɛ do dɔnggamɔ hã nwa ngɔ mɔ nyanga nza vɛ̃. Wa a Owele kɛ wa dulu wena, nɛ ndala tɛ wa nde ndila. Owinɔ ngɔ nù gɛ vɛ̃ wa dɛ kili wa, we kɛ wa nganda wena, nɛ wa zɛlɛ tɛ ogele winɔ wena. Gɛnɛ kɔ na mɛ ni, nɛ nde wa kala sɛ dɔnggamɛnɔ 'da wa, nɛ wa nɛ do ma ngɔ kala Sioni, nɛ wa hã ma hã nwa ngɔ mɔ nyanga nza vɛ̃, kɛ a ɔ di ni ni.