Ezai 17 - WE NU GALE 1995

Wa 'danga sɛ Damasi gã le ngɔ nù Siri

¹ Nɛ zélé toe gɛ, NWA Gale tumba ma hã Owi Damasi. “Owi sɛnɛ nɛ wa kɔla we 'danga le Damasi ia. Wa tɔlɔ sɛ 'bɔ ma kɔ lenɔ ngɔ nù gɛ gɔ. Ma 'danga sɛ vɛ̃.

² Wa yu sɛ kɔ lenɔ ngɔ nù Siri vɛ̃, nɛ ma kulu sɛ fai. Osa'de wa yɛnggɛ sɛ kɔ nɛ, nɛ nde wele ndáká sɛ wa gɔ.

³ Fo sɛ mɔ na, ma amba zu nù Israɛlɛ bina. Ogele wele wa dungu sɛ nwa ngɔ le Damasi, nɛ tala Osiri wa kpa sɛ sape ɔ nɛ kɛ Oisraɛlɛ wa kpa ni. Mi Gale, NWA ngɔ mɔ nyanga nza vɛ̃, mi tɔ̃a ni.”

Dɔ̃lɔ̃ li 'da Oisraɛlɛ ma Sɔkpɔ sɛ

⁴ Nɛ NWA tɔ̃a 'bɔ na: “Do ngba soe ni, dɔ̃lɔ̃ li 'da Oisraɛlɛ ma Sɔkpɔ sɛ, nɛ kpamɛnɔ 'da wa ma e sɛ, nɛ wa hɔ wi sã.

⁵ Nù Israɛlɛ ma ɔ sɛ nɛ fɔ kɛ wa kala kpalɛ li nɛ vɛ̃ do'do ni. Ma ɔ sɛ nɛ fɔnɔ kɔ gbangɔlɔ̃ 'da Orɛfa, do 'da fala kɛ wa kala kpalɛnɔ kɔ nɛ vɛ̃, nɛ nde mbé nyɔngɔmɔ 'báná 'bɔ di gɔɛ ni.

⁶ Tala Oisraɛlɛ wa 'báná sɛ dɛlɛ gɔ, nɛ nù Israɛlɛ ma ɔ sɛ nɛ te olivɛ, kɛ wa 'bi wala nɛ zu nɛ vɛ̃ do'do ni. Tɛ zu te olivɛ ni do ngɔ 'di, wa zɔ sɛ wala nɛ bɔa tabi talɛ, nɛ tɛ gbakɔ̃ kɛnɔ nù nga ni, wala nɛ ma 'bana sɛ nalɛ tabi mɔlɔ iko. Mi NWA Gale 'da obe Israɛlɛ, mi tɔ̃a ni.”

Oisraɛlɛ wa dɔ́nggɔ́ sɛ 'bɔ kpikima gɔ

⁷ Do 'da fala ni, owinɔ wa siki sɛ li wa dɛ 'da Gale santo 'da obe Israɛlɛ, kɛ a dɛa mɛnɔ nyanga nza gɛ vɛ̃ ni. Nɛ wa ala sɛ nu wa hã a na, a gbaka lo.

⁸ Wa ká sɛ 'bɔ mɔ tɛ ogbagalanɔ, do kpikimanɔ kɛ wa dɛa ma do kɔ wa wele nɛ ni gɔ. Nɛ wa gbíní sɛ 'bɔ mbé zã wa do ondɛngɛlɛ tanɔ, tabi do mɔ dɔ fũ yɔmbɔnɔ gɔ.

⁹ Do ngba soe ni, owinɔ wa yu sɛ kɔ lenɔ, kɛ gba ngboe zĩ ma takpa tɛ ngɔ nù Israɛlɛ gɛ do'do. Nɛ ma kulu sɛ vɛ̃ ɔ nɛ kɛ lenɔ 'da Ohivi do Oamori kulu zi, do 'da fala wa dɛa zi kili obe Israɛlɛ, nɛ wa yu, nɛ wa la ma ni.

¹⁰ Aa nɛ, Oisraɛlɛ, ta zu nɛ ila ngɔ Gale kɛ a kpasa zi nɛ ni nde? A kila zi zu nɛ ɔ nɛ gba ngbo ni, nɛ nde sɔɛ gɛ, nɛ dɔ́nggɔ́ 'bɔ a gɔ. Nɛ wa ofɔ, nɛ nɛ mi te li nɛ we sambala do ogele galenɔ.

¹¹ Nɛ mi tenɔ, nɛ ma gã dɛ li nɛ ni, nɛ do titole nɛ ma do. Kɔ do ngba soe kala wala tenɔ ni, nɛ nde nɛ kpá 'bɔ ma gɔ. Mɛ a ngba soe zɔ ngamɔ, nɛ nɛ wé sɛ we yu ma gɔ.

Gale a ndaka sɛ Owi sɛnɛ Oisraɛlɛ

¹² Aa nɛ, nɛ zélé giti ogba dɔa winɔ kɛ ma wele gɛ. Giti wa dɔlɔ ɔ nɛ giti gba lì, kɛ ngele nɛ ma dɛ do 'da fala gba bũ kamba ni. Ma wele wuu ɔ nɛ sulu lì ni.

¹³ Ogele nu kɔnggɔnɔ wa tɛ tɛ ma, wa he mɔ wena, nɛ giti wa wele ɔ nɛ giti ngele gba lì ni. Nɛ nde NWA Gale kila ti wa we bi do wa, nɛ wa yu, nɛ wa pɛsɛ ɔ nɛ 'bulu zɔ̃ kɛ gba bũ kala ma ni. Wa pɛsɛ ɔ nɛ be tolo we do 'da fala galagula ni.

¹⁴ Do gɛ̃a wese, lɛ zila giti wa, nɛ lɛ dɛa kili. Nɛ fala nɛa we sa nɛ do titole, nɛ nde wa yu vɛ̃ ia, mbé wele kpo 'bànà 'bɔ gɔ. Nɛ zɔ́, mɛ kɛ ma dɛ sɛ winɔ wa tɛ we ba le 'da lɛ gɛ a ni.